ភ្នំពេញ ប៉ុស្តិ៍
ក្រុងម៉ៃឌូហ្គូរី: មន្ត្រីសន្តិសុខមួយរូបបាននិយាយថា កម្លាំងសន្តិសុខនីហ្សេរីយ៉ា បានសម្លាប់សកម្មប្រយុទ្ធសង្ស័យនិកាយបូកូហា រ៉ាម២០នាក់នៅក្នុងការបាញ់ប្រហារកាលពីថ្ងៃអាទិត្យ ខណៈពួកគេបានវាយឆ្មក់លើទីតាំង លាក់ខ្លួនអ៊ិស្លាមនិយមមួយកន្លែង នៅភាគឦសាននៃប្រទេសនេះ។
មន្ត្រីរូបនេះបាននិយាយថា ទាហានម្នាក់ ក៏ត្រូវគេសម្លាប់ផងដែរ នៅក្នុងការបាញ់ប្រហារនៅក្នុងក្រុងម៉ៃឌូហ្គូរី នៃរដ្ឋបូរណូ។
លោកវរសេនីយ៍ឯក វិចទ័រ អេបហាឡេម៉េ មន្ត្រីប្រតិបត្តិការមូលដ្ឋាននៃក្រុមការងារពិសេសរួម(JTF)យោធានិងប៉ូលិស នៅក្នុងរដ្ឋបូរណូបាននិយាយថា កម្លាំងសន្តិសុខមានព័ត៌មានចារកម្មថា សមាជិកខ្លះនៃក្រុមនេះ កំពុងធ្វើការជួបជុំគ្នានៅឯទីតាំងមួយ នៅក្នុងក្រុងម៉ៃឌូហ្គូរី។ លោកបានថ្លែងថា៖ «នៅពេលយើងបានចូលជិតទីកន្លែងនៃចំណុចជួបជុំរបស់ពួក គេ ក្រុមភេរវករនោះ បានបើកការបាញ់រះលើក្រុម JTF ដែលនាំឲ្យមានការសម្លាប់ភេរវករចំនួន២០នាក់ រីឯយើងបានបាត់បង់ទាហានម្នាក់ ហើយពីរនាក់ទៀត បានរងរបួស»។
ក្រុមបូកូហារ៉ាំមិនបានធ្វើអធិប្បាយទេ ហើយគេក៏មិនអាចបញ្ជាក់ពីរបាយការណ៍នេះ ដោយឯករាជ្យដែរ។ បូកូហារ៉ាមជាក្រុមអ៊ិស្លាមនិយមមួយដែលយកស្ទីលតាមក្រុមតាលីបង់ កំពុងតែបះបោរប្រឆាំងរដ្ឋាភិបាល ជាមួយទស្សនៈចង់បង្កើតរដ្ឋអ៊ិស្លាមមួយ នៅក្នុងប្រទេសនីហ្សេរីយ៉ាដែលមានពលរដ្ឋជាង១៦០លាននាក់ ដែលបែកបាក់គ្នាជាពីរ រវាងក្រុមគ្រិស្តសាសនិក និងក្រុមមូស្លីម។
ក្រុមអ៊ិស្លាមនិយម បានសម្លាប់មនុស្សរាប់រយនាក់នៅក្នុងការវាយប្រហារ ដោយកាំភ្លើង និងគ្រាប់បែកនៅនីហ្សេរីយ៉ា ជាប្រទេសផលិតថាមពលកំពូលរបស់អាហ្វ្រិកចាប់តាំងពីពួកគេបានចាប់ ផ្ដើមធ្វើការបះបោរក្នុងឆ្នាំ២០១២។
អំពើហិង្សាបានផ្ដោតទៅលើរដ្ឋបូរណូ និងតំបន់ជាច្រើនទៀតដែលមានមូស្លីមដ៏ច្រើនលើសលប់នៅភាគខាងជើង៕ PN
