ភ្នំពេញ ប៉ុស្តិ៍
ភ្នំពេញ: ទឹកប្រាក់នៃការប្រើប្រាស់សេវាកម្មធានារ៉ាប់រងលើវិស័យអចលនទ្រព្យ នៅកម្ពុជាបានកើនឡើងសរុបចំនួន៣២ភាគរយនៅរយៈពេល៥ខែដំបូងឆ្នាំ នេះ បើធៀបនឹងរយៈពេលដូចគ្នាកាលពីឆ្នាំ២០១១។ នេះបើតាមទិន្នន័យដែលប៉ុស្តិ៍ អចលនទ្រព្យទើបទទួលបានពីសមាគមធានារ៉ាប់រងកម្ពុជាកាលដើមសប្តាហ៍ នេះ។
លោក ទី អាទិត្យ ជំនួយការអគ្គនាយកសមាគមធានារ៉ាប់រងកម្ពុជា បានប្រាប់ឲ្យដឹងថា ចំនួនទឹកប្រាក់ដែលអតិថិជនបង់ ថ្លៃសេវាកម្មធានារ៉ាប់រងលើអចលនទ្រព្យទូទាំងប្រទេសក្នុងរយៈពេល៥ខែ ដើមឆ្នាំនេះមានចំនួន៤លានដុល្លារអាមេរិក ពោលគឺកើនឡើង៣៣ភាគរយ បើធៀបនឹងរយៈពេលដូចគ្នាឆ្នាំ២០១១ ដែលមានចំនួន៣លានដុល្លារអាមេរិក។
លោកបានប្រាប់ទៀតថា ដោយសារមានផលប៉ះពាល់ ដែលបណ្តាលមកពីគ្រោះអគ្គិភ័យទៅលើរោងចក្រ និងលំនៅដ្ឋានក៏ជំរុញឲ្យសេវាកម្មធានារ៉ាប់រងលើអចលនទ្រព្យកើនឡើង បែបនេះ។ លោកបន្ថែមថា កំណើនសេដ្ឋកិច្ច និងគម្រោងវិនិយោគវិស័យសំណង់ក្នុងប្រទេសបានកើនឡើងច្រើនជាបន្ត បន្ទាប់ ដែលធ្វើឲ្យចំនួននៃតម្រូវការប្រើប្រាស់សេវាកម្មធានារ៉ាប់រង កើនឡើង ហើយចំនួនទឹកប្រាក់ក៏កើនឡើងផងដែរ។
លោក យក់ ចំរើនប្ញទ្ធិ នាយកប្រតិបត្តិក្រុមហ៊ុន FORTE បាននិយាយថា បច្ចុប្បន្នសេវាកម្មធានារ៉ាប់រងលើវិស័យអចលនទ្រព្យគេសង្កេតឃើញថា មានតម្រូវការកើនឡើងជាបន្តបន្ទាប់រៀងរាល់ឆ្នាំ ខណៈដែលប្រជាជនខ្មែរចាប់ផ្តើមយល់ដឹងកាន់តែទូលំទូលាយ ពីសារប្រយោជន៍នៃការទិញសេវាកម្មធានារ៉ាប់រង។ លោកបន្តថា ប្រសិនបើអ្នកខ្ចីប្រាក់ពីធនាគារកើនច្រើននោះវានឹងធ្វើឲ្យ កំណើននោះកើនឡើងដែរ។
នាយកប្រតិបត្តិក្រុមហ៊ុន FORTE រូបនេះបានប្រាប់ឲ្យដឹងទៀតថា សេវាធានារ៉ាប់រងលើអចលនទ្រព្យមានដូចជាសំណង់អគារខ្ពស់ៗ សំណង់លំនៅដ្ឋាន ភោជនីយដ្ឋាន រោងចក្រ សណ្ឋាគារ និងស្ថានីយប្រេងឥន្ធនៈ។ លោកបន្តថា គ្រប់ផ្នែកនៃសេវាកម្មធានារ៉ាប់រងបានកើនឡើងទន្ទឹមគ្នាទៅនឹង កំណើននៃវិស័យសេដ្ឋកិច្ច សំណង់ កសិកម្ម ឧស្សាហកម្មកាត់ដេរ ទេសចរណ៍ និងវិស័យធនាគារ។ លោកបានបញ្ជាក់ថា៖«មិនថាសេវាធានារ៉ាប់រងទេ គ្រប់វិស័យទាំងអស់គឺកើនឡើងដូចៗគ្នា»។
លោក ចំរើនប្ញទ្ធិ បានថ្លែងឲ្យដឹងទៀតថា និយាយជារួមពលរដ្ឋខ្មែរមានការយល់ដឹងច្រើនពីផលប្រយោជន៍នៃការ ទិញធានារ៉ាប់រង និងមិនទិញធានារ៉ាប់រង។ លោកបញ្ជាក់ថា៖«កំណើនអ្នកទិញធានារ៉ាប់រងនៅក្នុងរយៈពេល៥ខែ ឆ្នាំ២០១២នេះ បានកើន៣០ភាគរយ បើធៀបរយៈពេលដូចគ្នាកាលពីឆ្នាំមុន»។ លោកបន្តថា នៅរយៈពេលពីរទៅបីឆ្នាំជាប់ៗគ្នានេះអចលនទ្រព្យប្រទេសកម្ពុជា បានទទួលរងផលប៉ះពាល់យ៉ាងខ្លាំងពីគ្រោះអគ្គិភ័យ និងគ្រោះធម្មជាតិ។
លោក ឆេង គឹមឡុង សាស្រ្តាចារ្យផ្នែកជំនួញ និងសេដ្ឋកិច្ច នៅសាកលវិទ្យាល័យកម្ពុជា ធ្លាប់មានប្រសាសន៍ថា សេវាកម្មធានារ៉ាប់រងលំនៅដ្ឋានដ្បិតតែមិនទាន់រីកចម្រើនខ្លាំងក៏ ពិតមែន ប៉ុន្តែវាផ្តល់អត្ថប្រយោជន៍យ៉ាងច្រើនចំពោះសេដ្ឋកិច្ចដូចជា បញ្ហាអគ្គិភ័យ គ្រោះធម្មជាតិ ទឹកជំនន់ ខ្យល់ព្យុះ និងអាចជួយរំងាប់អារម្មណ៍ដល់ការរស់នៅរបស់ប្រជាពលរដ្ឋផងដែរ។
លោកបានលើកឡើងថា សេវាកម្មធានារ៉ាប់រង ក៏ជាការជួយរក្សាឲ្យមានការវិនិយោគនៅប្រទេសកម្ពុជា និងក៏ជាការទាញយក ប្រាក់ចំណូលចូលរដ្ឋតាមរយៈការកាត់ពន្ធលើប្រាក់ចំណេញពី ក្រុមហ៊ុននានាដែលមានអាជីវកម្មលើវិស័យធានារ៉ាប់រងនេះ។ មិនតែប៉ុណ្ណោះវិស័យមួយនេះថែមទាំងជួយឲ្យប្រជាជនខ្មែរយើងមាន ការងារធ្វើកាន់តែច្រើនផងដែរ ៕
