Search form

Login - Register | FOLLOW US ON

Logo of Phnom Penh Post newspaper Phnom Penh Post - «ការ​ហើយ​ទៅ​នៅ​ឯណា?»៖ បញ្ហា​ចម្បង​របស់​​ប្តី​ប្រពន្ធ​វ័យ​ក្មេង​នៅ​កម្ពុជា

Content image - Phnom Penh Post
(រូបតំណាង) ប្តី​ប្រពន្ធវ័យ​ក្មេងពីរនាក់​កំពុង​តែមើល​កាសែតដើម្បី​រក​ទិញ​ផ្ទះ។

«ការ​ហើយ​ទៅ​នៅ​ឯណា?»៖ បញ្ហា​ចម្បង​របស់​​ប្តី​ប្រពន្ធ​វ័យ​ក្មេង​នៅ​កម្ពុជា

ភ្នំពេញ៖ ដៃ​លើក​កែវ​កាហ្វេ​ក្រេប​បណ្តើរ សោភា (ឈ្មោះ​ដាក់​ឲ្យ) ជា​គណនេយ្យ​ករ​ម្នាក់​ដែល​នឹង​រៀប​ការ​នៅ​ខែ​ វិច្ឆិកា ​ឆ្នាំ​នេះ បាន​រៀប​រាប់​ប្រាប់​ LIFT កាល​ពី​ម្សិលមិញ​ថា៖ «បញ្ហា​ធំ​បំផុត​របស់​ខ្ញុំ​នៅ​ពេល​នេះគឺ​ ការ​ស្វែង​រក​កន្លែង​នៅ​បន្ទាប់​ពី​រៀប​ការ​រួច។ យើង​មិន​មាន​លទ្ធភាព​ទិញ​ផ្ទះ​ទេ ព្រោះ​ប្រាក់​ខែ​យើង​មិន​គ្រប់​គ្រាន់ ហើយ​បើ​ជួល​ផ្ទះ​គេ​នៅ បួន​ដប់​ឆ្នាំ​ក្រោយ ក៏​ផ្ទះ​នៅ​តែ​ជា​របស់​គេ។ គូដណ្តឹង​ខ្ញុំ​ចង់​នៅ​ជាមួយ​ម៉ាក់ប៉ា​គាត់ ក៏​ប៉ុន្តែ​និយាយ​តាម​ត្រង់​ទៅ ខ្ញុំ​មិន​ចង់​ធ្វើ​អញ្ចឹង​ទេ ព្រោះ​ខ្ញុំ​មិន​ចង់​រំខាន​ដល់​ពួក​គាត់​ឡើយ»។

សោភា​ មិនមែន​ជា​មនុស្សតែ​ម្នាក់​នោះ​ឡើយ​ដែល​ព្រួយ​បារម្ភ​ពី​បញ្ហា​កន្លែង​រស់​នៅ​ក្រោយ​ពី​រៀប​ការ​រួច ជា​បញ្ហា​ចម្បង​ដែល​គូ​ស្វាមី​ភរិយា​វ័យ​ក្មេង​ជា​ច្រើនក្នុង​ប្រទេស​កម្ពុជា​​ត្រូវ​ឈឺ​ក្បាល​ក្នុង​ការ​ដោះស្រាយ។

ក៏​ប៉ុន្តែ​វិធី​ដែល​ពួក​គេ​ដោះស្រាយ​បញ្ហា​នេះ មាន​លក្ខណៈ​ខុសៗ​គ្នា​អាស្រ័យ​ទៅ​តាម​ស្ថានភាព​ហិរញ្ញវត្ថុ​ និង​គ្រួសារ​របស់​ពួក​គេ។

អ្នកស្រី​ ភិន សូនិតា មន្រ្តី​រាជការ​ស៊ីវិល​ម្នាក់​បាន​រៀប​ការ​ជាមួយ​នឹង​ស្វាមី​ជា​មន្រ្តី​រាជការ​ដូចគ្នា​​កាល​ពី​ឆ្នាំ ២០១៤ ដោយ​អ្នក​ទាំង​ពីរ​បាន​រស់​នៅ​ផ្ទះ​ជាមួយ​នឹង​ឪពុក​ម្តាយ​របស់​អ្នក​ស្រី​តាំង​ពី​ពេល​រៀប​ការ​រួច រហូត​មក​ដល់​ពេល​នេះ ដោយ​អ្នក​ស្រី​បាន​ទទួល​កូន​ប្រុស​មួយ​ជា​ចំណង​ដៃ​អាពាហ៍​ពិពាហ៍​។

