ភ្នំពេញ ប៉ុស្តិ៍
ក្រុងសេអ៊ូលៈ ប្រព័ន្ធព័ត៌មានរដ្ឋរបស់កូរ៉េខាងជើង បានរាយការណ៍កាលពីថ្ងៃអង្គារថា មេដឹកនាំ កូរ៉េខាងជើង លោក គីម ជុងអ៊ុន បានអញ្ជើញត្រួតពិនិត្យកងឯកភាពយោធាមួយ ខណៈកូរ៉េខាងត្បូង កំពុងរៀបចំការធ្វើសមយុទ្ធ យោធារួមប្រចាំឆ្នាំរបស់ខ្លួនជាមួយអាមេរិក ដែលកូរ៉េខាងជើងនិយាយថា ដើម្បីឈ្លានពានខ្លួន។
ទីភ្នាក់សារព័ត៌មានមជ្ឈិមកូរ៉េ(KCNA) បាននិយាយនៅក្នុងប្រព័ន្ធបញ្ជូនសារជាភាសាអង់គ្លេសនេះថា៖ «មេបញ្ជាការកំពូលរបស់កងទ័ពប្រជាជនកូរ៉េ លោកគីម ជុងអ៊ុនបានអញ្ជើញត្រួតពិនិត្យ កងឯកភាពរងក្រោមកងឯកភាព 552 នៃកងទ័ពប្រជាជនកូរ៉េ»។
ទស្សនកិច្ចត្រួតពិនិត្យថ្មីបំផុតដែលបានកើតឡើងពីរបន្ទាប់ពីអធិ ការកិច្ចយោធាដូចគ្នានេះរបស់ លោកគីមកាលពីខែឧសភា ទំនង ជាត្រូវធ្វើឡើងជាការឆ្លើយតបទៅ នឹងសមយុទ្ធគាំពារសេរីភាពអ៊ូល ជី របស់ទាហានកូរ៉េខាងជើង-អា មេរិក ដែលគេគ្រោងធ្វើពីថ្ងៃទី២០-៣១ សីហា។
កូរ៉េខាងជើង ប្រឆាំងនឹងសមយុទ្ធរួមទាំងនេះជាយូរមកហើយ ដោយអះអាងថា សមយុទ្ធទាំងនេះវាស្មើនឹងការហ្វឹកហ្វឺនសម្រាប់ការឈ្លានពានរដ្ឋ កុម្មុយនីស្តនេះ។ កាលពីថ្ងៃចន្ទពួកគេបានវាយប្រហារអាមេរិកនិងកូរ៉េខាងត្បូង ជុំវិញសមយុទ្ធនេះ ដែលគេនិយាយ ថាជាការហាត់សមដើម្បីសង្គ្រាមយ៉ាងពេញបន្ទុក ដែលអាចបញ្ឆេះជម្លោះនៅលើឧបទ្វីបកូរ៉េ។
កាសែត Rodong Sinmun ដែលជាប្រអប់មាត់របស់បក្សពលករ ក៏បាននិយាយថា សមយុទ្ធនេះ បានបង្ហាញនូវអាកប្បកិរិយាអរិភាពរបស់ក្រុងវ៉ាស៊ីនតោន។ បទ អត្ថាធិប្បាយរបស់ KCNA ដែលទីភ្នាក់ងារយ៉ុនហាប់បានដកស្រង់ បាននិយាយថា៖ «នេះ គឺជាការបង្ហាញគោលនយោបាយអរិភាពរបស់គេចំពោះកូរ៉េខាងជើង និងជា ទង្វើគ្រោះថ្នាក់មួយដើម្បីបញ្ឆេះសង្គ្រាមថ្មីមួយលើឧបទ្វីបកូរ៉េ »។
ក្រុងសេអ៊ូល និងវ៉ាស៊ីនតោន បានឆ្លើយតបថា សមយុទ្ធដែល មានទាហានកូរ៉េខាងត្បូងប្រមាណ ៥,៦ម៉ឺននាក់ និងទាហានអាមេរិកប្រមាណ៣ម៉ឺននាក់នេះ គឺក្នុង បំណងការពារខ្លួនប៉ុណ្ណោះ។
KCNA បាននិយាយថា នៅក្នុងអំឡុងពេលអធិការកិច្ចនោះលោក គីម បានសង្កត់ធ្ងន់ការត្រៀមខ្លួនធ្វើសង្គ្រាមជាស្រេចរបស់កងឯកភាពនោះ និងការអប់រំមនោគមវិជ្ជា ដល់ទាហានទាំងឡាយ។ «លោកបានឲ្យពួកគេនូវសឺម៉ែលមួយ និងកាំភ្លើងស្វ័យប្រវត្តិមួយដើមជាអំណោយ ដោយបញ្ជាក់ពីក្តីរំពឹងនិងជំនឿថាពួកគេនឹងការពារប្រទេសជាទីស្រឡាញ់ នេះបានរឹងមាំដូចជា ជញ្ជាំងដែកថែប»៕ IN
