Search form

Login - Register | FOLLOW US ON

Logo of Phnom Penh Post newspaper Phnom Penh Post - «ទឹកក្រហម» ជយ​លាភី​លេខ ១ ក្នុង​ការ​​ប្រកួត​ភាពយន្ដ​ខ្នាត​ខ្លី​ថ្នាក់​ជាតិ​លើក​ដំបូង​

Content image - Phnom Penh Post

«ទឹកក្រហម» ជយ​លាភី​លេខ ១ ក្នុង​ការ​​ប្រកួត​ភាពយន្ដ​ខ្នាត​ខ្លី​ថ្នាក់​ជាតិ​លើក​ដំបូង​

ភ្នំពេញៈ ​«ទឹក​ក្រហម» ​រឿង​បង្ហាញ​ពី​បទ​ពិសោធ​ពិត​របស់​នារី​រក​ស៊ី​ផ្លូវ​ភេទ បាន​ឈ្នះ​ជយលាភី​លេខ ១ ​ក្នុង​ការ​​ប្រកួត​ភាពយន្ដ​ខ្នាត​ខ្លី​ថ្នាក់​ជាតិ​លើកដំបូង​ឆ្នាំ ២០១៦ របស់​ក្រសួង​វប្បធម៌​ ដែល​​បាន​បញ្ចប់​កាល​ពី​ថ្ងៃ​សៅរ៍​​សប្ដាហ៍​មុន។

យុវជន​វ័យ ២៧ឆ្នាំ លី ​ប៉ូឡែន ដែលជា​ម្ចាស់​ស្នាដៃ​ភាព​យន្ដ​ខ្នាតខ្លី​លេខ ១ នេះ​ ​ប្រាប់ LIFT ថ្ងៃនេះថា ភាព​យន្ដ​ខ្នាត​ខ្លី​ ​«ទឹក​ក្រហម​​» ​នេះ​ គឺ​ជា​រឿង​ដែល​មាន​អាថ៍​កំបាំង​ច្រើន ​និយាយ​ពី​ជីវិត​ស្រ្ដី​រក​ស្រី​ផ្លូវ​ភេទ​ម្នាក់​កំពុង​មាន​វិបត្ដិ ​និង​​មិន​ហ៊ាន​យក​រឿង​ពិបាក​នៅ​ក្នុង​ចិត្ដ​ប្រាប់​គេ​ផ្សេង​ឲ្យ​ដឹង ​ដែល​​យុវជន​រូបនេះ​យល់​ឃើញ​ថា នេះ​ជា​វប្ប​ធម៌​នៃ​ផ្នត់​គំនិត​មួយ​របស់​ប្រជាជន​​ខ្មែរ​ មិន​ហ៊ាន​បញ្ចេញ​ព្រោះ​ខ្លាច​អាម៉ាស​មុខ។

ប៉ូឡែន ថ្លែងថា ​«រឿង​នេះ​ខ្ញុំ​ចង់​ឲ្យ​ពួក​គាត់​ហ៊ាន​និយាយ​ ពិសេស​ស្រ្ដី​ដែល​មាន​រឿង​ពិបាក​នៅ​ក្នុង​ចិត្ដ​ ពេល​ដែល​ពួកគេ​​និយាយ​ចេញ​មក​ក្រៅ​ ពេល​នោះ​ពួកគេ​នឹង​មាន​សេរី​ភាព​»។

ជយ​លាភី​លេខ ១ ដែល​រើស​ចេញ​ពី​រឿង​ខ្លី​ចំនួន​ ១៨ រឿង​ដែល​បាន​ដាក់​ចូល​រួម​ប្រកួត​នោះ បាន​ទទួល​រង្វាន់ ពាន​មាស​មួយ ​និង​ថវិកា​ចំនួន ៣ ០០០ ​ដុល្លារ​អាមេរិក។

បើតាម​ យុវជន​កូន​ទោល​​ក្នុង​គ្រួសារ​កសិករ​នៃ​ទឹក​ដី​ខេត្ដ​ កណ្ដាល ​រូប​នេះ​បាន​ឲ្យ​ដឹង​ថា រឿង «ទឹកក្រហម»​ចាប់​​ផ្ដើម​សរសេរ​ក្នុង​​ឆ្នាំ​ ២០១៣​ និង​ចាប់​ផ្តើម​ថត​មួយ​ឆ្នាំ​ក្រោយ​មក ដែល បាន​ចំណាយ​ថវិកា​ប្រមាណ​ ២៥០០ ដុលា្ល​រអាមេរិក​ក្នុង​ការ​ថត​។

យុវជន​ជា​ផលិតករ ផលិត​ភាពយន្ដ​ឯកសារ​រូប​នេះ បានបន្ថែមថា រូបគេ​ធ្លាប់​ជា​និស្សិត​សិក្សា​ជំនាញ​ផ្នែក​ពេទ្យ​ប៉ុន្តែ​បាន​សម្រេច​ចិត្ត​បោះបង់​ការ​សិក្សា​នេះ​ចោល ដោយ​ចាប់​ជំនាញ​ថត​ភាពយន្ដ​វិញ ដែល​ជា​ជំនាញ​ យុវជន​រូបនេះ​​ស្រឡាញ់​តាំង​ពី​តូច។

លី ​ប៉ូឡែន និយាយ​​​ថា​ «​ខ្ញុំ​បាន​ចំណាយ​ពេល​គិត​រយៈ​ ១ ឆ្នាំ​ ដើម្បី​សម្រេច​ចិត្ដ ​ហើយ​ខ្ញុំគិត​ថា ​ការ​សម្រេច​ចិត្ដ​របស់​ខ្ញុំ​ត្រូវ ​ព្រោះ​បន្ទាប់​មក​ការ​ងារ​ដែល​ខ្ញុំ​បាន​ធ្វើ​នេះ​ ធ្វើ​ឲ្យ​ខ្ញុំ​សប្បាយ​ចិត្ដ​ អាច​រស់​នៅ​ជា​មួយ​វា​បាន​ ទោះ​ពេល​​ខ្លះ​ជួប​ភាព​បរាជ័យ​ខ្លះ​ក៏​ដោយ​»។

ក្រៅពី​បាន​ជាប់​លេខ ១​ ក្នុង​ការ​ប្រកួត​ភាព​យន្ដ​ខ្នាតខ្លី​ យុវជន​ ប៉ូឡែន​ បាន​ប្រាប់​ឲ្យ​ដឹង​ដែរ​ថា រូប​គេ​ធ្លាប់​បាន​ដឹក​នាំ​ថត​រឿង​បាន​ជាង ​១០ ​រឿង​រួច​មក​ហើយ​ រឿង​មួយ​ចំនួន​បាន​ទទួល​រង្វាន់​នៅ​ក្រៅ​ទេ​ស ​និង​រឿង​ខ្លះ​ទៀត​បាន​ថត​ជា​ភាព​យន្ដ​ឯកសារ​នៅ​តាម​អង្គការ​ជាតិ​ និង​អន្ដរ​ជាតិ​មួយ​ចំនួន​ផង​ដែរ​៕

0

Comments

Please, login or register to post a comment

ព័ត៌មានពាក់ព័ន្ធ