Search form

Login - Register | FOLLOW US ON

Logo of Phnom Penh Post newspaper Phnom Penh Post - ភាព​សម្បូរ​បែប​នៃ​សៀវភៅ​អេឡិចត្រូនិក​ នឹង​ជួយ​ជំរុញ​​ការ​អាន​ក្មេងៗ​កម្ពុជា​បាន​ច្រើន

Content image - Phnom Penh Post
ក្រុមក្មេងៗ​មួយ​ក្រុម​អាន​សៀវភៅ ខណៈ​ភាព​សម្បូរ​បែប​នៃ​សៀវភៅ​អេឡិចត្រូនិក​ នឹង​ជួយ​ជំរុញ​​ការ​អាន​ក្មេងៗ​កម្ពុជា​បាន​ច្រើន។

ភាព​សម្បូរ​បែប​នៃ​សៀវភៅ​អេឡិចត្រូនិក​ នឹង​ជួយ​ជំរុញ​​ការ​អាន​ក្មេងៗ​កម្ពុជា​បាន​ច្រើន

ភ្នំពេញៈ ដោយ​សារ​តែ​ភាព​សម្បូរ​បែប​នៃ​ទូរស័ព្ទ​ស្មាតហ្វូន​ គ្រប់​គ្នា​អាច​ទាញ​យក​សៀវភៅ​អេឡិចត្រូនិក​ មក​អាន​ដោយ​មិន​មាន​ការ​គិត​ថ្លៃ ដោយ​សា​រតែ​សៀវភៅ​ទាំង​នេះ​ស្ថិត​ក្រោម​អជ្ញាប័ណ្ណ ដែល​មាន​លក្ខណៈ​បើក​ទូលាយ​។

បច្ចេកវិ​ទ្យា​នៅ​ក្នុង​ប្រទេស​កម្ពុជា​ ក៏​កាន់​តែ​មាន​ភាព​ជឿន​លឿន ដូច្នេះ​មាតាបិតា​អាច​ប្រើប្រាស់​សៀវភៅ​អេឡិចត្រូនិក ដើម្បី​និទាន​រឿង​ជាមួយ​កូន​បាន​ ឬ ​លើក​ទឹក​ចិត្ត​កូន​របស់​គាត់ ប្តូរ​ពី​ការ​លេង​ហ្គេម​មក​ជា​ការ​អាន​កម្សាន្ត​​លើ​ឧបករណ៍​ទាំងនោះ។

អ្នកស្រី​ អ៊ុក អេលីតា ទីប្រឹក្សា​គម្រោង​នៃ​អង្គការ​មូល​និ​ធិ​អាស៊ី​ បាន​និយាយ​ថា​៖ «យើង​មិន​ចាំ​បាច់​ចំណាយ​ថវិកា​ដើម្បី​បោះពុម្ព​សៀវភៅ​នោះ​ទេ ដោយ​យើង​អាច​ទាញ​យក​សៀវភៅ​អេឡិចត្រូនិក​​មក​ប្រើប្រាស់​បាន​ភ្លាម​ៗ មិន​ថា ​គាត់​នៅ​ទី​ណា​​»។

អ្នក​ស្រី​បញ្ជាក់​ថា ការ​អាន​នឹង​មាន​ការ​កើន​ឡើង​ប្រសិន​បើ​យើង​ព្យាយាម​បង្កើត​សៀវភៅ​ដែល​មាន​គុណភាព​ខ្ពស់ មាន​ភាព​ទាក់ទាញ​សម្រាប់​កុមារហើយ​ស្ថិត​ក្នុង​តម្លៃ​ដែល​អាច​ទទួល​យក​បាន។

លោក​សាស្រ្តាចារ្យ កៅ សុវណ្ណតារា បង្រៀន​​ផ្នែក​ចិត្ត​វិទ្យានៃ​សកល​វិទ្យាល័យ​ភូមិន្ទភ្នំពេញ ​បាន​រៀប​រាប់ដែរ​​ថា ​សៀវភៅ​អេឡិចត្រូនិក​​ផ្តល់​នូវ​អត្ថ​ប្រយោជន៍​ផ្សេង​ៗ ​ជា​ច្រើន​ដល់​ការ​សិក្សា​របស់​ក្មេង​ៗ ​ដូចជា ​ការ​សរសេរ​អក្សរ​តាម​ ការ​អាន​រឿង​សម្រាប់​ការ​កំសាន្ត ឬ​ការ​ស្តាប់​សម្លេង​ដើម្បី​ជួយ​បង្រៀន​ឲ្យ​ក្មេង​អាន​តាម​បាន​ទៀត​ផង​។

លោក​សាស្រ្តចារ្យ​ ថ្លែង​ថា​៖ «ក្មេង​ៗ​រៀន​គឺ​ចូល​ចិត្ត​រូបភាព​គួរ​ឲ្យ​ទាក់ទាញ​មាន​ពណ៌​ជា​ដើម ​ហើយ​ការ​បញ្ចេញ​សម្លេង​ក៏​កាន់​តែ​មាន​សារៈ​សំខាន់​ផង​ដែរ​ ដូច្នេះ​សៀវភៅ​អេឡិចត្រូនិក​ផ្តល់​ជូន​នូវ​តម្រូវ​ការ​ទាំងនេះ​បាន​»។

