ភ្នំពេញ ប៉ុស្តិ៍
ភ្នំពេញៈ សំណង់សម័យអាណានិគមនៅក្នុងសង្កាត់ស្វាយប៉ោ ក្រុងបាត់ដំបង កំពុងត្រូវបានគេរៀបចំអភិរក្ស ក្នុងគោលបំណងដាក់សង្កាត់មួយនេះឲ្យក្លាយទៅជាសង្កាត់បេតិកភណ្ឌ ដើម្បីទាក់ទាញការវិនិយោគ និងភ្ញៀវទេសចរឲ្យធ្វើដំណើរមកកាន់តំបន់នេះកាន់តែច្រើនថែមទៀត។
លោក អើម សុខុន អភិបាលក្រុងបាត់ដំបង បានថ្លែងថា ទីក្រុងបាត់ដំបង មានសង្កាត់ចំនួន១០ ដោយក្នុងចំណោមសង្កាត់ទាំងនោះ យើងបានសម្រេចជ្រើសរើសយកសង្កាត់ស្វាយប៉ោ ជាតំបន់អភិរក្សផ្ទះសល់ពីសម័យអាណានិគម ព្រោះសង្កាត់នេះមាននៅផ្ទះសល់ពីសម័យនោះយ៉ាងច្រើន។ លោកបន្តថា ផ្ទះសម័យអាណានិគម ក្នុងសង្កាត់នេះនៅសល់ប្រមាណពី៧០០ ទៅ៨០០ខ្នងផ្ទះ។
លោក សុខុន បាននិយាយថា៖«ក្រុមការងារជំនាញ បានរៀបចំប្លង់គោលរួចហើយ ដើម្បីអភិរក្សសំណង់ទាំងនោះ ហើយបើប្រជាជនត្រូវការជួសជុល ឬវាយចោលធ្វើថ្មី ត្រូវរក្សារចនាប័ទ្មចាស់»។
លោកប្រាប់ថា អង្គការ GIZ បានជួយលើការងារបណ្តុះបណ្តាលធនធានមនុស្ស និងថវិកាមួយចំនួនសម្រាប់ការស្រាវជ្រាវពីការងារអភិរក្សសំណង់ បុរាណនេះ។
លោក ងួន រតនៈ ប្រធានមន្ទីររៀបចំដែនដី នគរូបនីយកម្ម និងសំណង់ បានប្រាប់ថា ទីក្រុងបាត់ដំបងជាទីក្រុងចាស់ មាននៅសល់សំណង់ពីសម័យអាណានិគមនិយមបារាំងជាច្រើន ដែលកំពុងរៀបចំអភិរក្ស ហើយក្រុមការងារប្លង់គោលរបស់ក្រុងជាអ្នករៀបចំចុះបញ្ជី ដោយចែកចេញលំនៅដ្ឋានទាំងនោះជាបីប្រភេទ គឺទី១ ជាប្រភេទហាមមិនឲ្យជួសជុល ទី២អគារអនុញ្ញាតឲ្យជួសជុលបានខ្លះ និងទី៣ ជាអគារអាចវាយចោលនិងសង់ថ្មីបានដោយសំណង់ត្រូវនៅរក្សារចនាប័ទ្ម ដើម។
លោកលើកឡើងថា៖«ទោះបីជាយ៉ាងណារហូតមកដល់ពេលនេះយើងមិនទាន់ មានអនុក្រឹត្យដើម្បីគ្រប់គ្រងការងារអភិរក្សសំណង់បុរាណទាំងនេះ ឲ្យមានប្រសិទ្ធភាពទេ។ ការងារនេះទាមទារឲ្យមានអនុក្រឹត្យច្បាស់លាស់ដើម្បីធ្វើឲ្យនីតិវិធីនៃការគ្រប់គ្រងមានប្រសិទ្ធភាព»។
