កម្ដៅនយោបាយកំពុងមានកម្ដៅខ្លាំង នេះបើតាមការប្រតិកម្មរបស់អង្គការក្រៅរដ្ឋាភិបាល និងគណៈបក្សឆាំងមួយចំនួននាពេលថ្មីៗនេះ ខណៈដែលគណៈបក្សកាន់អំណាចបានបកស្រាយផ្ទុយទៅវិញថា បរិយាកាសនាពេលនេះ គ្រាន់តែជាការអនុវត្ដន៍តាមផ្លូវច្បាប់ប៉ុណ្ណោះ មិនមានការកើនឡើងកម្ដៅនយោបាយអ្វីឡើយ ។ ដោយឃើញនិន្នាការពីរមានភាពផ្ទុយគ្នាដូច្នេះ ថ្ងៃនេះ LIFT បានជួបសម្ភាសន៍ជាមួយនឹងយុវជន មួយចំនួនដែលជានិស្សិតកុំពុងសិក្សា និងធ្វើការងារនៅក្នុងទីក្រុងភ្នំពេញ អំពីទស្សនៈ ចំពោះកម្ដៅនយោបាយនាពេលនេះ ថាតើការយល់ឃើញជាក់ស្ដែងនៃក្រុមយុវជនយ៉ាងណាដែរចំពោះរឿងនេះ? តើការយល់ដឹងអំពីនិន្នានយោបាយរបស់ពួកគេមានការផ្លាស់ប្ដូរយ៉ាងណាហើយ បើធៀបទៅអតីតកាល? តើការចង់បានពិតប្រាកដរបស់ពួកគេ ពីនយោបាយគឺជាអ្វី ?
យុវតី រស់ ធារះ និស្សិតនៅសាកលវិទ្យាល័យ UC យល់ឃើញចំពោះរឿងនេះថា៖ «យើងអាចនិយាយបានថា វាអាចឡើងកម្ដៅមួយផ្នែក និងមួយផ្នែកទៀតវាស្ថិតនៅធម្មតា ដោយសាតែខាងគណបក្សប្រឆាំងពួកគាត់កំពុងតែមានបញ្ហា ទាក់ទងនៅនឹងបណ្ដឹងនៃរឿងផ្ទាល់ខ្លួនរបស់គាត់។ ប៉ុន្ដែសម្រាប់ខ្ញុំរឿងផ្ទាល់ខ្លួនរបស់គាត់ គឺគ្មានរឿងអ្វីដែលត្រូវលើកយកមកនិយាយជាមួយនយោបាយទេ។ ព្រោះខ្ញុំគិតថាធម្មតាមនុស្សយើងម្នាក់ៗតែងតែមានសិទ្ធក្នុងការជ្រើសរើសដោយខ្លួនឯង»។
ធារះ បន្ដថា៖ «ការឡើងកម្ដៅនេះ ទោះមើលទៅដូចជាមានកម្ដៅខ្លាំង ប៉ុន្ដែបើមិនទាន់មានការធ្វើបាតុកម្ម ដូចកាលកន្លងមក ខ្ញុំគិតថា កម្ដៅនេះវាមិនមានផលប៉ះពាល់អ្វីដល់ការសិក្សា និងការងាររបស់ក្រុមយុវជន និងនិស្សិតនោះទេ»។
ក្នុងនាមជាយុវតីមួយរូបនៅក្នុងសង្គម ធារះ បានយល់ឃើញថា នាពេលបច្ចុប្បន្ននេះក្រុមយុវជន ពួកគាត់មានការផុសផុលជាងមុនចំពោះរឿងនយោបាយ បើធៀបទៅកាលពីប៉ុន្នានឆ្នាំមុន ព្រោះយុវជននាំគ្នាស្វែងយល់ ពីព័ត៌មាន និងចំណេះដឹងនៃនយោបាយនេះកាន់តែខ្លាំង។
|
យុវជន ពូ នាង រស់នៅម្ដុំទួលសង្កែ និង ជានិស្សិតបញ្ចប់ការសិក្សាលើជំនាញ Design ដែលកុំពុងធ្វើការនៅក្រុមហ៊ុនឯកជនមួយក្នុងទីក្រុងភ្នំពេញ យល់ឃើញចំពោះនិន្នាការនយោបាយនាពេលនេះថា៖«តាមពិតអ្វីដែលពួកយើងបានមើលឃើញ គឺជាការពិត ប៉ុន្ដែអ្នកផ្សេងគេចាត់ទុកដូចជារឿងធម្មតាទៅវិញ នេះបើនិយាយចំពោះស្ថានការណ៍នយោបាយនាពេលនេះ»។
