.jpg)
ភ្នំពេញ៖ ក្រសួងទេសចរណ៍កម្ពុជាត្រៀមរៀបចំព្រឹត្ដិការណ៍វប្បធម៌ដ៏ធំមួយនៅបរិវេណខាងជើងប្រាសាទបាយ័ន ក្នុងខេត្ដសៀមរាប ថ្ងៃទី២៤ ខែមេសា ឆ្នាំ២០២៤ ខាងមុខនេះ។
«ពិព័រណ៍ទេសចរណ៍វប្បធម៌កម្ពុជា-ចិន ២០២៤» នឹងបង្ហាញអំពី «ព្រឹត្តិការណ៍ពិព័រណ៍វប្បធម៌ទេសចរណ៍ និងព្រឹត្តិការណ៍សម្ដែងក្បាច់គុនសាវលីញ និងគុនល្បុក្កតោនៅអង្គរ»។
យោងតាមក្រសួងទេសចរណ៍កម្ពុជា បានឱ្យដឹងថា៖ «ព្រឹត្ដិការណ៍នេះជាផ្នែកមួយនៃ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» ហើយវាជាការជំរុញវិស័យទេសចរណ៍រវាងខេត្ដសៀមរាបរបស់កម្ពុជា និងខេត្ដហេណាន់ របស់ចិន»។
ព្រឹត្តិការណ៍ពិព័រណ៍វប្បធម៌ទេសចរណ៍រវាងប្រទេសកម្ពុជា និងចិននេះ នឹងចាប់ផ្ដើមវេលាម៉ោង ៧:៣០ ព្រឹក ក្នុងគោលបំណងផ្សព្វផ្សាយគោលដៅទេសចរណ៍រួមគ្នាជាមួយការសម្ដែងក្បាច់គុនសាវលីញ និងក្បាច់គុនល្បុក្កតោ។
ព្រឹត្តិការណ៍នេះនឹងមានការចូលរួមពីថ្នាក់ដឹកនាំកម្ពុជា-ចិន សមាគមទេសចរណ៍ អ្នកសារព័ត៌មាន និងស្ថាប័នពាក់ព័ន្ធសរុបជាង ៥០០ នាក់។
ការសម្តែងរួមគ្នានេះមានគោលបំណងពង្រឹងចំណងវប្បធម៌ និង បង្ហាញពីភាពទាក់ទាញទេសចរណ៍តែមួយគត់ ដែលបង្ហាញពីបេតិកភណ្ឌសិល្បៈក្បាច់គុនដ៏សម្បូរបែបនៃប្រទេសទាំងពីរ។
លោក តុប សុភ័ក អ្នកនាំពាក្យក្រសួងទេសចរណ៍ បានឱ្យដឹងថា «ពិព័រណ៍ទេសចរណ៍វប្បធម៌កម្ពុជា-ចិន ២០២៤» គឺជាគំនិតផ្ដួចផ្ដើមរបស់លោករដ្ឋមន្ដ្រីក្រសួងទេសចរណ៍ សុខ សូកេន ដែលជាផ្នែកមួយនៃ«ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤» រួមជាមួយរដ្ឋបាលខេត្ដហេណាន់ របស់ចិន ក៏ដូចជារដ្ឋបាលខេត្ដសៀមរាប។
លោកបានប្រាប់ភ្នំពេញប៉ុស្ដិ៍ថា៖ «វាក៏ជាព្រឹត្ដិការណ៍ទាក់ទាញភ្ញៀវទេសចរចិនបន្ថែមទៀត និងជាការផ្សព្វផ្សាយសក្ដានុពលវប្បធម៌ទេសចរណ៍កម្ពុជាយើង ដោយយើងមានធ្វើការតាំងពិព័រណ៍ផលិតផលវប្បធម៌ និងទេសចរណ៍ នៃភាគីចិន និងកម្ពុជា»។
