Search form

Login - Register | FOLLOW US ON

Logo of Phnom Penh Post newspaper Phnom Penh Post - បណ្ណាគារ​លក់​សៀវភៅ ​ប្រើប្រាស់​ការ​ច្នៃ​ប្រឌិត​ថ្មី​ ដើម្បី​បន្ត​ជីវិត​អាជីវកម្ម​របស់​ខ្លួន

Content image - Phnom Penh Post
លោក Miura ថ្លែង​ប្រាប់​អ្នក​យក​ព័ត៌មាន​ថា​ ៖ អ្នក​ដែល​មក​រក​សៀវភៅ​នៅ​ទីនេះ​នឹង​មិន​ពេញ​ចិត្ត​មួយ​រយ​ភាគរយ​នៅពេល​រកឃើញ​សៀវភៅ​ដែល​ខ្លួន​ចង់បាន​នោះទេ​។ រូបភាព​ដោយ The Japan News/Asia News Network

បណ្ណាគារ​លក់​សៀវភៅ ​ប្រើប្រាស់​ការ​ច្នៃ​ប្រឌិត​ថ្មី​ ដើម្បី​បន្ត​ជីវិត​អាជីវកម្ម​របស់​ខ្លួន

បណ្ណាគារ​តូចៗ​មួយ​ចំនួន​កំពុងតែ​ព្យាយាម​ច្នៃប្រឌិត​ទីកន្លែង​របស់​ខ្លួន​ឲ្យ​ប្លែកៗ​ពីគ្នា ដើម្បី​បង្កើន​ភាព​ទាក់ទាញ​ក្នុង​វិស័យ​លក់​សៀវភៅ ដោយ​សារ​ការធ្លាក់ចុះ​នៃ​តម្រូវការ​សៀវភៅ​បោះពុម្ព និង​កំណើន​ឧបករណ៍​អាន​សៀវភៅ​អេឡិច​ត្រូនិក​ជំនួស​វិញ​។

បណ្ណាគារ​ទាំង​នេះ​កំពុង​តែ​ស្វែងរក​នូវ​គុណ​តម្លៃ​ថ្មីៗ ដើម្បី​បន្ថែម​ទៅលើ​របៀបរបប​នៃ​កន្លែង​លក់​សៀវភៅ​របស់​ខ្លួន ដោយ​ពួកគេ​ទិញ​សៀវភៅ​ពី​កន្លែង​បោះ​ដុំ​ដើម្បី​លក់​។ ម្ចាស់​បណ្ណាគារ និង​អ្នក​គ្រប់គ្រង​កំពុង​តែ​រិះរក​វិធី​ថ្មីៗ ដើម្បី​ធ្វើយ៉ាងណា​ឲ្យ​បណ្ណាគារ​នៅតែ​អាច​ដំណើរការ​ក្នុង​ពេល​អនាគត​។

ការ​លក់​សៀវភៅ​គឺ​អាស្រ័យ​តាម​រយៈ​បទពិសោធ​នៃ​ការ​អាន​កាល​ពី​ដើម​ខែ​វិច្ឆិកា​កន្លង​ទៅ មានកម្ម​វិធី​បង្រៀន​មួយ​សម្រាប់​អ្នក​សរសេរ ដែល​ត្រូវ​បាន​រៀបចំ​ឡើង​នៅ​បណ្ណាគារ Tenroin Shoten ដោយ​លោក Takanori Miura អាយុ​ ៤០ ​ឆ្នាំ​ជា​ម្ចាស់​ហាង​នេះ ក្នុង​ទីតាំង Ikebukuro នៃ​ទីក្រុង​តូក្យូ​។ កម្មវិធី​នោះ​មាន​អ្នក​ចូលរួម​យ៉ាង​ច្រើន​បើ​ទោះ​ជា​កន្លែង​នោះ​មាន​ទំហំ​ត្រឹមតែ​ ៤០ ​ម៉ែត្រការ៉េ​នៅ​ជាន់​ទី​ ២ ក្នុង​អគារ​ជួល​ចម្រុះ​មួយ​ក៏ដោយ​។

