ភ្នំពេញ ប៉ុស្តិ៍
ភ្នំពេញៈ ក្រុមកីឡាបាល់ទះបញ្ជាការដ្ឋានអង្គរក្ស កងពលធំអន្តរាគមន៍លេខ៣ ក្រសួងមហាផ្ទៃ និងក្រុមសាលាខេត្តកំពង់ចាម សុទ្ធតែបានបង្ហាញភាពខ្លាំងរៀងៗខ្លួន ដើម្បីបន្តដំណើរឡើងទៅកាន់វគ្គ១/២ផ្តាច់ព្រ័ត្រ នាកម្មវិធីប្រកួតកីឡាបាល់ទះដណ្តើមពានរង្វាន់លីអូប្រចាំឆ្នាំ ២០១២ បន្ទាប់ពីពួកគេបានទទួលជ័យជម្នះរៀងៗខ្លួន កាលពីថ្ងៃម្សិលមិញ។
ឆ្លងកាត់ការប្រកួតក្នុងទីលាន Beeline Arena ក្រុមចំណាត់ថ្នាក់លេខ១ពូល A បញ្ជាការដ្ឋានអង្គរក្ស បានយកឈ្នះលើក្រុមចំណាត់ថ្នាក់លេខ២ពូលC នាគសមុទ្របញ្ជាការដ្ឋានជើងទឹក ក្នុងលទ្ធផល ៣-២ ប៉ុន្តែការឈ្នះលើកនេះបានធ្វើឲ្យពួកគេមើលឃើញកាន់តែច្បាស់ពី ចន្លោះប្រហោងរបស់ខ្លួន។
បន្ទាប់ពីឈ្នះគ្រាប់បាល់ ២៥-១៧ ២៥-១១ នាការប្រកួត២សិតដំបូង បញ្ជាការដ្ឋានអង្គរក្ស ហាក់បង្ហាញនូវទម្រង់លេងបែបមិនសូវយល់ចិត្តគ្នា ហើយកត្តានាំឲ្យក្រុមនាគសមុទ្របញ្ជាការដ្ឋានជើងទឹក បានធ្វើការវាយបក២សិតវិញភ្លាមៗ ជាមួយគ្រាប់បាល់ ២៥-១៥ និង ២៥-២២។ ប៉ុន្តែភាពរីករាយវិលត្រឡប់មកវិញខណៈពួកគេបានប្រមូលស្មារតីលេង ដោយភាពជឿជាក់យកឈ្នះលើក្រុមនាគសមុទ្របញ្ជាការដ្ឋានជើងទឹក ក្នុងសិតទី៥កាត់សេចក្តីក្នុងលទ្ធផល១៥-៧ នោះ។
ផ្ទុយស្រឡះពីនេះ ក្រុមចំណាត់ថ្នាក់លេខ១ពូល B កងពលធំអន្តរាគមន៍លេខ៣ មិនបានបង្ហាញនូវភាពទន់ជ្រាយឡើយ។ ក្នុងការប្រឈមមុខជាមួយក្រុមលេខ២ ពូល D សាកលវិទ្យាល័យចេនឡា ពួកគេបានបំបាក់ក្រុមនិស្សិតមួយនេះ ៣សិតដាច់តែម្តង ជាមួយគ្រាប់បាល់ ២៥-២២ ២៦-២៤ និង ២៥-១៧។ ជ័យជម្នះនេះបានធ្វើឲ្យក្រុមទាហានមកពីខេត្តព្រះវិហារ ឡើងទៅជួបក្រុមខ្លាំងបញ្ជាការដ្ឋានអង្គរក្ស នៅវគ្គ១/២ផ្តាច់ព្រ័ត្រ នៅវេលាម៉ោង២រសៀលថ្ងៃសុក្រនេះ។
ដូចគ្នានេះដែរ ក្រុមចំណាត់ថ្នាក់ពូលC ក្រសួងមហាផ្ទៃ នៅតែរក្សាទម្រង់លេងបានយ៉ាងល្អ ហើយការជួបក្រុមលេខ២ ពូល A កងរាជអាវុធហត្ថលើផ្ទៃប្រទេស កាលពីម្សិលមិញនេះ ពួកគេបានលត់គូប្រកួតរបស់ខ្លួន៣សិតដាច់តែម្តង ជាមួយគ្រាប់បាល់ ២៥-៨ ២៥-១៥ និង ២៥-១៥។
ក្រុមលេខ១ពូល D សាលាខេត្តកំពង់ចាម បានធ្វើការប្រកួតយ៉ាងស្វិតស្វាញជាមួយក្រុមលេខ២ពូល B កងពលតូចលេខ៣១ នាល្ងាចម្សិលមិញនេះ ហើយជាលទ្ធផល ខេត្តកំពង់ចាមបានយកឈ្នះក្នុងលទ្ធផល៣-២ ជាមួយគ្រាប់បាល់ ២៥-១៩ ២៣-២៥ ១៦-២៥ ២៥-១៦ និង ១៥-១៣។ ជ័យជម្នះដ៏លំបាកនេះ បានធ្វើឲ្យពួកគេឡើងទៅជួបក្រសួងមហាផ្ទៃ នៅវគ្គ១/២ផ្តាច់ព្រ័ត្រ នៅល្ងាចម៉ោង៤ថ្ងៃសុក្រនេះ៕