ភ្នំពេញ ប៉ុស្តិ៍
ភ្នំពេញៈ មន្ត្រីសេដ្ឋកិច្ចជាន់ខ្ពស់របស់កម្ពុជាបានជំរុញឲ្យថៃវិនិយោគលើ វិស័យកែច្នៃអង្ករ និងទេសចរណ៍ នៅកម្ពុជាឲ្យបានច្រើន ដើម្បីលើកកម្ពស់ការវិនិយោគរបស់ថៃមកកម្ពុជា បន្ទាប់ពីការវិនិយោគរវាងប្រទេសទាំងពីរ បានធ្លាក់ចុះចាប់តាំងពីប្រទេសទាំងពីរមានជម្លោះព្រំដែននឹងគ្នាមក។
ថ្លែងទៅកាន់គណៈប្រតិភូថៃ ដែលមានគ្នាចំនួន៣០នាក់មកពីក្រសួងចម្រុះ ដឹកនាំដោយលោកស្រី Hirunya Suchinai អ្នកផ្តល់ប្រឹក្សាវិនិយោគជាន់ខ្ពស់របស់ក្រុមប្រឹក្សាវិនិយោគថៃ លោក គង់ វិបុល រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុនិងជាអនុប្រធានក្រុមប្រឹក្សាអភិវឌ្ឍន៍កម្ពុជា(CDC) បានបញ្ជាក់ថា រដ្ឋាភិបាលកម្ពុជា កំពុងលើកកម្ពស់ និងបើកការវិនិយោគសម្រាប់ក្រុមហ៊ុនបរទេសនៅក្នុងវិស័យដែលជា អាទិភាព។
លោកបានលើកឡើងថា៖ «ថៃមានបទពិសោធច្រើនក្នុងវិស័យកសិកម្ម និងឧស្សាហកម្មទេសចរណ៍។ ខ្ញុំគិតថា ពួកគេគួរតែមកបណ្តាក់ទុននៅកម្ពុជា ដោយយើងមានសក្តានុពលធំធេង»។ លោកបានចង្អុលបង្ហាញអំពីគោលនយោបាយរបស់រដ្ឋាភិបាល ក្នុងការនាំអង្ករចេញឲ្យបាន ១លានតោន នៅត្រឹម២០១៥។ លោកស្រី Hirunya Suchinai បានឲ្យដឹងថា ក្រុមនេះកំពុងមកស្វែងរកព័ត៌មានដើម្បីប្រាប់វិនិយោគិនរបស់ ខ្លួនពីការសម្រេចចិត្តមកបណ្តាក់ទុននៅទីនេះ។
លោកស្រីបានបញ្ជាក់ថា នាយកដ្ឋាននេះជាកន្លែងលើកទឹកចិត្តវិនិយោគិនថៃ ឲ្យបណ្តាក់ទុននៅក្រៅប្រទេស។ លោកស្រីបន្តថា៖ «វត្ថុបំណងរបស់យើង មកថ្ងៃនេះ គឺដោយសារយើងចង់ដឹងកាន់តែច្រើនអំពីគោលនយោបាយវិនិយោគរបស់ កម្ពុជា»។
ទិន្នន័យពី CDC បានបង្ហាញថា ការវិនិយោគសរុបរបស់ថៃក្នុងឆ្នាំ២០១១ ដែលត្រូវបានអនុម័តដោយCDC មានចំនួន៧៤៥លានដុល្លារ បើធៀបនឹងឆ្នាំ២០១០ ដែលមានតែ២លានដុល្លារប៉ុណ្ណោះ។
ទិន្នន័យពីក្រសួងទេសចរណ៍បានបង្ហាញថា ភ្ញៀវទេសចរមកពីថៃ បានកើនឡើង៨៨,៨ភាគរយដល់ ៧៨ ១៥៦នាក់ក្នុងរយៈពេល៥ខែ ឆ្នាំនេះ បើធៀបរយៈពេលដូចគ្នាកាលពីឆ្នាំទៅដែលតែ ៤១ ៣៨៧នាក់ប៉ុណ្ណោះ។
លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មបានឲ្យដឹងថា ថ្មីៗនេះកម្ពុជា បានរួចពន្ធ និងទទួលបានកូតាពីទីផ្សារអឺរ៉ុប ខណៈដែលថៃ និងវៀតណាម មិនបានទទួលនោះ។
លោកបន្តថា៖ «បើពួកគេមកផលិតទំនិញទីនេះសម្រាប់នាំចេញទៅអឺរ៉ុប គឺមិនចាំបាច់បង់ពន្ធឡើយ។ ប៉ុន្តែ ប្រសិនបើថៃនាំចេញទៅអឺរ៉ុប ពួកគេត្រូវចំណាយ២៥០ដុល្លារអាមេរិកក្នុងមួយតោន សម្រាប់អង្ករក្រអូប»។
លោក គង់ វិបុល បានឲ្យដឹងថា ការវិនិយោគពីថៃ ស្ថិតនៅលំដាប់ទីមួយ ក្នុងចំណោមប្រទេសផ្សេងៗទៀត កាលពីប៉ុន្មានឆ្នាំមុន ប៉ុន្តែឥឡូវចិន និងវៀតណាម បាននាំមុខប្រទេសនេះ។
លោកសង្ឃឹមថា ក្រុមនេះនឹងជួយបង្កើនការវិនិយោគរបស់ថៃ មកកាន់កម្ពុជា។ លោកឲ្យដឹងថា កម្ពុជា ថៃ បានចុះហត្ថលេខាលើកិច្ចព្រមព្រៀងការពារវិនិយោគិន ចាប់តាំងពីឆ្នាំ២០០៥មក៕
