ភ្នំពេញ ប៉ុស្តិ៍
- Prev
- 1 of 2
- Next
ក្រុងហើហ្វើៈ សវនាការជំនុំជម្រះក្តីដ៏រសើបខាងនយោបាយបំផុតរបស់ចិនក្នុងពេល បីទសវត្សរ៍ ត្រូវបានគេធ្វើដោយបិទទ្វារកាលពីថ្ងៃព្រហស្បតិ៍ ខណៈក្រុមប៉ូលិសបានចាប់អូសអ្នកតវ៉ាពីរនាក់ចេញពីបន្ទប់តុលាការ មួយជាទីដែលភរិយារបស់សមាជិកការិយាល័យនយោបាយដែលគេទម្លាក់ពីអំណាច លោក បូ ស៊ី ឡាយ ត្រូវគេរំពឹងថាត្រូវគេកាត់ទោសភ្លាមៗពីបទឃាតកម្ម។
អ្នកគាំទ្រលោកបូ ពីរនាក់ ត្រូវបានគេអូសចេញ ដោយទាត់ធាក់ និងស្រែកឲ្យបញ្ចូលក្នុងរថយន្តប៉ូលិសមួយគ្រឿង បន្ទាប់ពីពួកគេ បានបង្ហាញមុខនៅខាងក្រៅតុលាការក្នុងក្រុងហើហ្វីភាគខាងកើត ដោយច្រៀងចម្រៀងស្នេហាជាតិដែលជាស្ទីលដឹកនាំដ៏មានប្រជាប្រិយរបស់លោក បូ និងបានថ្កោលទោសការជំនុំជម្រះនេះថាជាឆាកល្ខោន។
លោកហ៊ូ ជីយេ ជាបុរស វ័យកណ្តាល ដែលពាក់អាវយឺត និងពាក់មួក បានប្រាប់ក្រុមអ្នកយក ព័ត៌មាននៅក្រោយអគារតុលាការថា៖ «ខ្ញុំគ្មានការជឿជាក់ទេ។ រឿងក្តីនេះ ត្រូវបានគេសម្រេចចិត្ត ជាមុនរួចទៅហើយ»។
លោកហ៊ូ និងមិត្តភក្តិលោក បន្ទាប់មកត្រូវប៉ូលិសឯកសណ្ឋានស៊ីវិល រុញច្រានឲ្យចូលក្នុងរថយន្តមួយគ្រឿង។ មិត្តភក្តិលោកដែលក៏ជាបុរសវ័យកណ្តាលដែរ បានខំស្រែកថា «តើហេតុអ្វីបានជាអ្នកចាប់ខ្ញុំ?»។
ការកាត់ក្តីភរិយារបស់លោក បូ គឺលោកស្រី គូ កាយឡាយ ត្រូវបានពលរដ្ឋចិនភាគច្រើនយល់ឃើញ ជាផ្នែកមួយនៃការជំរុញប្រឆាំងនឹងលោក បូ ជាជនប្រជានិយមដ៏មានមហិច្ឆតាម្នាក់ដែលបានក្លាយជាសត្រូវដ៏មាន ឥទ្ធិពល ខណៈលោក បានធ្វើយុទ្ធនាការដើម្បីក្លាយជាក្រុមមេដឹកនាំមជ្ឈិមកំពូលជំនាន់ថ្មី។
លោក បូ ត្រូវបានគេចាត់ទុកជាផ្លូវការថាជាគូប្រជែងសម្រាប់ក្រុមអ្នក មានអំណាចខាងក្នុងគណៈកម្មាធិការអចិន្រៃ្តយ៍ការិយាល័យនយោបាយរបស់ បក្ស ក្នុងការផ្ទេរថ្នាក់ដឹកនាំម្តងក្នុងមួយទសវត្សរ៍ដែលបច្ចុប្បន្ន នេះ កំពុងតែដំណើរការ។ ថ្នាក់ដឹកនាំថ្មី ត្រូវគេរំពឹងថា នឹងត្រូវគេប្រកាសនៅខែតុលា។
លោកស្រី គូ និងសហចុងចោទរបស់លោកស្រី ដែលជាជំនួយការគ្រួសារត្រូវបានគេចោទប្រកាន់ពីបទបំពុលជន ជាតិអង់គ្លេសលោក ណេល ហេវូដ កាលពីឆ្នាំមុនក្នុងករណីមួយដែល ធ្វើឲ្យកក្រើកថ្នាក់ដឹកនាំកុម្មុយនីស្ត។
មន្រ្តីក្រុងហើហ្វើម្នាក់ បានប្រាប់ក្រុមអ្នកយកព័ត៌មានថា សវនាការនេះ ទំនងជាចប់នៅម៉ោងប្រហែល១១ព្រឹក នៅពេលមន្រ្តីតុលាការម្នាក់ ចេញសេចក្តីថ្លែងការណ៍ដល់ក្រុមអ្នកកាសែត ថ្វីបើការបញ្ចប់ក្តីមិនច្បាស់លាស់៕ NR