ភ្នំពេញ ប៉ុស្តិ៍
មន្រ្តីក្រសួងអប់រំបាននិយាយកាលពីម្សិលមិញថា ក្រសួងបានចេញលិខិតមួយទៅឲ្យសាលាបឋមសិក្សា និងមត្តេយ្យទាំងអស់ក្នុងប្រទេសកម្ពុជាឲ្យបិទទ្វារបន្ទាប់ពី ពួកគេទទួលបានរបាយការណ៍ និងស្ថិតិនៃការស្លាប់កុមារដោយសារជំងឺ EV71 ពីក្រសួងសុខាភិបាល និងប្រព័ន្ធផ្សព្វផ្សាយ។
លោក ប៉ែន សារឿន ប្រធាននាយកដ្ឋានសុខភាពសម្រាប់សាលារៀននៃក្រសួងអប់រំយុវជននិងកីឡា បានថ្លែងកាលពីម្សិលមិញថា បន្ទាប់ពីពួកគេបានឃើញរបាយការណ៍អំពីជំងឺនោះ និងរបាយការណ៍ពីក្រសួងសុខាភិបាល ពួកគេមានការបារម្ភអំពីសុខភាពកុមារនៅតាមសាលា ហើយនេះជាមូលហេតុដែលពួកគេត្រូវការបិទសាលាមុនវិស្សមកាល។
លោកបន្តថា៖ «បន្ទាប់ពីយើងទទួលបានព័ត៌មានតាមប្រព័ន្ធផ្សព្វផ្សាយ និងក្រសួងសុខាភិបាល និងគេហទំព័ររបស់អង្គការសុខភាពពិភពលោក (WHO) អំពីជំងឺ EV-71 និងទទួលព័ត៌មានផងដែរពីគ្រូនៅបណ្តាខេត្តនានា ដែលបារម្ភអំពីជំងឺនេះ យើងបានសម្រេចចិត្តបញ្ជូនរបាយការណ៍នោះ និងក្តីបារម្ភទៅលោកនាយករដ្ឋមន្រ្តីដើម្បីស្នើសុំអនុសាសន៍ អំពីករណីនេះ»។
លោក ប៉ែន សារឿន និយាយថា រដ្ឋមន្រ្តីក្រសួងអប់រំបានដាក់សំណើនោះទៅលោកនាយករដ្ឋមន្រ្តី ហ៊ុន សែន ជាមួយរបាយការណ៍ ហើយបន្ទាប់មកលោកនាយករដ្ឋមន្រ្តី ហ៊ុន សែន បានចារមកវិញអនុញ្ញាតឲ្យសិស្សសាលាទាំងនោះឈប់មុន វិស្សមកាល ដោយសារវិស្សមកាលរបស់ពួកគេក៏ជិតមកដល់ដែរ។
លោក សារឿន បន្តទៀតថា៖ «យើងមិនបានជួបផ្ទាល់ទល់មុខជាមួយមន្រ្តីក្រសួងសុខាភិបាល និងមន្រ្តីអង្គការសុខភាពពិភពលោកទេ ប៉ុន្តែយើងបានទទួលរបាយការណ៍នោះពីក្រសួងសុខាភិបាល អង្គការសុខភាពពិភពលោក និងសាលាមួយចំនួនតាមបណ្តាខេត្តនានាអំពីជំងឺនេះ នោះហើយជាហេតុផលដែលរដ្ឋមន្រ្តីក្រសួងអប់រំបានសម្រេច បញ្ជូនរបស់របាយការណ៍នោះទៅលោកនាយករដ្ឋមន្រ្តី ហ៊ុន សែន ហើយលោកនាយករដ្ឋមន្រ្តី បានចារមកយើងវិញឯកភាពឲ្យបិទសាលានៅមុនវិស្សមកាល»។
ទន្ទឹមនេះ នៅស្រុកមង្គលបុរី ខេត្តបន្ទាយមានជ័យ ពាក្យចចាមអារ៉ាមថា ឲ្យយកភេសជ្ជៈប៉ូវកម្លាំងលាយជាមួយទឹកឃ្មុំដើម្បីចៀសពីជំងឺ EV-71 ដែលសម្លាប់កុមារនេះ។
លោក ស៊ី សាវី អធិការនគរបាលស្រុកមង្គលបុរី បានថ្លែងកាលពីម្សិលមិញថា លោកបានឮអំពីពាក្យចចាមអារ៉ាមនៃការយកភេសជ្ជៈប៉ូវកម្លាំងលាយ ជាមួយទឹកឃ្មុំដើម្បីចៀសពីជំងឺ EV-71 នេះ ហើយឥឡូវលោកកំពុងធ្វើការស្វែងរកអ្នកដែលបង្កឲ្យកើតពាក្យនេះ។
លោក ជីវ ឡា ដែលជាឪពុកមានកូនពីរនាក់ ដែលបានឲ្យកូនរបស់គាត់ផឹកភេសជ្ជៈបែបនេះ បានថ្លែងកាលពីម្សិលមិញថា ការរកស៊ីលក់ដូររបស់លោកមានភាពកាក់កបប្រសើរខ្លាំង ប៉ុន្មានថ្ងៃនេះ ដោយលក់ដាច់អស់នូវភេសជ្ជៈប៉ូវកម្លាំង។
លោកបន្តថា កន្លងមកមិនសូវមាននរណាមកទិញភេសជ្ជៈប៉ូវកម្លាំងរបស់លោកសោះ ប៉ុន្តែកាលពីដើមសប្តាហ៍នេះ លោកមានអ្នកទិញភេសជ្ជៈប៉ូវកម្លាំងច្រើនជាងសប្តាហ៍មុនៗ៕ PS