លោក Miura បាន​ថ្លែង​ប្រាប់​អ្នក​ចូលរួម​ថា ៖ «​ដើម្បី​ធ្វើ​ឲ្យ​គេ​អាន​សៀវភៅ​របស់​អ្នក​ពី​ដើម​ដល់​ចប់ អ្នក​ត្រូវ​ដឹង​អំពី​របៀប​សរសេរ លំហូរ​នៃ​សាច់រឿង​ដែល​ងាយ​ស្រួល​សម្រាប់​ការអាន​។ ប្រសិន​បើ​ការ​សរសេរ​នោះ​ធ្វើ​ឲ្យ​អ្នកអាន​ជួប​ការ​លំបាក វា​នឹង​ធ្វើ​ឲ្យ​ពួក​គេ​អស់​អារម្មណ៍​អាន​ហើយ​នឹង​បិទ​សៀវភៅ​ជា​មិន​ខាន​»​។

លោក​បាន​លើក​ឡើង​អំពី​តិច​និក​នៃ​ការ សរសេរ​ដូចជា ការប្រើ​សញ្ញា​អញ្ញ​ប្រកាស (​ធ្មេញ​កណ្តុរ​) បែប​ជប៉ុន​នៅ​ផ្នែក​ខាង​ដើម នៃ​ការ​សរសេរ និង​ការប្រើ​ពាក្យ​ទាក់ទាញ​ភ្នែក​អ្នក​អាន​ក្នុង​ចំណង​ជើង​។ «​ក្រោយ​ពេលដែល​ខ្ញុំ​បាន​ចូល​រួម​ជាមួយ​ក្រុមហ៊ុន​របស់​ខ្ញុំ នាពេល​បច្ចុប្បន្ន​នេះ ខ្ញុំ​បាន​ដឹង​នូវ​ជម្រៅ​នៃ​សារៈសំខាន់​នៃ​ជំនាញ​ក្នុង​ការ​សរសេរ​ដែល​ស្ថិត​នៅ​ក្នុង​ផ្នែក​នៃ​ការ​ណែ​នាំ​នូវ​អចលនទ្រព្យ​របស់​យើង​លើ​គេហទំព័រ​អ៊ិនធើណិត​» នេះ​បើ​យោង​តាម​សម្តី​របស់​លោក Takumi Hayashi មកពី Hachioji នៅ​ទីក្រុង​តូក្យូ ដែល​ជា​បុគ្គលិក​ក្រុមហ៊ុន​អចលនទ្រព្យ​មួយ​កន្លែង​។

លោក​បន្ត​ទៀត​ថា​៖ «​វគ្គ​សិក្សា​នោះ​ធ្វើ​ឲ្យ​យើង​អាច​យល់ និង​យក​មក​អនុវត្តបាន បើ​ទោះ​ជា​អ្នក​ដែល​មាន​អារម្មណ៍​ថា ពួក​គេ​មិន​ពូកែ​សរសេរ​ក៏​ដោយ​»​។

លោក Miura បាន​បើក​បណ្ណាគារ Tenro-in របស់​លោក​នៅ​តំបន់ Ikebukuro ក្នុង​ឆ្នាំ​២០១៣​។ លោក​ក៏​ជា​អ្នក​គ្រប់​គ្រង​បណ្ណាគារ​នៅក្នុង​ទីក្រុង​ក្យូតុ និង​ហ្វូ​គូ​អូ​កា​ផងដែរ​។ ស្ទើរតែ​រៀងរាល់​សប្តាហ៍ ហាង​សៀវភៅ​នៅ Ikebukuro បាន​រៀបចំ​នូវ​កម្មវិធី​ជាច្រើន​ដូចជា វគ្គ​បង្រៀន​ដែល​មិន​មែន​តែ​រៀបចំឡើង​សម្រាប់​អ្នកសរសេរ​នោះទេ ប៉ុន្តែ​ក៏​សម្រាប់​អ្នក​ថតរូប និង​កវីនិពន្ធ​ប្រលោម​លោក និង​វគ្គ​បង្រៀន​សន្ទនា​ជា​ភាសា​អង់គ្លេស​ផងដែរ​។

លោក Miura យល់​ឃើញ​ថា​៖ «​អ្នក​ដែល​មករក​សៀវភៅ​នៅទីនេះ​នឹង​មិន​ពេញ ចិត្ត​មួយ​រយ​ភាគរយ នៅ​ពេល​រក​ឃើញ​សៀវភៅ​ដែល​ខ្លួន​ចង់​បាន​នោះ​ទេ​»​។