លោក សុភ័ក បានបញ្ជាក់ថា កាលពីឆ្នាំ ២០២៣ កម្ពុជាទាក់ទាញភ្ញៀវទេសចរចិនប្រមាណ ៥៤ ម៉ឺននាក់ ហើយឆ្នាំ២០២៤ នេះ កម្ពុជារំពឹងថានឹងទទួលភ្ញៀវទេសចរចិនប្រមាណ ១លាននាក់។
ថ្នាក់ដឹកនាំ និងអ្នកលេងក្បាច់គុនសាវលីញ ដែលមានប្រភពមកពីខេត្ដ ហេណាន់នោះ ក៏នឹងបង្ហាញក្បាច់គុនប្រចាំតំបន់របស់ខ្លួន ខណៈកម្ពុជាក៏នឹងបង្ហាញក្បាច់គុនល្បុក្កតោដែលពួកគេមកពីសមាគមន៍ក្បាច់គុនល្បុក្កតោកម្ពុជា។
លោក ឡុង កុសល អ្នកនាំពាក្យអាជ្ញាធរជាតិអប្សរា បានឱ្យដឹងថា ការបង្កើតព្រឹត្ដិការណ៍នេះពិតជាល្អ ដើម្បីស្វែងយល់អំពីវប្បធម៌រវាងគ្នា និងគ្នា។ មួយវិញទៀត វាជាការបង្កើនទំនាក់ទំនងល្អ ការយល់គ្នាទៅវិញទៅមក ដែលបន្ដជំរុញទៅដល់កិច្ចសហការផ្សេងៗ។
លោកបានថ្លែងប្រាប់ភ្នំពេញប៉ុស្ដិ៍ថា៖ «ចំពោះការជំរុញវិស័យទេសចរណ៍ ពិតណាស់ វប្បធម៌ជាផ្នែកស្នូលមួយយ៉ាងសំខាន់ក្នុងការផ្សព្វផ្សាយវិស័យទេសចរណ៍ ពីព្រោះការយល់គ្នា និងការដឹងអំពីគ្នា កាន់តែធ្វើឱ្យយើងមានទំនាក់ទំនងជាមួយគ្នាកាន់តែល្អ។ សង្ឃឹមថា ការរៀបចំព្រឹត្ដិការណ៍នានាធ្វើឱ្យវិស័យទេសចរណ៍ខេត្ដសៀមរាបទទួលបានចំនួនភ្ញៀវកាន់តែច្រើន និងរយៈពេលកាន់តែយូរ»។
ក្នុងគោលបំណងផ្សព្វផ្សាយទេសចរណ៍វប្បធម៌លើឆាកអន្ដរជាតិ ក្រសួងទេសចរណ៍កម្ពុជា បានជូនដំណឹងដល់សមាគមទេសចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ-អន្តរជាតិ សាធារណជន និងភាគីពាក់ព័ន្ធ ដើម្បីធ្វើការផ្សព្វផ្សាយបន្ដ។
ព្រឹត្តិការណ៍នេះមិនគ្រាន់តែជាការតាំងពិព័រណ៍វប្បធម៌ប៉ុណ្ណោះទេ ប៉ុន្តែក៏ជាវេទិកាមួយដើម្បីទាក់ទាញភ្ញៀវទេសចរ និងអ្នកវិនិយោគចិនកាន់តែច្រើន ដោយរួមចំណែកយ៉ាងសំខាន់ដល់គំនិតផ្តួចផ្តើម «ទស្សនាខេត្តសៀមរាបឆ្នាំ ២០២៤»។
កិច្ចសហការនេះបង្ហាញពីការពង្រឹងទំនាក់ទំនងរវាងកម្ពុជា និងចិន ដោយសន្យាថានឹងបង្កើតទំព័រថ្មីមួយនៅក្នុងទំនាក់ទំនងដ៏យូរអង្វែងរបស់ពួកគេ។ វាជាការប្រារព្ធពិធីនៃប្រពៃណីចែករំលែក និងការបង្រួបបង្រួមសម្ព័ន្ធភាពថ្មីតាមរយៈភាសាសកលនៃសិល្បៈ និងការសម្តែង៕
