ភ្នំពេញ ប៉ុស្តិ៍
នៅថ្ងៃទី៦-៨ ខែសីហា ខាងមុខនេះ ជាថ្ងៃដែលសិស្សថ្នាក់ទី១២ប្រឡងសញ្ញាបត្រទុតិយភូមិ។ ដូច្នេះ អ្នកគ្រូ សួស ស៊ីណាន ដែលជាគូ្របង្រៀនផ្នែករូបវិទ្យានៅវិទ្យាល័យព្រះមុនីវង្ស ខេត្តបាត់ដំបង បានផ្តល់ដំបូន្មានថា៖មុនពេលប្រឡង សិស្សទាំងអស់គួរតែហាត់ធ្វើលំហាត់ជារៀងរាល់ថ្ងៃរហូតដល់ ពេលប្រឡង។ សូមរៀនជាក្រុម រៀនជាមួយគ្រូ និងស្វ័យសិក្សា។ ការសិក្សាខ្លួនឯង នឹងធ្វើឲ្យយើងទទួលបានជោគជ័យក្នុងការប្រឡង។ ជាពិសេស សិស្សត្រៀមប្រឡងគួរតែរៀបចំសំណៅឯកសារផ្ទាល់ខ្លួនមួយចំនួន និងឧបករណ៍សិក្សាសម្រាប់ចូលប្រឡង។ ក្រៅពីខិតខំសិក្សា សិស្សគួរតែថែរក្សាសុខភាពឲ្យបានល្អ កុំឲ្យធ្លាក់ខ្លួនឈឺ។
ជាងនេះទៅទៀត សិស្សគួរតែមកដល់មណ្ឌលប្រឡងឲ្យបានមុនពេលចាប់ផ្ដើមបន្លឺសូរ ជួង ឬកណ្ដឹងរោទ៍ដើម្បីរៀបចំខ្លួនជាស្រេចដែលមិនប្រញាប់ប្រញាល់។ អ្នកគ្រូ ស៊ីណាន បានបញ្ជាក់ថា៖ «សូមកុំភ័យឲ្យសោះ សូមព្យាយាមធ្វើឲ្យមានទំនុកចិត្ត»។
យ៉ាងណាមិញ នៅពេលប្រឡង សិស្សត្រូវបំពេញឈ្មោះ លេខតុ លេខបន្ទប់ និងមណ្ឌលប្រឡង ហើយបន្ទាប់មកសូមគូសខ្វែងពីខាងក្រោយនៃក្បាលទំព័រ។ បន្ទាប់មក សូមអានការណែនាំឲ្យបានច្បាស់លាស់ ចៀសវាងការយល់ច្រឡំមុននឹងធ្វើវា។ អ្វីដែលសំខាន់នោះ សិស្សគួរតែឆ្លើយនឹងសំណួរណាដែលពួកគេអាចធ្វើបានជាមុនសិន បើមិនដូច្នោះទេ ពួកគេនឹងជាប់គាំងនឹងសំណួរពិបាកៗជាក់ជាមិនខាន ដែលវាជាហេតុធ្វើឲ្យខាតពេលវេលា និងខាតពិន្ទុ។ ជាចុងក្រោយ សិស្សគួរតែធ្វើលំហាត់ ឬសំណួរណាដែលមានពិន្ទុទាបមុន ជាជាងសំណួរដែលមានពិន្ទុខ្ពស់ដើម្បីសន្សំពិន្ទុ៕