អ្នក​ស្រី​ថ្លែងថា ៖​«យើង​មិន​មាន​បញ្ហា​អ្វី​ធំ​ដុំ​នោះ​ឡើយ​ក្នុង​ការ​រស់​នៅ​ជាមួយ​គ្នា ក៏​ប៉ុន្តែ​យើង​មិន​អាច​រស់​នៅ​បែប​នេះ​រហូត​បាន​ទេ ព្រោះ​បន្តិច​ទៀត​កូន​យើង​នឹង​ធំ ត្រូវ​ការ​បន្ទប់​ខ្លួនឯង ហើយ​យើង​ក៏អាច​មាន​កូនទៀត​ផង​ដែរ។ខ្ញុំ​ពិត​ជា​ចង់​បាន​ផ្ទះ​ខ្លួន​ឯងណាស់​តែ​ពេល​នេះ​យើង​មិន​ទាន់​មាន​ប្រាក់​គ្រប់​គ្រាន់។ ខ្ញុំ​នឹង​ប្តី​ខ្ញុំប្រហែ​ល​ជាង​អាច​នឹង​ទិញ​ផ្ទះ​មួយ​ជិត​កន្លែង​ធ្វើការ​ក្នុង​រយៈ​ពេល ៦ ឆ្នាំ​ទៀត ដោយ​ទិញ​ដាច់​ ឬ​បង់​រំលោះ អាស្រ័យ​លើ​តម្លៃផ្ទះ និង​ប្រាក់​សន្សំ​របស់​យើង»។

អ្នកលក់អីវ៉ាន​ចាប់ហួយ​ម្នាក់វ័យ ២៤ ឆ្នាំ​ម្នាក់ នៅ​ម្តុំ​ផ្សារ​ទួល​ទំពូង ដែល​សុំ​មិន​បញ្ចេញ​ឈ្មោះ​បាន​ឲ្យដឹងថា អ្នក​នាង​បាន​រៀបការ​ជាមួយ​ស្វាមី​ដែល​ជា​បុគ្គលិក​គ្រប់​ហ៊ុន​ឯកជន​មួយ​អស់​រយៈ​ពេល ៣ ឆ្នាំ និង​មាន​កូន​មួយ​ទៅ​ហើយ ក៏​ប៉ុន្តែ​អ្នក​ស្រី​នៅ​តែ​រស់​នៅ​ផ្ទះ​ជួល​ដដែល។

អ្នក​ស្រី​និយាយថា៖ «ផ្ទះ​ឪពុក​ម្តាយ​ខ្ញុំ​នៅ​ឯខេត្ត ហើយ​ផ្ទះ​ឪពុក​ម្តាយ​ក្មេក​ខ្ញុំ​តូច​ពេក។ ខ្ញុំ​តែង​តែ​ស្រមៃ​ចង់​បាន​ផ្ទះ​មួយ​ជារ​បស់​ខ្លួន​ឯង ក៏​ប៉ុន្តែ​លុយ​វា​មិន​ចេះ​នៅ​សល់​សោះ ព្រោះ​ចំណាយ​ច្រើន​ណាស់។ ក្តី​សង្ឃឹម​ចុងក្រោយ​គឺ​ ការ​ឡើង​តំណែង​របស់​ប្តី​ខ្ញុំ និង​បាន​ប្រាក់​ខែ​ច្រើន​ជាង​មុន អាច​ឲ្យ​យើង​ទិញ​ផ្ទះ​បង់​រំលោះ​បាន»។

ដោយ​ឡែកលោក​ ផន សុខជា ជា​បុគ្គលិក​ផ្នែក​ទីផ្សារ​នៅ​ក្រុម​ហ៊ុន​ឯកជន​មួយបាន​លើក​ឡើង​ថា លោក​គឺ​ជា​មនុស្ស​ម្នាក់​ដែល​មាន​សំណាង​ដ៏​កម្រ ព្រោះ​ម្តាយ​ក្មេក​របស់​លោក​បាន​ជួយ​លោក​ក្នុង​ការ​ដោះ​ស្រាយបញ្ហា​ផ្ទះ​រស់​នៅ​ក្រោយ​ពី​រៀប​ការ​នេះ។

លោក​និយាយថា៖ «កាល​ពី​បី​ឆ្នាំ​មុន មុន​ពេល​ខ្ញុំ​ការ​បន្តិច គ្រួសារ​ខាង​ប្រពន្ធ​ខ្ញុំ​បាន​ទិញ​ផ្ទះ​ល្វែង​មួយ​ទំហំ ៤ គុណ​នឹង ១៤ ម៉ែត្រ ទុក​សម្រាប់​យើង​ទាំង​ពីរ​រស់​នៅ​ក្រោយ​ពេល​រៀបការ ជួយ​ឲ្យ​ខ្ញុំមិន​បាច់​ព្រួយ​បារម្ភ​រឿង​ផ្ទះ។ បើ​ទោះ​ជា​គ្មាន​ផ្ទះ ក៏​ខ្ញុំ​មិន​ពិបាក​រស់​នៅ​ជាមួយ​ឪពុក​ម្តាយ​ក្មេក​ខ្ញុំ​ដែរ ព្រោះ​ម្តាយ​ក្មេក​របស់​ខ្ញុំស្រលាញ់​ខ្ញុំ​ណាស់»។