លោក​បាន​ថ្លែង​តាមរយៈ​ការផ្លាស់ប្តូរ​ពី​ការយល់ឃើញ​របស់លោក​ថា​៖ «​ខ្ញុំ​នឹង​លក់​នូវ​បទពិសោធ​នៃ​ការអាន​ជំនួស​វិញ​។ ខ្ញុំ​ចង់​បង្កើត​នូវ​គំនិត​ថ្មីៗ​ដូច្នេះ​ហើយ​អ្នក​ដែល​មក​បណ្ណាគារ​របស់​ខ្ញុំ​អាច​អាន​សៀវភៅ​ជាមួយ​នឹង​បទពិសោធ​ច្រើន​បែប​»​។

អាន​បណ្តើរ ក្រេប​ស្រា​បៀរ​បណ្តើរ​បណ្ណាគារ​មួយ​ឈ្មោះ B&B នៅ Shimokitazawa ក្នុង​ក្រុង​តូក្យូ បាន​រីកសាយ​កិត្តិនាម​ជាមួយ​នឹង​ឃ្លា​ដ៏​ទាក់ទាញ​មួយ​ថា ៖ «​បណ្ណាគារ​ដែល​អ្នក​អាច​ផឹក​ស្រា​បៀរ​បាន​»​។

បណ្ណាគារ B&B បាន​បើក​ដំណើរការ​កាលពី​ឆ្នាំ​២០១២ ហើយ​ឈ្មោះ​របស់​កន្លែង​នេះ​ជា​អក្សរ​កាត់​មកពី​ឈ្មោះ​ពេញ​ថា «Book & Beer»​។ ទោះ​នៅ​ពេល​យប់ ជ្រៅ​បណ្ណាគារ​នេះ ក៏​នៅ​មាន​មនុស្ស​យ៉ាង​ច្រើន​ដែល​ចូល​ទៅ​ផឹកស្រា​បៀរ និង​អាហារ​បណ្តើរ អាន​សៀវភៅ​បណ្តើរ​ដែរ​។

ហាង​សៀវភៅ​នេះ​មិន​ពឹង​ពាក់​លើ​កន្លែង​លក់​បោះ​ដុំ​សម្រាប់​ការ​ជ្រើស​រើស​សៀវភៅ​យក​មក​លក់​នោះទេ​។ ក្នុង​ករណី​ភាគច្រើន សៀវភៅ​ដែល​លក់​នៅ​តាម​បណ្ណាគារ គឺជា​សៀវភៅ​ដែល​ត្រូវ​បាន​ជ្រើសរើស​រួច​រាល់​ដោយ​ក្រុមហ៊ុន​បោះ​ដុំ ដោយ​ផ្អែក​លើ​ទិន្នន័យ​នៃ​ការ​ការ​លក់​មុនៗ​។

ផ្ទុយ​មក​វិញ បុគ្គលិក​របស់ B&B ធ្វើការ​ជ្រើសរើស​សៀវភៅ​ដោយ​ខ្លួន​ឯង​យក​មក​លក់​តែម្តង​។ ហាង​នេះ​មិន​មាន​សៀវភៅ​ច្រើន​សន្ធឹក​សន្ធាប់​ដូច​បណ្ណាគារ​សៀវភៅ​ធំៗ​នោះ​ទេ ប៉ុន្តែ​សៀវភៅ​នៅ B&B សុទ្ធ​តែ​ជា​សៀវភៅ​ដែល​ទាក់ទាញ​អ្នក​ស្រឡាញ់​ការ​អាន ដូច​ជា​សៀវភៅ​ធ្វើ​ដោយ​ដៃ និង​សៀវភៅ​រូបភាព​សត្វ​ល្អិត​ច្នៃ​ប្រឌិត​ជាដើម​។

បុគ្គលិក​មួយ​រូប​ក្នុង​ចំណោម​បុគ្គលិក​ផ្សេង​ទៀត​គឺ​លោក Shintaro Uchinuma អាយុ ៣៧​ឆ្នាំ ជា​អ្នក​រៀបចំ​សៀវភៅ​ដែលជា​អ្នក​ជ្រើសរើស​សៀវភៅ​សម្រាប់​បណ្ណាគារ និង​បណ្ណាល័យ​នានា​។ នៅ​ពេល​ដែល​មាន​គ្រោះ​រញ្ជួយ​ផែនដី​នៅ​ភាគ​ខាងកើត​នៃ​ប្រទេស​ជប៉ុន​ក្នុង​ឆ្នាំ​២០១១ លោក​បាន​ឮ​ថា អ្នក​ដែល​នៅ​តាម​តំបន់​រងគ្រោះ​នានា​បាន​ចូល​ទៅ​បណ្ណាគារ​តាម​តំបន់​ដើម្បី​ស្វែងរក​ព័ត៌មាន​។