លោកបន្ដថា៖«បើនិយាយចំពោះបញ្ហានៃកម្ដៅនយោបាយ ចំពោះយុវជនវិញ ពិតប្រាកដណាស់ វាពិតជាមានផលប៉ះពាល់តាំងពីសុវត្ថិភាព និងរឿងផ្សេងៗ គឺត្រូវគិតម៉ាចប់តែម្ដង! មានក្រុមយុវជនខ្លះ ដោយសាកម្ដៅនេះ អាចបណ្ដាលឲ្យពួកគាត់ខ្លាច លែងហ៊ាននិយាយ លែងហ៊ានឆ្លើយក៏មាន ដូចកូនខ្អាត់អញ្ចឹង ហ៊ានតែអ៊ើតករ មិនបាន»។
|
ចំណែកយុវនិស្សិត គា រដ្ឋា កំពុងសិក្សានៅសាកលវិទ្យា ភូមិន្ទនិតិសាស្រ្ដ និងវិទ្យាសាស្រ្ដសេដ្ឋកិច្ច និងបច្ចុប្បន្នជាបុគ្គលិកក្នុងអង្គការក្រៅរដ្ឋាភិបាលមួយក្នុងទីក្រុងភ្នំពេញ មានទស្សនៈចំពោះរឿងកម្ដៅនយោបាយនេះដែរថា៖«សម្រាប់ខ្ញុំ យល់ឃើញថា និន្នាការនយោបាយក្នុងប្រទេសកម្ពុជាយើងនាពេលបច្ចុប្បន្ននេះ បានបែងចែកចេញជាពីរ ទី១ក្នុងប្រទេសយើងសព្វថ្ងៃរបៀបក្នុងការដឹងនាំស្រុកទេស គឺហាក់បីដូចជាបែងចែកអំណាចធំៗទាំងបីមិនដាច់ពីគ្នាគឺអំណាចនីតិបញ្ញត្ដិ នីតិប្រតិបត្តិ និងអំណាចតុលាការ។ ព្រោះយើងបានដឹងហើយ ប្រទេសកម្ពុជា ក៍ដូចជាប្រទេសដែលកាន់របបប្រជាធិប្បតេយ្យផ្សេងទៀតអំណាចធំទាំង ៣ គឺត្រូវបានចែកដាច់ពីគ្នា ដោយអំណាចនីមួយៗ អាចកែលម្អគ្នាទៅវិញទៅមក ដោយយកតាមគោលការច្បាប់។ ប៉ុន្ដែសព្វថ្ងៃអំណាចទាំងបីនេះហាត់បីដូចជាបែងចែកមិនដាច់ពីគ្នាសោះដែលធ្វើអោយអំណាចនិតិប្រតិបត្ដិអាចទាញអំណាចពីរទៀតគឺ (និតិបញ្ញត្ដិ និង តុលាការ) មកគាំទ្រតែអំណាចនិតិប្រតិបត្ដិទៅវិញ ដែលជាហេតុធ្វើឲ្យការដឹងនាំស្រុកទេសមិនសូវបានល្អ។
យុវជន រដ្ឋា បន្ថែមចំពោះការមើលឃើញរស់លោកទៅលើក្រុមយុវជននៃទំនោ និងនិន្នាការនាពេលនេះដែរថា៖«យុវជនរបស់យើងមួយចំនួន នៅមាននិន្នាការរបស់ខ្លួន ចំពោះបញ្ហានយោបាយនេះ ទៅតាមតែគ្នា និងតាមចំនួននៃសម្លេងអ្នកគាំទ្រតាមគណបក្សនយោបាយនីមួយៗនៅឡើយ។ ប៉ុន្ដែចំពោះខ្ញុំវិញ គឺគិតផ្ទុយពីពួកគាត់ បើយើងយកខួក្បាលរបស់យើងទៅគិតអំពីរបត់នយោបាយវិញនោះ យើងនឹងដឹងកាន់តែច្បាស់ថាតើគោលនយោបាយរបស់គណៈបក្សមួយណាដែលល្អសម្រាប់ការដឹកប្រទេស»។
យុវជន រដ្ឋា បញ្ជាក់បន្ថែមថា៖«យុវជនគប្បីនាំគ្នា ព្យាយាមយកចិត្ដទុកដាក់ សិក្សាស្វែងយល់ឲ្យកាន់តែស៊ីជម្រៅ ចំពោះបញ្ហានយោបាយ ដោយការសិក្សាស្រាវជ្រាវ អំពីច្បាប់ និងចំណេះដឹងដែលទាក់ទងនឹងនយោបាយ»។
|
Contact PhnomPenh Post for full article
Post Media Co LtdThe Elements Condominium, Level 7
Hun Sen Boulevard
Phum Tuol Roka III
Sangkat Chak Angre Krom, Khan Meanchey
12353 Phnom Penh
Cambodia
Telegram: 092 555 741
Email: webmasterpppost@gmail.com