ភ្នំពេញ ប៉ុស្តិ៍
ឧត្តរមានជ័យៈ ចំនួនភ្ញៀវជនជាតិថៃ ដែលបានចូលមកទស្សនាស្រុកអន្លង់វែង ក្នុងខេត្តឧត្តរមានជ័យក្នុងរយៈពេលប៉ុន្មានខែថ្មីៗនេះបាន កើនឡើងយ៉ាងខ្លាំង បន្ទាប់ពីការដាក់ឲ្យដំណើរការបណ្តោះអាសន្ននៃកាស៊ីណូ និង សណ្ឋាគារនៅជាប់ច្រកជាំ។ នេះបើតាមមន្ត្រីច្រកព្រំដែន។
លោក នេត្រ ដារ៉ា ប្រធានប៉ុស្តិ៍ត្រួតពិនិត្យច្រកជាំក្នុងស្រុកអន្លង់វែង បាននិយាយថា បន្ទាប់ពីកាស៊ីណូបើកដំណើរការបណ្តោះអាសន្នកាលពីខែកុម្ភៈ មក រហូតមកទល់ពេលនេះចំនួនភ្ញៀវថៃចូលមកកាន់កម្ពុជាមានច្រើន គួរឲ្យកត់សម្គាល់។ លោកបន្តថា ភ្ញៀវជនជាតិថៃជាមធ្យមពី៤០០ទៅ៥០០នាក់ក្នុងមួយថ្ងៃបានចូលមក លេងល្បែងនៅក្នុងកាស៊ីណូ កម្សាន្តនៅក្នុងទឹកដីកម្ពុជា តាមច្រកជាំនេះ ដោយកើនឡើងយ៉ាងច្រើនបើធៀបនឹងស្ថានភាពនៅមុនពេលមានការសាងសង់សណ្ឋាគារ និងកាស៊ីណូ។
លោកបន្ថែមថា មុនការបើកកាស៊ីណូ និងសណ្ឋាគារ ចំនួនភ្ញៀវទេសចរថៃដែលចូលមកកម្ពុជាមានប្រហែល១០០នាក់ប៉ុណ្ណោះ ក្នុងមួយថ្ងៃ។ លោកថ្លែងថា៖ «បើយើងធៀបកាលមិនទាន់មានកាស៊ីណូ ចំនួនអ្នកចូលមកតិចណាស់។ ភ្ញៀវចូលមកតែថ្ងៃព្រហស្បតិ៍និង ថ្ងៃអាទិត្យទេ ក្រៅពីនោះតិចតួចណាស់»។ លោកបន្ថែមថា ទីតាំងនោះនឹងកាន់តែទាក់ទាញការចាប់អារម្មណ៍ច្រើនទៀតពីសំណាក់ ភ្ញៀវក្នុងស្រុក និងភ្ញៀវថៃ។
លោក លឹម ហេង អ្នកវិនិយោគសម្រាប់ការសាងសង់កាស៊ីណូ និងសណ្ឋាគារកម្ពស់ជាង ១០ជាន់នៅជាប់ច្រកជាំ ដែលបានដាក់ដំណើរការបណ្តោះអាសន្នកាលពីខែមករាឆ្នាំ២០១២ ចំថ្ងៃចូលឆ្នាំចិននោះបានឲ្យដឹងថា អាជីវកម្មដំណើរការទៅមុខមានកម្រិត ព្រោះការសាងសង់សំណង់អគារនៅមិនទាន់ចប់។ លោកបន្តថា៖ «វាមិនទាន់ណាស់ណាទេ តែវាអាចដំណើរការខ្លះៗដែរ។ ភ្ញៀវមកពីថៃទាំងអស់»។
គម្រោងវិនិយោគកាស៊ីណូ និងសណ្ឋាគារក្នុងដំណាក់កាលដំបូង មានទឹកប្រាក់៥០លានដុល្លារ តែរហូតដល់ពេលនេះម្ចាស់គម្រោងវិនិយោគមិនទាន់បានបង្ហាញតួលេខ ផ្លូវការនៅឡើយទេ៕
