នាយករដ្ឋមន្ត្រីថៃ លោក សេដ្ឋា ថាវីស៊ីន ដែលឡើងកាន់អំណាចកាលពីខែសីហា ឆ្នាំមុន និងដែលទើបប្រកាសផ្អាកដើរទៅក្រៅប្រទេស បានចាត់ទុកក្របីទឹកថាជា «អំណាចទន់» ថ្មីរបស់ប្រទេស ដោយប្រើប្រាស់វាក្នុងការផ្សព្វផ្សាយផ្សេងៗជាអន្តរជាតិ ដែលអាចជាប្រភពនៃការបង្កើនចំណូលជាតិ។
លោក សេដ្ឋា បានអនុម័តគំនិតនេះភ្លាមៗនៅពេលដែលតំណាងសមាគមអ្នកចិញ្ចឹមក្របីថៃ ស្នើទៅកាន់លោកនៅវិមានរដ្ឋាភិបាលកាលពីព្រឹកថ្ងៃពុធ។
ក្នុងជំនួបនោះ តំណាងសមាគមថែមទាំងបាននាំយកក្របីឈ្មោះ Ko Muang Phet ដែលសារព័ត៌មានថៃចាត់ទុកថា ជា «តារាក្របី» ទៅជួបលោក សេដ្ឋា ទៀតផង។ ការណ៍នេះ ធ្វើឡើងដើម្បីជួយជំរុញការលើកកម្ពស់សត្វក្របីថៃ ជានិមិត្តរូបនៃអំណាចទន់ដែលជាវិធីសាស្ត្រទាក់ទាញគេឱ្យចូលចិត្តខ្លួនតាមរយៈការបង្ហាញវប្បធម៌ជាដើម។
លោក Jittanart Limthongkul ដែលជាម្ចាស់របស់ Ko Muang Phet និងកសិដ្ឋាន Vanasuwan Farm Co បាននិយាយថា លោកចង់ឱ្យរដ្ឋាភិបាលប្រើប្រាស់ក្របីថៃ ក្នុងការបង្ហាញអំណាចទន់។
លោកបាននិយាយថា កាលពីថ្ងៃអង្គារ លោកបានបណ្ដើរបង្ហាញខ្លួន Ko Muang Phet នៅលើផ្លូវ Phra Athit ក្នុងទីក្រុងបាងកក ហើយធ្វើឱ្យមានការទាក់ទាញចំណាប់អារម្មណ៍ពីអ្នកទេសចរជាច្រើន។
ជាមួយគ្នានេះផងដែរ លោកគ្រោងនឹងនាំយកក្របីធំៗជាច្រើនក្បាល រួមទាំង Ko Muang Phet ទៅចូលរួមពិធីបុណ្យចូលឆ្នាំនៅផ្លូវ Khao San នៅថ្ងៃទី ១៣ និង ១៤ ខែមេសា។
យ៉ាងណាមិញ លោកបាននិយាយថា លោកនាយករដ្ឋមន្ត្រីបានណែនាំឱ្យលោកធានាសុវត្ថិភាពសាធារណៈ ទោះបីវាជាគំនិតល្អក៏ដោយ។ លោក Jittanart បន្តថា ក្របីទឹកមិនក្អេងក្អាងទេ ហើយវាចូលចិត្តទឹក។
ចំណែកឯលោក សេដ្ឋា វិញ បានថ្លែងថា លោកនឹងផ្សព្វផ្សាយក្របីថៃជាអំណាចទន់ ហើយលោកប្រាកដថា អ្នកទេសចរនឹងរំភើបចិត្តពេលឃើញសត្វនេះមានក្នុងពិធីបុណ្យចូលឆ្នាំនាខែក្រោយ។
លោកបានបញ្ជាឱ្យអ្នកនាំពាក្យរដ្ឋាភិបាល និងក្រសួងកសិកម្ម និងសហករណ៍ ធ្វើកម្មវិធីបង្ហាញក្របីថៃ នៅចិនក្នុងខែឧសភាខាងមុខ ខណៈថៃកំពុងព្យាយាមទាក់ទាញភ្ញៀវទេសចរឱ្យមកកម្សាន្តច្រើន៕