ភ្នំពេញ ប៉ុស្តិ៍
ក្រុងប៊ែរឡាំង: Mario Mandzukic បានរកគ្រាប់បាល់បញ្ចូលទីនៅក្នុងនាទី ទី៦ក្នុងពេលការបង្ហាញខ្លួនឲ្យ Bayern Munich ជាលើកទី១ដើម្បីជួយឲ្យក្រុមមួយនេះទទួលជ័យជម្នះ ២-១ លើម្ចាស់ពានរង្វាន់ពីរក្នុងពេលតែមួយកាលពីរដូវកាលមុន Borussia Dortmund ក្នុងការប្រកួតដណ្តើមពាន Super Cup របស់អាល្លឺម៉ង់កាលពីថ្ងៃអាទិត្យ។
ខ្សែបម្រើ Thomas Mueller បានរកគ្រាប់បាល់ទី២ដើម្បីបញ្ចប់ដំណើររបស់ Dortmund នៃការទទួលជ័យជម្នះចំនួន៥លើកៗគ្នាលើក្លិបដ៏ធំជាងគេបំផុត របស់អាល្លឺម៉ង់មួយនេះ ខណៈដែលខ្សែប្រយុទ្ធ Robert Lewandowski បានវាយមួយគ្រាប់វិញ។
Bayern ដែលបានបញ្ចប់ក្នុងនាមជាក្រុមជើងឯករងបន្ទាប់ពី Dortmund ទាំងនៅក្នុងក្របខ័ណ្ឌ Bundesliga និង League Cup កាលពីរដូវកាលមុននោះ ត្រូវការថិរវេលាត្រឹមតែ១១នាទីប៉ុណ្ណោះដើម្បីកំណត់ជ័យជម្នះ ក្នុងការប្រកួតនេះ ដែលត្រូវបានប្រកួតទៅលើទីលាន Allianz Arena ផ្ទាល់ខ្លួនរបស់ពួកគេ។
ខ្សែប្រយុទ្ធអន្តរជាតិក្រូអាស៊ី Mandzukic ដែលត្រូវបានលក់ចេញដ៏គួរឲ្យភ្ញាក់ផ្អើលដោយក្លិប VfL Wolfsburg នៅក្នុងរដូវកាលនេះ បានរកគ្រាប់បាល់បញ្ចូលទីសម្រាប់ក្រុមម្ចាស់ផ្ទះពីការស៊ុតក្នុង ចម្ងាយ១២ម៉ែត្រក្នុងនាទី ទី៦ ក្រោយពីខ្សែការពាររបស់ក្រុម Dortmund មិនអាចទប់ស្កាត់ការបញ្ជូនបាល់របស់កីឡាករ Franck Ribery ពីតំបន់ខាងឆ្វេង។
រយៈពេល៥នាទីក្រោយមក Mandzukic បានបញ្ជូនបាល់ឲ្យ Arjen Robben ហើយបើទោះការស៊ុតរបស់ខ្សែបម្រើស្លាបរូបនេះ បានទាត់ប៉ះនឹងបង្គោលទីក៏ដោយ ប៉ុន្តែ Mueller បានបន្ថែមដើម្បីបំប៉ោងសំណាញ់ទី។
នាពេលនោះ Bayern បានអត្តមានខ្សែបម្រើដ៏ឆ្នើម Bastian Schweinsteiger ដោយសារតែបញ្ហារបួស និងខ្សែប្រយុទ្ធ Mario Gomez។
Lewandowski បានធ្វើឲ្យបាត់បង់ឱកាសដ៏ល្អឥតខ្ចោះមួយតាមរយៈការស៊ុតបាល់ខុស ទីពីចម្ងាយ៦ម៉ែត្រ ប៉ុន្តែខ្សែប្រយុទ្ធអន្តរជាតិប៉ូឡូញរូបនេះ បានស្តារមុខមាត់វិញនៅក្នុងនាទី ទី៧៥ តាមរយៈការស៊ុតបាល់ផុតដៃអ្នកចាំទីដើម្បីវាយបកបាន១គ្រាប់វិញ តែម្តង។ Bayern បានសង្គ្រោះនូវការវាយសម្រុកជាបន្តបន្ទាប់ដើម្បីទទួលជ័យជម្នះ នេះតែម្តង៕ IS