លោក បេង ហុងសុជាតិខេមរ៉ូ អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ ដែលធ្លាប់បានដឹកនាំក្រុមនិស្សិតចុះសិក្សាពីសំណង់បុរាណទាំងនោះ មានប្រសាសន៍ថា លោកបានធ្វើការសិក្សាជាជំហានដំបូង ពាក់ព័ន្ធនឹងការងារអភិរក្សសំណង់បុរាណនៅទីក្រុងនេះរួចមកហើយ តែទោះបីជាយ៉ាងណារហូតមកដល់ពេលនេះ យើងមិនទាន់មានក្របខ័ណ្ឌគតិយុត្តិ ដើម្បីធ្វើយ៉ាងណាឲ្យដំណើរការអភិរក្ស សំណង់សម័យបុរាណទាំងនោះមានប្រសិទ្ធភាពនៅឡើយទេ។
លោកប្រាប់ថា៖«លោកអភិបាលខេត្តគាំទ្រការងារនេះណាស់ លោកចង់ឲ្យការគ្រប់គ្រង សំណង់បុរាណឲ្យមានប្រសិទ្ធភាព ដើម្បីទាក់ទាញវិនិយោគិន និងអ្នកទេសចរចូលមកដាក់ទុនវិនិយោគ និងទស្សនាតំបន់នេះ»។
ទីក្រុងបាត់ដំបង ជាទីក្រុងធំមួយបន្ទាប់ពីរាជធានីភ្នំពេញ ដោយមានសង្កាត់ចំនួន១០ និងភូមិចំនួន៦២ជាចំណុះ ហើយមានប្រជាជនរស់នៅជាង១៤ម៉ឺននាក់។
លោក អ៊ុក គីម ចៅសង្កាត់ស្វាយប៉ោ ក្រុងបាត់ដំបង ជាទីដែលមានផ្ទះសល់ពីសម័យអាណានិគមបារាំងច្រើន បានប្រាប់ថា លោកមិនទាន់បានចុះស្រង់ស្ថិតិចំនួនផ្ទះសម័យអាណានិគមនិយមបារាំង សល់ប៉ុន្មានពិតប្រាកដនោះទេ ដោយលោកគ្រាន់តែដឹងថា ផ្ទះសល់ពីសម័យអាណានិគមសល់នៅតាមបណ្តោយផ្លូវចំនួន៥ គឺផ្លូវលេខ១ ផ្លូវលេខ១កន្លះ ផ្លូវលេខ២ ផ្លូវលេខ២កន្លះ និងផ្លូវលេខ៣។ លោកបន្តថា លោកនឹងឲ្យមន្រ្តីចុះស្រង់បញ្ជីចំនួនផ្ទះសម័យអាណានិគមដែលនៅសល់ តែទោះបីជាយ៉ាងណាលោកមិនបានបញ្ជាក់ពីពេលវេលាជាក់លាក់ ដែលត្រូវចុះធ្វើការងារនេះទេ។
លោក ប្រាជ្ញ ច័ន្ទ អភិបាលខេត្តបាត់ដំបង មានប្រសាសន៍ថា ខេត្តមិនមានថវិកាសម្រាប់ការងារនេះទេ ប៉ុន្តែយើងបានកំណត់តំបន់ដែលត្រូវអភិរក្សរួចហើយ ដោយមិនអនុញ្ញាតឲ្យប្រជាជនជួសជុលធ្វើថ្មីក្នុងរចនាប័ទ្មថ្មីទេ គឺបើពួកគាត់ចង់ជួសជុល ឬធ្វើថ្មីត្រូវតែរក្សារចនាប័ទ្មដើម ដើម្បីយើងចូលរួមរក្សាទុកស្នាដៃស្ថាបត្យករពីសម័យដើមឲ្យបានគង់ វង្ស។
លោកថ្លែងថា៖«ការរក្សាអត្តសញ្ញាណដើមនេះ ពិតជាមានផលប្រយោជន៍ច្រើន ដើម្បីទាក់ទាញភ្ញៀវទេសចរមកទស្សនា ក៏ដូចជាចង់រក្សា និងឲ្យតម្លៃវិស័យស្ថាបត្យកម្មបុរាណរបស់យើងផងដែរ»៕
