.jpg)
គណៈប្រតិភូកូរ៉េខាងជើងនិងរុស្ស៊ីធ្លាប់ជួបគ្នាកន្លងមក។ AFP
ភ្នាក់ងារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃព្រហស្បតិ៍នេះថា គណៈប្រតិភូនៃការិយាល័យចារកម្មបរទេសរបស់រុស្ស៊ី បានធ្វើដំណើរទស្សនកិច្ចនៅទីក្រុងព្យុងយ៉ាង កាលពីចន្លោះថ្ងៃចន្ទ និងថ្ងៃពុធ ហើយបានពិភាក្សាអំពីការជំរុញកិច្ចសហប្រតិបត្តិការប្រឆាំងនឹងការធ្វើចារកម្ម។ នេះបើតាមការរាយការណ៍បន្តរបស់ទីភ្នាក់ងារសារព័ត៌មានរ៉យទ័រ។
នាយកការិយាល័យ លោក Sergei E. Naryshkin និងរដ្ឋមន្ត្រីសន្តិសុខរដ្ឋកូរ៉េខាងជើង លោក Ri Chang Daeបានពន្យល់គ្នាទៅវិញទៅមកអំពីស្ថានភាពអន្តរជាតិ និងតំបន់ ទាក់ទងនឹងឧបទ្វីបកូរ៉េ និងរុស្ស៊ី។
KCNA បានបន្ថែមថា ក្នុងអំឡុងទស្សនកិច្ច មន្ត្រីនៃការិយាល័យស៊ើបការណ៍សម្ងាត់ និងក្រសួងក៏បានធ្វើការពិភាក្សាកម្រិតការងារផ្សេងៗផងដែរ។
ភាគីទាំង ២ ក៏បានពិភាក្សាផងដែរអំពីការជំរុញកិច្ចសហប្រតិបត្តិការបន្ថែមទៀត ដើម្បីដោះស្រាយជាមួយនឹង «ចលនាចារកម្ម និងផែនការដែលកំពុងកើនឡើង ដោយកងកម្លាំងអរិភាព»។
ដំណើរទស្សនកិច្ចនេះ ធ្វើឡើងចំពេលដែលក្រុងព្យុងយ៉ាងស្វែងរកការពង្រីកទំនាក់ទំនងការទូតរបស់ខ្លួនជាមួយប្រទេសផ្សេងៗ ក្រោយការបិទខ្ទប់កូវីដ។
លើសពីនេះទៅទៀត គេមើលឃើញថា រុស្ស៊ី និងកូរ៉េខាងជើង កាន់តែពង្រឹងកិច្ចសហប្រតិបត្តិការរបស់ខ្លួន កាន់តែស្អិតរមួត ដែលបង្កការព្រួយបារម្ភដល់សហរដ្ឋអាមេរិក និងសម្ព័ន្ធមិត្តក្នុងតំបន់ រួមមានកូរ៉េខាងត្បូង និងជប៉ុន៕
