ភ្នំពេញ ប៉ុស្តិ៍
ក្រុងញូវយ៉កៈ ធនាគារ Standard Chartered កាលពីថ្ងៃពុធ ទទួលបានការគាំទ្រខ្លះពីទេសាភិបាលធនាគារកណ្តាលរបស់អង់គ្លេស ក្នុងការតវ៉ាប្រឆាំងនឹងការចោទប្រកាន់របស់និយតករធនាគារនៅទីក្រុង ញូវយ៉ក ដែលបានចោទប្រកាន់ថា ធនាគារមួយនេះ បានលាក់បាំងប្រតិបត្តិការសាច់ប្រាក់ចំនួន ២៥០ពាន់លានដុល្លារជាមួយប្រទេសអ៊ីរ៉ង់។
ធនាគារដែលមានមូលដ្ឋាននៅទីក្រុងឡុងដ៍មួយនេះ បានបាត់បង់តម្លៃទីផ្សាររបស់ខ្លួនមួយភាគបួនក្នុងរយៈពេល ២៤ម៉ោង បន្ទាប់ពីនាយកដ្ឋានសេវាហិរញ្ញវត្ថុរបស់អាមេរិកនៅទីក្រុងញូវយ៉ក បានគំរាមកាលពីថ្ងៃចន្ទ លុបចោលអាជ្ញាប័ណ្ណសាខារបស់ធនាគារនេះនៅអាមេរិក ដោយចោទប្រកាន់ថា ធនាគារមួយនេះ គឺជាស្ថាប័នមិនស្មោះត្រង់ ដែលបំពានលើការដាក់ទណ្ឌកម្មរបស់អាមេរិក ប្រឆាំងនឹងប្រទេសអ៊ីរ៉ង់។
ភាគហ៊ុនរបស់ធនាគារ Standard Chartered បានកើនឡើង ៨,៣ភាគរយកាលពីថ្ងៃពុធ ដល់១៣,៣២ផោន ពីតម្លៃ ១០,៩២ផោន ដែលជាតម្លៃទាបបំផុតក្នុងរយៈពេលបីឆ្នាំ តែតម្លៃភាគហ៊ុននេះ នៅតែធ្លាក់ចុះ ១៧ភាគរយ ចាប់ពីនិយតករក្រុងញូវយ៉ក បានចោទប្រកាន់ធនាគារនេះមក។
មេដឹកនាំកំពូលរបស់ធនាគារនេះ បានស្វែងរកយុទ្ធសាស្រ្តការពារខ្លួនកាលពីថ្ងៃពុធ ដោយបានតវ៉ាជំទាស់រួចហើយចំពោះតួលេខរបស់និយតករអាមេរិក។ ធនាគារ Standard Chartered បានអះអាងថា ប្រតិបត្តិការសាច់ប្រាក់របស់ខ្លួនពាក់ព័ន្ធនឹងប្រទេសអ៊ីរ៉ង់ មានចំនួនតិចតួចណាស់ ពោលគឺមានតិចជាង ១៤លានដុល្លារតែប៉ុណ្ណោះ ដែលត្រូវលើកយកមកជជែកដេញដោលក្រោមច្បាប់ទណ្ឌកម្មរបស់អាមេរិក។
លោក Mervyn King ទេសាភិបាលធនាគារកណ្តាលអង់គ្លេស កាលពីថ្ងៃពុធ បានលើកឡើងពីការប្រៀបធៀបដោយមិនសមហេតុផលរវាងករណីនេះ និងចំណាត់ការរបស់អាមេរិកប្រឆាំងនឹងធនាគារអង់គ្លេស ដូចជាការស៊ើបអង្កេតលើការគ្រប់គ្រងអត្រាការប្រាក់នៅក្នុង ធនាគារ Barclays PLC ជាដើម៕ BP