លោក​យល់​ថា ៖ «​បណ្ណាគារ​ក៏​ជា​ប្រភព​ព័ត៌មាន​ដ៏​សំខាន់​សម្រាប់​សហគមន៍​ក្នុង​តំបន់​ផង​ដែរ​»​។

លោក​ចង់​ឲ្យ B&B ដើរ​តួ​ជា​គម្រូ​មួយ​សម្រាប់​បណ្ណាល័យ​ខ្នាត​តូច និង​ខ្នាត​កណ្តាល​។ ដូច្នេះហើយ B&B បាន​ពង្រីក​ប្រភព​ប្រាក់​ចំណូល​របស់​ខ្លួន ដោយ​មិន​ត្រឹមតែ​បើក​ស្វាគមន៍​ឲ្យ​មាន​ការ​ពិសា​ស្រា​បៀរ និង​អាហារ​ក្នុង​បណ្ណាគារ​នេះ​នោះ​ទេ ប៉ុន្តែ​ក៏​បាន​រៀបចំ​នូវ​កម្មវិធី​ជាច្រើន រួម​ទាំង​វេទិកា​ពិភាក្សា​ជា​រៀង​រាល់​ថ្ងៃ​ជាមួយ​អ្នក​សរសេរ​ផងដែរ​។

លោក Uchinuma ថ្លែងថា ៖ «​នៅ​ពេល​ដែល​មនុស្ស​ហ៊ុមព័ទ្ធ​ទៅ​ដោយ​សៀវភៅ​រាប់ពាន់​រាប់​ម៉ឺន​ក្បាល ពួក​គេ​នឹង​មាន​អារម្មណ៍​ប្លែក​អស្ចារ្យ​នៅ​ពេល​គិតដល់​ព័ត៌មាន​ជាច្រើន​សន្ធឹកសន្ធាប់​ជុំវិញ​ពិភពលោក​។ ឧបករណ៍​អេឡិចត្រូនិក​សម្រាប់​ការអាន​សៀវភៅ​ផ្តល់នូវ​ភាព​ងាយ​ស្រួល ប៉ុន្តែ​សៀវភៅបោះពុម្ព​មាន​ចំណុច​សំខាន់ៗ​ដ៏​ទាក់ទាញ​របស់​វា​ជា​គុណ​តម្លៃ​ពិសេស​»​។

ទីផ្សារ​បោះពុម្ព​កាន់តែ​រួម​តូច​ចំនួន​បណ្ណាគារ​នៅ​ជុំវិញ​ពិភពលោក​បាន​ធ្លាក់​ចុះ​ពី ​១៧ ៩១១​ កន្លែង ក្នុង​ឆ្នាំ​ ២០០៦ មក​នៅ​ត្រឹម​តែ​ ១៤ ០៩៨​ កន្លែង​ប៉ុណ្ណោះ​នៅ​ក្នុង​ឆ្នាំ​ ២០១៦​។ នេះ​បើ​យោងតាម​អង្គការ Japan Publishing Organization for Information Infrastructure Development (JPO) នៅក្នុង​ទីក្រុង​តូ​ក្យូ ដែល​ទទួលបាន​ជំនួយ​ថវិកា​ពី​អង្គការ​ពាក់ព័ន្ធ​នានា​ទៅ​នឹង​ការ​បោះពុម្ព​ផ្សាយ​។

យ៉ាង​ណា​មិញ ទំហំ​នៃ​កន្លែង​លក់​សៀវភៅ​មាន​ការ​កើនឡើង​។ JPO ជឿ​ជាក់​ថា ចំណុច​នេះ​បង្ហាញ​នូវ​ការ​បិទ​ទ្វារ​របស់​បណ្ណាគារ​ខ្នាតតូច និង​កណ្តាល ប៉ុន្តែ​ក៏​បង្កើន​បណ្ណាគារ​ខ្នាត​ធំៗ​វិញ​ដែរ​។

