Search form

Login - Register | FOLLOW US ON

Logo of Phnom Penh Post newspaper Phnom Penh Post - គម្រោង «កូនឫស្សី» នឹង​ជួយ​កុមារ ៤​ពាន់​នាក់​ទទួល​បាន​សេវា​អប់រំ និង​សុខ​ភាព

Content image - Phnom Penh Post
គម្រោង «កូនឫស្សី» នឹង​ជួយ​កុមារ ៤​ពាន់​នាក់​ទទួល​បាន​សេវា​អប់រំ និង​សុខ​ភាព។

គម្រោង «កូនឫស្សី» នឹង​ជួយ​កុមារ ៤​ពាន់​នាក់​ទទួល​បាន​សេវា​អប់រំ និង​សុខ​ភាព

ភ្នំពេញ៖ កុមារ​ជន​ជាតិ​ដើម​ភាគ​តិច​ ៤០០០ នាក់រស់​នៅ​ភូមិ​តំបន់​ដាច់ស្រយាល ក្នុង​ខេត្ដ​ពីរ នឹង​ទទួល​​បាន​សេវាផ្នែក​អប់រំ និង​សុខ​ភាព​ក្រោមការជួយពីអង្គការ ភ្លែន​អន្តរជាតិ​និង​អង្គការ​ដៃគូ​បណ្តុះ​កុមារ​លើ​គម្រោង ​«កូនឫស្សី»​ (គាំពារ និង​អភិវឌ្ឍន៍​កុមារ​តូច) ​រយៈ​ពេល​បីឆ្នាំ​ (២០១៧-២០២០)​។

គម្រោងនេះ​ធ្វើឡើង​​ក្នុង​ស្រុក​ចំនួន​ ៤ នៃ​ខេត្ត​រតនគិរី ​(រួមមាន​ បរកែវ ​អូរជុំ​ តាវែង ​និង​វឺន​សៃ)និង​​ស្រុក​ចំនួន​ ២ ​នៃខេត្ត​ស្ទឹង​ត្រែង ​(សៀមប៉ាង ​និង​ថាឡាបរីវ៉ាត)​ ក្នុង​គោល​បំណង​ជួយ​ ក្មេង​ស្រី​និង​ក្មេង​ប្រុស​ដែល​មិន​ទទួល​បាន​ការ​យក​ចិត្ត​ទុក​ដាក់​បំផុត​ ជាពិសេស​កុមារជន​ជាតិ​ដើម​ភាគ​តិច​អាយុ​ពី ០-៦​ ឆ្នាំ​ប្រមាណ ​៤០០០នាក់ ​ឲ្យ​លូត​លាស់​ប្រកប​ដោយ​សុខ​ភាព​ល្អ​ រីករាយ​និង​ត្រៀម​ខ្លួន​ចូល​រៀន​ថ្នាក់​បឋម​សិក្សា។

លោក ​យី ​គឹមថាន ​ប្រធាន​គ្រប់គ្រង​កម្មវិធី​ថ្នាក់​ជាតិ​របស់​អង្គការ​ភ្លែន​អន្តរ​ជាតិ​ បាន​លើក​ឡើង​ថា៖ «គម្រោង ​កូន​ឫស្សី ​នឹង​ផ្តល់​សេវា​សំខាន់ៗ​ដល់​កុមារ​តូចៗ​ អាយុក្រោម​ ៦ ឆ្នាំ​ ឲ្យ​ពួក​គាត់​មាន​ឱកាស​រៀន​សូត្រ​ និង​អភិវឌ្ឍ​សក្តានុពល​ពេញ​លេញ​ដើម្បី​ត្រៀម​ខ្លួន​ក្នុង​ការ​ចាប់​យក​ចំណេះ​ដឹង​នៅ​សាលា​បឋម​សិក្សា»។

តាម​របាយ​ការណ៍​អង្កេត​ប្រជាសាស្ត្រ​ និង​សុខភាព​កម្ពុជា​ឆ្នាំ ២០១៤​ កុមារ​តូច​នៅ​កម្ពុជា ​មិន​ត្រឹម​តែ​ត្រូវ​ការ​អន្តរាគមន៍​ផ្នែក​អប់រំ​ប៉ុណ្ណោះ​ទេ ​ពួកគេ​ក៏​ត្រូវការ​ការ​អន្តរាគមន៍​ផ្នែក​សុខភាព​ផងដែរ។

លោក ​យី គឹមថាន ​បន្ថែម​ថា ​៖ ​«គម្រោង​នេះ​មិន​គ្រាន់​តែ​រួម​បញ្ចូល​សមាសធាតុ​អប់រំ​ ថែម​ទាំង​ផ្តោត​លើ ​សុខភាព​ អាហា​រូបត្ថម្ភ​ ទឹក​ស្អាត​ អនាម័យ​ និង​ការ​ភ្ញោច​កុមារ​​ពីតូច ​តាម​រយៈ​ការ​គាំទ្រ​និង​ការ​បង្កើន​ការ​យល់​ដឹង​របស់​ឳពុក​ម្តាយ​ និង​សហគមន៍​និង​ការ​បង្កើន​គុណ​ភាព​អបរំ​របស់​សាលា​មតេ្តយ្យ​សហគមន៍»។

ដោយឡែក ​ចំពោះ​ការស្រាវ​ជ្រាវ​ដោយ​អង្គការ​ភ្លែន​អន្តរ​ជាតិ​ នៅ​តំបន់​គោលដៅ​ខេត្ត​សៀម​រាប​បាន​បង្ហាញ​​ថា ​កុមារ​ដែល​មាន​អាយុ ​៣-៦​ឆ្នាំ ​រស់​នៅក្នុង​ភូមិ​ ដែល​អនុវត្ត​កម្មវិធី​គាំពារ​និង​អភិវឌ្ឍន៍​កុមារ​តូច​គ្រប់​ជ្រុង​ជ្រោយ​រៀន​ពូកែ ​និង​សកម្ម​ជាង​កុមារ​ដែលមិន​ទទួល​បាន​កម្មវិធី​នេះ​និង​មិន​សូវ​ប្រឈម​នឹង​ជំងឺ​ក្រិន កង្វះ​ជីវជាតិ​​នោះ​ទេ​។

គួររម្លឹកថា ​អង្គការ​ភ្លែន​អន្តរ​ជាតិ ​បាន​សហការ​ជាមួយ​អង្គការ​ដៃគូ​ក្នុង​ស្រុក ​បង្កើត​​ឲ្យមាន​សាលា​មតេយ្យ​សហគមន៍​ ជិត​៤០០ ​និង​ ក្រុម​ឪពុក​ម្តាយ ​ប្រមាណ​១៦០០ ​ក្នុង​ខេត្ត​ចំនួន ​៤ (សៀមរាប រតនគិរី ​ស្ទឹង​ត្រែង​ និង​ត្បូង​ឃ្មុំ)​ ដែល​ជាតំបន់​ប្រតិបត្តិ​ការ​របស់​អង្គការ​ភ្លែន​អន្តរ​ជាតិ៕

0

Comments

Please, login or register to post a comment

ព័ត៌មានពាក់ព័ន្ធ