ប្រទេសឥណ្ឌា គ្រោងនឹងចំណាយប្រាក់ជិត ៣,៧ ពាន់លានដុល្លារ ដើម្បីធ្វើរបងជាប់ព្រំដែនមីយ៉ាន់ម៉ា ដែលមានប្រវែង ១ ៦១០ គីឡូម៉ែត្រ ដើម្បីទប់ស្កាត់ការរត់ពន្ធ និងសកម្មភាពខុសច្បាប់ឆ្លងដែនផ្សេងទៀត។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីប្រភពដឹងច្បាស់ដោយផ្ទាល់លើបញ្ហានេះ។
ប្រភពដែលសុំមិនបញ្ចេញឈ្មោះ បាននិយាយប្រាប់រ៉យទ័រថា គណៈកម្មាធិការរដ្ឋាភិបាលឥណ្ឌាមួយកាលពីដើមខែនេះ បានអនុម័តលើការចំណាយសម្រាប់ការធ្វើរបង ដែលត្រូវការការយល់ព្រមពីខុទ្ទកាល័យនាយករដ្ឋមន្ត្រីឥណ្ឌា លោក ណារ៉េនដ្រា មូឌី។
ជុំវិញការណ៍នេះ ក្រសួង និងស្ថាប័នពាក់ព័ន្ធរបស់រដ្ឋាភិបាលឥណ្ឌា មិនទាន់ចេញការបកស្រាយយ៉ាងណានៅឡើយទេ ខណៈមីយ៉ាន់ម៉ា ក៏មិនទាន់លើកឡើង ១ ម៉ាត់លើគោលនយោបាយរបស់ឥណ្ឌា។
ប្រភពដដែលប្រាប់រ៉យទ័រទៀតថា គណៈកម្មាធិការនៃមន្ត្រីជាន់ខ្ពស់ឥណ្ឌា ក៏បានយល់ព្រមសាងសង់ផ្លូវស្របគ្នាតាមរបង និងផ្លូវចំណីប្រវែង ១ ៧០០ គីឡូម៉ែត្រ ដែលតភ្ជាប់មូលដ្ឋានយោធាទៅកាន់ព្រំដែនផងដែរ។
កាលពីដើមឆ្នាំនេះ ឥណ្ឌាបាននិយាយថា ខ្លួននឹងធ្វើរបងព្រំដែន និងបញ្ចប់គោលនយោបាយឆ្លងដែនគ្មានទិដ្ឋាការសម្រាប់ពលរដ្ឋរស់នៅតាមព្រំដែន ជាមួយប្រទេសមីយ៉ាន់ម៉ា ក្រោមហេតុផលសន្តិសុខជាតិ និងដើម្បីរក្សារចនាសម្ព័ន្ធប្រជាសាស្រ្តនៃតំបន់ភាគឦសានរបស់ឥណ្ឌា។
ចាប់តាំងពីរដ្ឋប្រហារយោធាក្នុងប្រទេសមីយ៉ាន់ម៉ា នៅឆ្នាំ ២០២១ មក ជនស៊ីវិលរាប់ពាន់នាក់ និងទាហានរាប់រយនាក់ បានភៀសខ្លួនចេញពីប្រទេសទៅកាន់រដ្ឋផ្សេងៗនៃប្រទេសឥណ្ឌា។ ការណ៍នេះធ្វើឱ្យឥណ្ឌាព្រួយបារម្ភ ដោយសារតែហានិភ័យនៃភាពតានតឹងសហគមន៍ អាចរីករាលដាលចូលដល់ប្រទេសខ្លួន៕