ភ្នំពេញ ប៉ុស្តិ៍
ភ្នំពេញៈ សមាគមកីឡាវាយសីក្រសួងមហាផ្ទៃបានត្រៀមកីឡាករ-ការិនីដើម្បីទៅ ចូលរួមប្រកួតដណ្តើមពានរង្វាន់សហព័ន្ធកីឡាវាយសីវៀតណាម នៅខេត្តដុងថាប់ ពីថ្ងៃទី១៤ ដល់ទី១៦ ខែសីហា ខណៈពួកគេត្រូវចេញដំណើរមុនការប្រកួតមួយថ្ងៃ។
ព្រឹត្តិការណ៍នេះ មានការចូលរួមពីភូមិភាគនិងខេត្តជាង២០នៃប្រទេសវៀតណាម ដោយមានការចូលរួមពីកីឡាករ-ការិនីប្រមាណ៥០០នាក់ លើប្រភេទវិញ្ញាសាជាច្រើន។ វាជាលើកទីពីរហើយ ខណៈកីឡាវាយសីកម្ពុជាដែលតំណាងដោយក្រុម ក្រសួងមហាផ្ទៃ នឹងត្រូវបានបង្ហាញខ្លួនជាលើកដំបូង។
លោក គាវ សុវណ្ណធី អនុប្រធានសមាគមកីឡាវាយសីក្រសួងមហាផ្ទៃ និងជាអនុប្រធានប្រតិភូ បានមានប្រសាសន៍ឲ្យដឹងថា៖ «សហព័ន្ធកីឡាវាយសីវៀតណាម និងកីឡាវាយសីក្រសួងមហាផ្ទៃ តែងតែមានទំនាក់ទំនងល្អជាមួយក្នុងរយៈពេលកន្លងមក ហេតុនេះ គេមិនចាំបាច់អញ្ជើញតាមសហព័ន្ធកីឡាវាយសីកម្ពុជានោះឡើយ»។
លោកបានបន្តថា៖ «យើងត្រៀមកីឡាករ-ការិនីចំនួនសរុប២០នាក់ និងប្រតិភូដឹកនាំចំនួន៣នាក់ ដែលនឹងចេញដំណើរតាមរថយន្តនៅថ្ងៃចន្ទខាងមុខ»។
លោក ជា ប៊ុនហេង ប្រធានលេខាធិការដ្ឋាននៃសម្ព័ន្ធកីឡានគរបាលជាតិ និងជាប្រធានប្រតិភូដឹកនាំបានបញ្ជាក់ថា កម្ពុជានឹងចូលរួមប្រកួតច្រើនវិញ្ញាសា ហើយក៏មានវត្តមានកីឡាការិនីពីរនាក់មកពីខេត្តស្វាយរៀងផងដែរ។
លោកបន្តឲ្យដឹងថា៖ «កីឡាករវ័យចាស់របស់យើងភាគច្រើនជាមន្ត្រីរាជការ និងថ្នាក់ដឹកនាំដែលតែងមកហ្វឹកហាត់រៀងរាល់ល្ងាច។ វិញាសាដែលយើងសម្រាំងទៅប្រកួតមានប្រភេទអាយុ៥៦ឆ្នាំឡើង អាយុពី៥០ទៅ៥៥ឆ្នាំ អាយុពី៤០ទៅ៤៩ឆ្នាំ និងអាយុ៣០ឆ្នាំចុះដោយមានវាយគូបុរស នារី និងវាយចម្រុះ»។
លោក ជា ប៊ុនហេង បានលើកឡើងថា កន្លងមកកីឡាវាយសីកម្ពុជាមិនដែលមានប្រវត្តិដណ្តើមបានមេដាយ ឬជ័យលាភីអ្វីពីការប្រកួតថ្នាក់អន្តរជាតិឡើយ ជាពិសេសចាប់ពីឆ្នាំ១៩៧៩មក។
ប៉ុន្តែរបត់ថ្មីនៃកីឡារបស់សមាគមក្រសួងមហាផ្ទៃដែលធ្វើសកម្មភាពឬ ចេញទៅប្រកួតដោយមិនបានចំណាយថវិការដ្ឋនោះ បានធ្វើឲ្យក្រុមកីឡាវាយសី ក្រសួងមហាផ្ទៃ ទទួលបានមេដាយសំរឹទ្ធ២ពីព្រឹត្តិការណ៍ពានរង្វាន់ទូរទស្សន៍កាន់ ធ័ររបស់វៀតណាមកាលពីថ្ងៃទី១៤កុម្ភៈឆ្នាំ២០១២កន្លងមកថ្មីៗនេះ ។ សម្រាប់ការចេញទៅប្រកួតនេះ លោកសង្ឃឹមថា នឹងទទួលបានមេដាយជាមិនខាន។
ជុំវិញការចោទប្រកាន់មួយចំនួនពីសហព័ន្ធវាយសីកម្ពុជាដែលចេញលិខិត ទៅសមាគមក្រសួងមហាផ្ទៃ បន្ទាប់ពីការប្រកួតដណ្តើមពានរង្វាន់វាយសីលោកឧបនាយករដ្ឋមន្ត្រី សខេងលើកទី៨ ដោយចង់ឲ្យសមាគមវាយសីមហាផ្ទៃធ្វើសកម្មភាពក្រោមការគ្រប់គ្រង របស់សហព័ន្ធវាយសីកម្ពុជានោះ លោក ជាប៊ុនហេង បានបកស្រាយថា ការប្រកួតថ្នាក់ជាតិឬអន្តរជាតិជាលក្ខណៈមិត្តភាព ឬពានរង្វាន់ដែលគេហៅថា OPEN គឺជាការបើកទូលាយដល់ក្រុម ឬបុគ្គលក្នុងការចូលរួមទៅតាមការអញ្ជើញ។
លោកបានបញ្ជាក់ជារួមថា ក្រុម ឬបុគ្គលដែលអាចមានលទ្ធភាពចេញសោហ៊ុយធ្វើដំណើរ ថ្លៃហូបចុក និងការស្នាក់នៅដោយខ្លួនឯង អាចទៅចូលរួមតាមការអញ្ជើញបានព្រោះវាមិនមែនជាការចាយវាយថវិកា រដ្ឋនោះឡើយ៕