ជា​ការ​ពិត​ទីផ្សារ​បោះពុម្ព​ក៏​កាន់​តែ​រួម​តូច​ទៅៗ​ផងដែរ​។ តាម​ការ​ប៉ាន់​ស្មាន​ទំហំ​ទឹកប្រាក់​នៃ​ការលក់​ពី​វិស័យ​បោះពុម្ព​ក្នុង​ឆ្នាំ​២០១៦ បាន​ធ្លាក់ចុះ​៣,៤០​ភាគរយ បើ​ធៀប​នឹង​ឆ្នាំ​កន្លង​ទៅមក​នៅត្រឹម ១,៤៧​ពាន់​កោដិ​យេន​ដែល​ធ្វើ​ឲ្យ​ការ​ធ្លាក់​ចុះ​នេះ​ក្លាយជា​ការធ្លាក់ចុះ​ប្រចាំ​ឆ្នាំ​លើក​ទី​១២​។ នេះ​បើ​យោង​តាម​វិទ្យាស្ថាន Research Institute for Publications ក្នុង​ទីក្រុង​តូ​ក្យូ​។

ហាង​សៀវភៅ​មួយ​កន្លែង​នៅ​ទីក្រុង​តូ​ក្យូ​ឈ្មោះ Ohraido Shoten បាន​ក្លាយជា​បណ្ណាគារ​ដ៏​ល្បីឈ្មោះ​មួយ​ដោយ​សារ​តែ​ការដាក់​សៀវភៅ​ទៅតាម​ប្រភេទ​ក្រុម និង​ភាព​ប្រាស្រ័យ​ពាក់ព័ន្ធ​រវាង​សៀវភៅ​នីមួយៗ ជាជាង​ការដាក់​សៀវភៅ​ជា​ក្រុម​តាម​ឈ្មោះ​របស់​អ្នក​សរសេរ​។ កម្រៃ​ចំណេញ​របស់ «​បណ្ណាគារ​លក់​សៀវភៅ​» ធៀប​នឹង​ទំហំ​នៃ​ការ​លក់​គឺ​មាន​ទំហំ​តូច‌​ប៉ុណ្ណោះ​»​។ នេះ​បើ​យោង​តាម​លោក Tetsuya Ando ដែលជា​ប្រធាន​គ្រប់គ្រង​ដំបូង​របស់​បណ្ណាគារ Ohraido Shoten​។

«​បន្ថែម​ពី​លើ​កំណើន​នៃ​ការ​លក់​របស់ Amazon.com និង​ហាង​សៀវភៅ​លើ​អ៊ិនធឺណិត​ផ្សេងៗ​ទៀត ការ​លក់​សៀវភៅ​ទស្សនា​វដ្តី​មាន​ការ​ធ្លាក់ចុះ​ជា​បន្ត​បន្ទាប់​។ ជាក់​ស្តែង​បណ្ណាគារ​ខ្នាត​តូច និង​កណ្តាល​កំពុង​តែ​ជួប​នឹង​ការ​លំបាក​»​។

លោក​បន្ថែម​ថា ៖ «​ក្នុង​រយៈពេល​ស្រពេច​ស្រពិល​ជាច្រើន​ឆ្នាំ មនុស្ស​កាន់​តែ​ច្រើន​ស្វែងរក​ចម្លើយ​ពី​សៀវភៅ​។ បណ្ណាគារ​លក់​សៀវភៅ​មាន​តួនាទី​យ៉ាង​សំខាន់​ក្នុង​ការ​ធ្វើ​ជា​មគ្គុទ្ទេសក៍​ណែនាំ​ដល់​សៀវភៅ​ដែល​គេ​ស្វែងរក​។ ខណៈ​កំពុង​ជួប​នឹង​ការ​លំបាក​ដូច​ទៅនឹង​ការ​អុំទូក​បញ្ច្រាស​ខ្យល់​បែប​នេះ ហាង​សៀវភៅ​នានា ដែល​អាច​បង្កើន​ចំនួន​អ្នក​គាំទ្រ​របស់​ខ្លួន​នឹង​ជា​កន្លែង​ដែល​អាច​បន្ត​មាន​ជីវិត​ទៅ​មុខ​ទៀត​»៕

The Japan News

0

Comments

Please, login or register to post a comment

ព័ត៌មានពាក់ព័ន្ធ