យន្តហោះខ្នាតតូច ១៦គ្រឿងនឹងមកដល់ខេត្តព្រះសីហនុនៅរសៀលថ្ងៃទី ២៥ខែមេសានេះ ដើម្បីត្រៀមហោះហើរសម្ដែងនៅតាមបណ្ដោយឆ្នេរក្នុងខេត្តព្រះសីហនុនៅថ្ងៃទី២៦ និង២៧ ខែមេសា។
លោក ឡុង ឌីម៉ង់ អភរិបាលរងខេត្តព្រះសីហនុបានប្រាប់ឲ្យដឹងថា ទស្សនិកជនដែលចង់ទៅមើលការសម្ដែងនេះអាចរង់ចាំមើលទស្សនីយភាពនេះនៅពយតាមូង ឬ ទីលានតេជោ ក្បែរសណ្ឋាគារសុខា ក្នុងសង្កាត់លេខ៤ ក្រុងព្រះសីហនុ ចាប់ពីម៉ោង ៤រសៀលសម្រាប់ព្រឹត្តិការណ៍ទាំងពីរថ្ងៃ។
កម្មវិធី «ហោះហើរមិត្តភាពកម្ពុជា-ថៃឆ្នាំ២០២៤»នេះរៀបចំឡើងដើម្បីលើកស្ទួយវិស័យទេសចរណ៍កម្ពុជា ជាពិសេស នៅតំបន់មាត់សមុទ្រ ក៏ដូចជាវិស័យធុរកិច្ចរវាងប្រទេសកម្ពុជានិងថៃ តាមគោលការណ៍ «បើកចំហរជើងមេឃ» របស់រដ្ឋាភិបាល។
លោកថ្លែងដូច្នេះថា៖ «ការសម្ដែងនេះមិនមែនជាព្រឹត្តិការណ៍ធុរកិច្ចទេ។ មែនទែនទៅសមាគមនេះឈ្មោះថា សមាគមហោះហើរថៃ ដែលជាបណ្ដុំអ្នកមានយន្តហោះផ្ទាល់ខ្លួនប្រភេទទេសចរណ៍ដែលនឹងហោះហើរមកខេត្តព្រះសីហនុ ហើយយើងក៏បង្កើតព្រឹត្តិការណ៍នេះឡើង»។
ព្រឹត្តិការណ៍នេះក៏មានការចូលរួមរៀបចំដោយសមាគមទេសចរណ៍កម្ពុជា (CATA) ផងដែរ៕