Search form

Login - Register | FOLLOW US ON

Logo of Phnom Penh Post newspaper Phnom Penh Post - មហោស្រព​បណ្ណាល័យ​ដំបូង​ធ្វើ​នៅ​ចុង​សប្តាហ៍​នេះ

Content image - Phnom Penh Post
ការ​ចូលរួម​របស់​សិស្ស និង​និសិត្ស​នៅ​ក្នុង​កម្មវិធី​ពិព័រណ៍​សៀវភៅ​កម្ពុជា​នា​ឆ្នាំ​កន្លង​មក។ ហុង មិនា

មហោស្រព​បណ្ណាល័យ​ដំបូង​ធ្វើ​នៅ​ចុង​សប្តាហ៍​នេះ

ភ្នំពេញៈ ដោយសារ​មាន​គោល​ដៅ​ចង់​លើក​កម្ពស់​ផ្នែក​បណ្ណាល័យ​ក្នុង​ប្រទេស​កម្ពុជា ជំរុញ​ឲ្យ​បណ្តាញ​ក្រុម​បណ្ណាល័យ​ចំនួន ១០ បាន​រៀបចំ​កម្មវិធី​មហោស្រព​បណ្ណាល័យ​លើក​ដំបូង ដែល​នឹង​ត្រូវ​ប្រារព្ធ​ធ្វើ​នៅ​ចំ​ថ្ងៃ​ធ្វើ​ពិព័រណ៍​សៀវភៅ​កម្ពុជា​ថ្នាក់​ជាតិ​លើក​ទី ៦ ចាប់​ពី​ថ្ងៃទី ៨-១០ ខែ​ធ្នូ ឆ្នាំ២០១៧ នេះ នៅ​បណ្ណាល័យ​ជាតិ។

លោក គឹម ច័ន្ទត្រាបុត្រ ជា​គណៈកម្មការ​រៀបចំ​កម្មវិធី​មហោស្រព​បណ្ណាល័យ​លើក​ដំបូង​នេះ បង្ហើប​ថា៖ «មហោស្រព​បណ្ណាល័យ​កម្ពុជា​គឺជា​កម្មវិធី​ដំបូង​បង្អស់​ក្នុង​ប្រទេស​កម្ពុជា បាន​ប្រមូល​ផ្ដុំ​បណ្ណាល័យ​ចំនួន ១០ ដើម្បី​ដាក់​បង្ហាញ​ដល់​សាធារណ​ជន។ គោល​បំណង​ធំ​លើក​កម្ពស់​ផ្នែក​បណ្ណាល័យ នៅ​ប្រទេស​កម្ពុជា បង្កើន​នូវ​វប្បធម៌​នៃ​ការ​អាន បង្ហាញ​អ្នក​ចូលរួម​យល់​ដឹង​ថា​បណ្ណាល័យ​ពុំមែន​ត្រឹម​តែ​ជាទី​កន្លែង​តម្កល់​សៀវភៅ​ចោល​នោះ​ទេ លើស​ពី​នេះ​បណ្ណាល័យ​ក៏ជា​កន្លែង​ផ្តល់​នូវ​ចំណេះ​ដឹង​យ៉ាង​ច្រើន។ ប្រការ​ដែល​សំខាន់​បណ្ណាល័យ​ក៏បាន​ដើរ​តួនាទី​សំខាន់​ក្នុងការ​រួម​ចំណែក​សម្រេច​គោល​ដៅ​នៃ​ការ​អភិវឌ្ឍ​កម្ពុជា​ប្រកប​ដោយ​ចីរភាព និង​មជ្ឈមណ្ឌល ឬ​ឃ្លាំង​ឯកសារ​មិន​អាច​ខ្វះ​បាន និង​ត្រូវ​គិតគូរ​ពី​ការ​លើក​ស្ទួយ​វិស័យ​សិក្សា​ទៀត​ផង»។

Content image - Phnom Penh Post
ការអាន​សៀវភៅ​របស់​សិស្ស និស្សិត​នៅ​បណ្ណាល័យ។ រូប សហការី

លោក គឹម ច័ន្ទត្រាបុត្រ បន្តថា៖ «ដោយសារ​បងប្អូន​ខ្មែរ​យើង​ជា​ពិសេស សិស្ស និង​និស្សិត មួយ​ចំនួន​ពួកគាត់​នៅ​ពុំទាន់​ច្បាស់​ថា​តើ​បណ្ណាល័យ​មាន​តួនាទី​បម្រើ​ប្រយោជន៍​អ្វីខ្លះ​ដល់​ពួកគេ​ក៏ដូច​សាធារណជន​តែម្តង ទើប​ក្រុម​បណ្ណាល័យ​នានា រៀបចំ​ឲ្យ​មាន​ជា​លើក​ដំបូង​នេះ ដោយ​មាន​ចំនួន ១០ បណ្ណាល័យ ដែល​បាន​មក​ពី​សាកល​វិទ្យាល័យ និង​សាលារៀន​នានា បាន​ប្រមូល​គ្នា និង​ក្រោម​ការ​គាំទ្រ​ពី​សំណាក់​អង្គការ UNDP និង​បណ្តា​ក្រុមហ៊ុន​នានា។

ទោះបី​ជាការ​ប្រារព្ធ​ធ្វើ​លើក​ដំបូង ក្រុម​អ្នក​រៀបចំ​នូវ​មហោស្រព​បណ្ណាល័យ​ឆ្នាំ​នេះ ក៏​មាន​ក្តី​រំពឹង​ដែរ​ថា នឹង​មាន​ក្រុម​និស្សិត សិស្ស និង​មហាជន​ដទៃ​ទៀត បាន​ចូលរួម​ស្វែង​យល់​ពី​អត្ថ​ប្រយោជន៍ និង​តួនាទី​របស់​បណ្ណាល័យ​នានា​នៅ​ប្រទេស​កម្ពុជា។

លោក គឹម ច័ន្ទ​ត្រា​បុត្រ បន្ថែម​ថា៖ «សង្ឃឹម​ថា សិស្ស និស្សិត ក៏ដូចជា​សាធារណ​ជន ចូលរួម​ក្នុង​កម្មវិធី​មហោ​ស្រព​បណ្ណាល័យ ដែល​ជា​ផ្នែក​មួយ​នៃ​កម្មវិធី​ពិព័រណ៍​សៀវភៅ​កម្ពុជា ឆ្នាំ​នេះ​ទាំងអស់​គ្នា នៅ​ឯ​បណ្ណាល័យ​ជាតិ»៕

0

Comments

Please, login or register to post a comment

ព័ត៌មានពាក់ព័ន្ធ