​យោង​តាម​សេចក្តី​ប្រកាស​ព័ត៌មាន​របស់​អង្គការ​ មូល​និធិ​អាស៊ី​ប្រចាំ​ប្រទេស​កម្ពុជា ​ថា​ នឹង​មាន​ព្រឹត្តិការណ៍​មួយ​ទាក់​ទង​នឹង​ការ​ប្រមូល​ផ្តុំ​នៃ​អ្នក​និពន្ធ អ្នក​គំនូរ និង​អ្នក​រចនា​ក្រាហ្វិច​ជាដើម ដើម្បី​បង្កើត​សៀវភៅ​កុមារ​ដែល​មាន​គុណ​ភាព​ខ្ពស់​។

ព្រឹត្តិការណ៍​នេះ គឺ​ជា​ព្រឹត្តិការណ៍ ហាក់កាសន ​ដែល​នឹង​មាន​រយៈ​ពេល​ពីរ​ថ្ងៃ នៅ​ថ្ងៃ​ទី ១៩-២០ ខែ សីហា ចាប់​ផ្តើម​វេលា​ម៉ោង ៨ ព្រឹក​នៃ​ជាន់​ទី​ពីរ​នៃអង្គការ​មូល​និធិ​អាស៊ី (ផ្ទះ​លេខ​៥៩ ផ្លូវ ២៤២) ក្រោម​ប្រធាន​បទ​៖ សៀវភៅ​ស្ទែម​សម្រាប់​កុ​មារ​។

នេះ​ជា​ព្រឹត្តិការណ៍​លើក​ទី ៣ ហើយ​ដែល​ផ្តោត​លើ​ការ​បណ្តុះបណ្តាល​ក្រុម​អ្នក​ជំនាញ​ខាង​សរសេរ​សៀវភៅ​កុមារ​ជំនាន់​ថ្មី ដើម្បី​បង្កើត​សៀវភៅ​ស្នាដៃ​ដើម​ដែល​មាន​គុណភាព​ខ្ពស់និង​លើ​ការ​បង្កើន​ការ​យល់​ដឹង​ជា​សាធារណៈ​អំពី​សារ​សំខាន់​នៃ​ការ​អាន​។

បើ​ទោះ​បី ​សៀវភៅ​អេឡិចត្រូនិក ​មាន​ភាព​សម្បូរ​បែប​យ៉ាង​ណា​ក៏​ដោយ​ អ្នកនាង ​ទ្រី សម្ផស្ស ​​សព្វ​ថ្ងៃ​ជា​ស្ថាបនិក​គ្រឹះស្ថាន​បោះពុម្ព​ផ្សាយ​សៀវភៅ​សម្រាប់​កុមារ​ឈ្មោះ​ថា ខូមិកអាត (Comics Art) បាន​និយាយ​ថា​ វា​អាច​នឹង​មាន​ផលប៉ះ​ពាល់​ពេល​ដែល​ក្មេង​ប្រើ​ឧបករណ៍​អេឡិចត្រូនិក ​ដោយ​គ្មាន​ការ​គ្រប់គ្រង​ពី​មាតា​បិតា​របស់​គាត់​។

អ្នកនាង​​និយាយ​ថា​៖ «ការ​ដែល​ក្មេង​ៗ​អាន​សៀវភៅ​ផ្ទាល់​ គឺ​អាច​ជួយ​ដល់​ការ​ស្រមើ​ស្រមៃ​របស់​គាត់​ តែ​ការ​អាន​ដោយ​ប្រើ​ឧបករណ៍​អេឡិចត្រូ​និក អាច​ជួយ​ឲ្យ​គាត់​បាន​ស្តាប់​សម្លេង​ហើយ​អាន​តាម និង​ការ​មើល​រូបភាព​វីដីអូ​ជាដើម​​»។

លោក​សាស្រ្តាចារ្យ កៅ សុវណ្ណតារា ក៏​បាន​លើក​ឡើង​ពី​សារៈ​សំខាន់​នៃ​ការ​ពង្រឹង​ធនធាន​មនុស្ស​តាម​រយៈ​ការ​អាន​ក្នុង​ប្រទេស​កម្ពុជា​ផង​ដែរ​ថា កាល​ណា​ប្រជាជន​ចាប់ផ្តើម​ទម្លាប់​អាន ចំណេះ​ដឹង​របស់​គេ​ក៏​មាន​ការ​កើន​ឡើង​ ហើយ​ទម្លាប់​ដែល​គួរ​ចាប់​ផ្តើម​គឺ​យើង​គួរ​ចាប់ផ្តើម​ពង្រឹង​ពី​ក្មេង​តូច​ៗ​មក​៕

អត្ថបទដោយ នៅ ស៊ីណា

0

Comments

Please, login or register to post a comment

ព័ត៌មានពាក់ព័ន្ធ