យោង​តាម​របាយការណ៍​របស់​ធនាគារ​ពិភពលោកកាល​ពី​ឆ្នាំ ២០១៤ ប្រមាណ ២១ ភាគរយនៃ​ប្រជាជន​កម្ពុជា ដែល​ភាគ​ច្រើន​ជាង​យុវវ័យ​អាយុ​ក្រោម ៣០ ឆ្នាំ ​រស់​នៅ​ក្រោម​បន្ទាត់​ភាព​ក្រី​ក្រ​ជាមួយ​នឹង​ចំណោល​ក្រោម ១,២៥ ដុល្លារ (៦ពាន់​រៀល) ក្នុង​មួយ​ថ្ងៃ​ ខណៈ​៥៦ ភាគរយ​គឺ​ប្រជាជន​រស់​នៅ​ក្នុង​ភាពក្រីក្រ ដែល​អាច​ចំណាយ​បាន​ត្រឹម​ពី ១,២៥ ដុល្លារ ទៅ ២,៥០ ដុល្លារ​ក្នុង​មួយ​ថ្ងៃ។ ២០​ ភាគរយ​គឺ​ជា​ប្រជាជន «ឋានៈ​កណ្តាល»​ ហើយ​មាន​តែ ៣ ភាគរយ​តែ​ប៉ុណ្ណោះ​ដែល​មាន​ជីវភាព​ធូធារ ដែល​អាច​ចំណាយ​បាន​លើស​ពី ៥,៤ ដុល្លារ​​លើ​ការ​ទិញ​ទំនិញ​ក្នុង​មួយ​ថ្ងៃៗ។

លោក សន សៀប អគ្គនាយក​ក្រុម​ហ៊ុន​ផ្តល់​សេវា​អចលទ្រព្យ ឃី រៀល​អេស្ទេត (Key Real Estate) បាន​លើក​ឡើង​ថា ការ​ទិញ​ផ្ទះបង់​រំលោះ​អាច​នឹង​ជា​ជម្រើស​ល្អ​បំផុត​សម្រាប់​គូ​ស្វាមី​ភរិយា​វ័យ​ក្មេង ដែល​ត្រូវ​ការ​ជា​ចំាបាច់​នូវ​ជម្រក​មួយ​សម្រាប់​ការ​កសាង​គ្រួសារ​ថ្មី និង​ជៀស​វាង​នូវការ​ទាស់ទែង​នានា ក៏​ដូចជា​ការ​មើល​មុខ​គ្នា​មិន​ចំ​ ដែល​អាច​កើត​មាន​ឡើង​នៅ​ពេល​ទៅ​នៅ​ជាមួយ​ឪពុកម្តាយ​ក្មេក។

លោក​និយាយថា៖ «ផ្ទះ​នៅ​ក្នុង​ក្រុង​មាន​តម្លៃ​ថ្លៃណាស់​មិន​ងាយ​មាន​នរណា​មាន​លទ្ធភាព​ទិញ​បាន​ឡើយ ក៏​ប៉ុន្តែផ្ទះ​ដែល​នៅ​ឆ្ងាយ​ពី​ក្រុង​បន្តិច​មាន​តម្លៃ​ត្រឹម​ចន្លោះ​ពី ៤ ម៉ឹន ទៅ ៦ ម៉ឹន​ដុល្លារ ដែល​ជា​តម្លៃ​ដែល​គូ​ស្វាមី​ភរិយា​ឋានៈ​កណ្តាល​អាច​ទិញ​បង់​រំលោះ​បាន»។

លោក​បន្តថា៖​«ជាទូទៅ​នៅ​ពេល​បច្ចុប្បន្ន​នេះការ​ខ្ចី​ប្រាក់​ធនាគារ​ទិញ​ផ្ទះ​គឺ​ជា​ជម្រើស​ដែល​ចំណេញ​ជាង​ការ​ទិញ​ផ្ទះ​បង់​រំលោះ ដោយ​ធនាគារ​មាន​ការ​ប្រាក់​ខ្ទង់ ៨ ភាគរយ ខណៈ​ប្រតិបត្តិ​ករលក់​ផ្ទះ​មាន​​ដល់ទៅ ១២ ភាគរយ។ គូស្វាមី​ភរិយា​ត្រូវ​បង់​មួយ​ខែ​ចន្លោះ​ពី ៣០០ ទៅ ៥០០ ដុល្លារ រយៈ​ពេលពី ១៥ ទៅ ២០ ឆ្នាំ។ ប្រសិនជា​ពួក​គេ​មាន​ជំនាញ និងការងារ​ច្បាស់​លាស់ ព្រម​ទាំង​ផែនការ​ហិរញ្ញវត្ថុ​ត្រឹម​ត្រូវ ពួក​គេ​ពិត​ជា​អាច​ទទួល​បាន​នូវ​ផ្ទះ​នោះ»៕

0

Comments

Please, login or register to post a comment