ភ្នំពេញ ប៉ុស្តិ៍
ក្រុងម៉ាទ្រីតៈ ក្រុមអាជ្ញាធរបាននិយាយកាលពីថ្ងៃអង្គារថា ភ្លើងឆេះព្រៃដ៏ធំពីរកន្លែង ដែលកំពុងឆេះពេញបន្ទុកនៅតំបន់ព្រំដែនរវាងប្រទេសបារាំង និងរដ្ឋកាតាឡូនី ភាគខាងជើងអេស្ប៉ាញ បានសម្លាប់មនុស្ស៤នាក់ ខណៈខ្យល់បក់ខុសប្រក្រតី បានរារាំងដល់កិច្ចប្រឹងប្រែងគ្រប់គ្រងអគ្គិភ័យនេះ។
ភ្លើងឆេះព្រៃដែលបានចាប់ផ្តើមកាលពីថ្ងៃអាទិត្យ ដោយកំពុងប៉ះពាល់តំបន់កូស្តា ប្រាវ៉ា ដែលជាគោលដៅឆ្នេរខ្សាច់ដ៏មានប្រជាប្រិយមួយរបស់ប្រទេសនេះ ក៏ដូចជាផ្លូវធំមួយដែលគេប្រើប្រាស់សម្រាប់អ្នកកម្សាន្តវិស្សមកាល បើកបរទៅ និងមកភាគខាងត្បូងបារាំង។ ផេះពីភ្លើងឆេះព្រៃនេះ ក៏ បានចាប់ផ្តើមហុយធ្លាក់ទៅដល់តំបន់បាសេឡោនដែរ។
ភ្លើងឆេះព្រៃនោះ ក៏បានឆេះនៅក្នុងតំបន់ច្រើនទៀត នៅភាគខាងត្បូងអឺរ៉ុបដែរ កាលពីមួយ-ពីរថ្ងៃកន្លងទៅនេះ។
កាលពីថ្ងៃចន្ទ ប្រទេសក្រូអាស៊ី បានជម្លៀសអ្នកទេសចរ នៅក្បែរ ភូមិឆ្នេរសមុទ្រមួយ ហើយផ្សែងដ៏ក្រាស់ បានបង្ខំឲ្យបិទផ្លូវធំដែល ភ្ជាប់ទៅតំបន់អាទ្រីយ៉ាទិក ភាគ ខាងជើងនិងកណ្តាល។ កាលពី សប្តាហ៍មុន អគ្គិភ័យបានវាយប្រហារព្រៃនៅក្បែរក្រុងអាថែនហើយ ក្រុមអ្នកភូមិត្រូវគេជម្លៀសចេញពីលំនៅដ្ឋាននៅលើជ្រោយម៉ាដេរ៉ា នៃ ប្រទសព័រទុយហ្គាល់។
រដ្ឋការក្នុងតំបន់បាននិយាយថា អគ្គិភ័យនៅខេត្តជីរ៉ូណា និងកាតាឡូនី របស់អេស្ប៉ាញនេះគឺជាការបំផ្លិចបំផ្លាញបំផុត ក្នុងរយៈពេល២០ឆ្នាំនេះ ហើយទិន្នន័យបរិស្ថាន បង្ហាញថាឆ្នាំ២០១២ គឺជាឆ្នាំអាក្រក់បំផុតសម្រាប់ភ្លើងឆេះព្រៃនៅអេស្ប៉ាញក្នុងរយៈពេលជាងមួយទសវត្សរ៍នេះ។
រដ្ឋការខេត្តកាតាឡូនីនិងសេវាកម្មអគ្គិភ័យបាននិយាយថា ជនរងគ្រោះទាំង៤នាក់នោះ ជាជនជាតិបារាំង។ ជនរងគ្រោះទី៤ គឺជា បុរស វ័យ៦៤ឆ្នាំ ដែលបានស្លាប់ ដោយភ្លើងឆេះកាលពីថ្ងៃចន្ទ។
កាលពីថ្ងៃអាទិត្យ ឪពុកនិងកូនស្រីអាយុ១៥ឆ្នាំ បានស្លាប់បន្ទាប់ពីព្យាយាមរត់គេចពីអណ្តាតភ្លើង ដោយចុះតាមច្រាំងជ្រោះនៅទី ប្រជុំជនផតប៊ូ ឆ្នេរសមុទ្រដែលភ្លើង បានឆេះ។ បុរសម្នាក់ បានស្លាប់ ដោយសារគាំងបេះដូងនៅក្នុងទីប្រជុំជនព្រំដែន La Junquera នៅ ឯចំណុចកណ្តាលនៃភ្លើងឆេះព្រៃដ៏ធំបំផុតនោះ៕ IN
