ភ្នំពេញ ប៉ុស្តិ៍
ភ្នំពេញៈ សាលាដំបូងរាជធានីពីម្សិលមិញបានបើកសវនាការជំនុំជម្រះបុរស២នាក់ ក្រោមការចោទប្រកាន់ ពីបទ ឃាតកម្ម តាមមាត្រា១៩៩នៃក្រមព្រហ្មទណ្ឌ។
លោក ស៊ិន វិសាល ប្រធានក្រុមប្រឹក្សាជំនុំជម្រះសាលានេះបានថ្លែងថា លោក ជន ជឿន អាយុ២៧ឆ្នាំ និងមាន សេរីមុនី អាយុ២៨ឆ្នាំត្រូវបានចោទប្រកាន់ពីបទឃាតកម្មប្រព្រឹត្តកាលពីថ្ងៃទី២២ ខែធ្នូ ឆ្នាំ២០១១ នៅចំណុចការដ្នានសំណង់ អង្គរភំ្នពេញផ្លូវលេខ១៨០០ សង្កាត់ទួលសង្កែ ខណ្ឌឫស្សីកែវ។
ជនជាប់ចោទ ជន ជឿន បានប្រាប់តុលាការថា ពួកគាត់មានគ្នា៦នាក់ ក្រោយពីផឹកស៊ីអស់ស្រា៤លីត្រ ៣នាក់បានត្រឡប់ទៅផ្ទះវិញ ឯគាត់និងជនរងគ្រោះចេញពីកន្លែងផឹកមកការដ្នានវិញក៏មានជម្លោះពាក្យសម្តី រវាងជនរងគ្រោះ និងឈ្មោះ សេរីមុនី ឈានដល់ការកាប់សម្លាប់គ្នាបណ្តាលឲ្យជនរងគ្រោះស្លាប់នៅនឹងកន្លែងកើតហេតុតែម្តង។
ជននេះសារភាពថា៖«គាត់បានកាប់ក្បាលជនរងគ្រោះ២កាំបិតបុ័ង តោនិងវាយថែម២បំពង់ទីប»។
ចំណែក សេរីមុនី ថា ជនរងគ្រោះបានទារលុយពីគាត់៣ម៉ឺនរៀល តែគាត់អត់មានលុយសង ក៏បានប្រវាយប្រតប់គ្នា ពេលជនរងគ្រោះដួលទៅលើដីគាត់ក៏បានវាយ៣ដំបង ហើយរត់ទៅពួនក្រោមកំប្លោករហូតត្រូវសមត្ថកិច្ចចាប់ខ្លួនតែម្តង។ ជននេះថា ៖ «ខ្ញុំពិតជាបានវាយក្បាលជនរងគ្រោះ២ដំបង និងខ្លួន១ដំបង តែខ្ញុំពុំមានចេតនាសម្លាប់គេទេ»។
លោក ខ្វៃ ជីន ឪពុកជនរងគ្រោះ ផ្លុង ម៉េងលី ហៅ ម៉ាប់ អាយុ២៦ឆ្នាំ បានទាមទារថា៖«សុំឲ្យសង់ជំងឺចិត្តមួយម៉ឺនដុល្លារ ហើយតុលាការត្រូវផ្តន្ទាទោសពួកគេទៅតាមច្បាប់ទៀត»។
លោកព្រះរាជអាជ្ញារង សៀង សុខ តំណាងអយ្យការ ថ្លែងថា ដោយមានភស្តុតាងដាក់បន្ទុកគ្រប់គ្រាន់លោកសុំតម្កល់ការចោទនេះទុកនៅដដែល។ ឯលោកចៅក្រម ស៊ិន វិសាល ប្រកាសមុនបិទសវនាការថា ការប្រកាសសាលក្រមនឹងធ្វើនៅថ្ងែទី៨ ខែសីហា៕
