ភ្នំពេញ ប៉ុស្តិ៍
ក្រុងកាមរ៉ាៈ កម្លាំងទ័ពអាកាស បាននិយាយថា ក្រុមសកម្មប្រយុទ្ធអ៊ិស្លាមប្រដាប់ដោយគ្រាប់បេ និងកាំភ្លើងស្វ័យប្រវត្តិជាច្រើនដើម បានបាញ់បើកផ្លូវចូលទៅក្នុងមូលដ្ឋានទ័ពអាកាសធំបំផុតមួយរបស់ ប៉ាគីស្ថានកាលពីថ្ងៃព្រហស្បតិ៍ ក្នុង ការប្រឈមដ៏ព្រហើនទៅនឹងយោធាដ៏មានឥទ្ធិពលរបស់រដ្ឋដែលមានអាវុធនុយក្លេអ៊ែរនេះ។
អ្នកនាំពាក្យទ័ពអាកាសម្នាក់ បាននិយាយថា មានតែយន្តហោះមួយគ្រឿងគត់ដែលបានរងការខូចខាត ដោយលោកបន្ថែមថា មូលដ្ឋានអាកាសមីនហាស់ នៅក្រុងកាមរ៉ា កណ្តាលខេត្តពុនចាប់ មិនមានផ្ទុកអាវុធនុយក្លេអ៊ែរទេ។ លោកបានថ្លែងថា៖«ពុំមានមូលដ្ឋានអាកាស ជាមូលដ្ឋាននុយក្លែអ៊ែរទេនៅប៉ាគីស្ថានេ»។
ការប្រយុទ្ធគ្នាដោយអាវុធមួយ បានផ្ទុះឡើងជាច្រើនម៉ោង បន្ទាប់ពីការវាយប្រហារ បានចាប់ផ្តើម។ កងកុម្ម៉ង់ដូ ត្រូវបានកោះហៅឲ្យមកដើម្បីពង្រឹងកម្លាំង ហើយគេ អាចឃើញរថពាសដែកប៉ូលិសជាច្រើនគ្រឿងចូលក្នុងបន្ទាយនេះ។
អ្នកនាំពាក្យរូបនេះ បានបញ្ជាក់ថា ជនសកម្មប្រយុទ្ធ៨នាក់ និងទាហានម្នាក់ ត្រូវបានស្លាប់។ ក្រុមអ្នកវាយប្រហារ បានចល័តឆ្លងកាត់តាមភូមិមួយនៅក្បែរនោះក្រោមភាពងងឹត ហើយបានតោងឡើងជញ្ជាំង២,៧ម៉ែត្រ ដែលព័ទ្ធដោយលួសបន្លា ដើម្បីបំបែកចូលក្នុងមូលដ្ឋាននេះ។ អ្នកខ្លះមានប្រើ ឯកសណ្ឋានយោធា។
ការវាយប្រហារនេះ បានបង្កក្តី មន្ទិលជុំវិញការអះអាងជាផ្លូវការដែលថា ប្រតិបត្តិការយោធា បានធ្វើឲ្យចុះខ្សោយខ្លាំងដល់ក្រុមសកម្មប្រយុទ្ធ ដែលធ្វើយុទ្ធនាការហិង្សា ដើម្បីផ្តួលរំលំរដ្ឋាភិបាលដែលគាំទ្រដោយអាមេរិក និងដាក់ច្បាប់អ៊ិស្លាមតឹងរ៉ឹងឲ្យប្រើ។
អ្នកនាំពាក្យទ័ពអាកាសរូបនេះ បានអះអាងថា កម្លាំងសន្តិសុខ បានបើកការវាយប្រហារ នៅពេលដែលក្រុមសកម្មប្រយុទ្ធដែលមានអាវកាក់គ្រាប់បែកអត្តឃាតជាប់ ខ្លួន បានដើរទៅជិតរោងផ្ទុកយន្តហោះ ដោយញ៉ាំងឲ្យក្រុមសកម្មប្រយុទ្ធផ្សេងទៀត បាញ់គ្រាប់បេពីខាងក្រៅជញ្ជាំងបន្ទាយនេះ។
លោកអនុសេនីយ៍ឯក តារីក ម៉ះមូដ បាននិយាយថា ឧត្តមនាវីត្រីនៃកងកុម្ម៉ង់ដូទ័ពអាកាស ម៉ូហាម៉ាត់ អាហ្សាម ដែលដឹកនាំប្រតិបត្តិការប្រឆាំងនឹងក្រុមអ្នកវាយប្រហារនេះ ត្រូវគេបាញ់ចំស្មា ប៉ុន្តែមិនប៉ះពាល់ជីវិតទេ។
គេមិនបានដឹងភ្លាមៗទេថាការវាយប្រហារនេះបានបញ្ចប់នៅពេលណានោះទេ ប៉ុន្តែអ្នកយកព័ត៌មានរ៉យទ័រដែលបានទៅដល់បន្ទាយកាមរ៉ានៅពេល ព្រឹក មិនបានឮកាំភ្លើងទេ ប៉ុន្តែកំពុងប្រតិបត្តិបោសសម្អាត៕ NR
