Search form

Login - Register | FOLLOW US ON

Logo of Phnom Penh Post newspaper Phnom Penh Post - យុវតីម្នាក់​សម្រេច​បំណង​ហោះ​ហើរ​ មុន​គោលដៅ​កំណត់​របស់​ខ្លួន

Content image - Phnom Penh Post

យុវតីម្នាក់​សម្រេច​បំណង​ហោះ​ហើរ​ មុន​គោលដៅ​កំណត់​របស់​ខ្លួន

ភ្នំពេញៈ ឆ្លងកាត់ការបរាជ័យជាច្រើនដង យុវតីវ័យ ២១ឆ្នាំម្នាក់ បានសម្រេច​គោល​បំណង​របស់​នាង​​ក្នុង​ការ​ហោះ​ហើរ​ទៅ​កាន់​ប្រទេស​ផ្សេង​ទៀត ​ដោយ​មិន​ប្រើ​ប្រាស់​ថវិការ​របស់​ក្រុម​គ្រួសារ មុន​ការ​កំណត់់​គោល​ដៅ​របស់​នាង ក្រោយ​ពី​​ទទួល​បាន​ពាន​រង្វាន់​ក្នុង​ការ​ប្រកួត​ប្រជែង​ខ្សែ​ភាពយន្ត​ខ្នាត​ខ្លី​ជា​អន្តរជាតិ​មួយ​នៅ​ប្រទេស ថៃរួម​ជាមួយ​មិត្ត​រួម​ថ្នាក់​ម្នាក់​ទៀត ​នឹង​ត្រូវ​បន្ត​ការ​សិក្សា​នៅ​សាកល​វិទ្យាល័យ​ ជូឡាឡុង​កន ​ក្នុង​ប្រទេស​ថៃ រយៈពេល​​មួយ​ឆមាស​។

កញ្ញា រ៉ាវី​ សុភារ័ត្ន​ ជា​និសិ្សត​ឆ្នាំ​ទី ៣ សិក្សា​នៅ​ដេប៉ាតឺម៉ង់​ប្រព័ន្ធផ្សព្វ​ផ្សាយ​សារ​គមនាគមន៍​នៃ​សកល​វិទ្យាល័យ​ភូមិន្ទ ​ភ្នំពេញ​ បាន​ចែក​រំលែក​បទពិសោធនេះថា ការ​ដែល​បាន​ទទួល​អាហា​រូបករណ៍​នេះ នាង​បាន​ចំណាយ​ពេល​មួយ​រយៈ ដើម្បី​រៀន​ត្រៀម​ប្រឡង IELTS ដែល​ជា​តម្រូវ​ការ​មួយ​ក្នុង​ចំណោម​លក្ខខណ្ឌ​ដទៃ​ទៀត ហើយ​ការ​ប្រឡង​ IELTS ​នេះ​គឺ​ត្រូវ​បង់​ថ្លៃ​អស់ ១៨០$ នាង​ក៏​សម្រេច​ចិត្ត​លក់​កង់ ដែល​ជា​រង្វាន់​ទទួល​បាន​ពី​សំណេរ​អត្ថបទ​លើក​ទី ២។

សុភារ័ត្ន និយាយថា «ទម្រាំ​បាន​ប្រសើរ​ដូច​ពេល​នេះ ខ្ញុំ​​ធ្លាប់​ត្រូវ​ទទួល​បាន​ការ​បដិសេធ​ច្រើន​ដង​ណាស់​ដែរ ពេល​ខ្លះ​ក៏​ចង់​បោះបង់​ម្តង​ម្កាល​ដែរ​ តែ​ដោយ​សារ​​​មើល​ឃើញ​ថា នៅ​ជុំ​វិញ​ខ្លួន​ ខ្ញុំ​មាន​មនុស្ស​ជាច្រើន​ផ្សេង​ទៀត​ក៏​ធ្លាប់​បរាជ័យ​ដូចគ្នា អញ្ចឹង​មាន​តែ​ការ​ខិត​ខំ​ប្រឹង​ប្រែង​បន្ត​ទៀត រៀន​ពី​ភាព​បរាជ័យ ហើយ​ព្យាយាម​បំពេញ​តាម​ចន្លោះ​ខ្វះ​ខាត​របស់​យើង​នោះ​យើង​ប្រាកដ​ជា​អាច​ផ្លាស់​ប្តូរ​ភាព​អវិជ្ជមាន​របស់​យើង»។

Content image - Phnom Penh Post

យុវតី ធ្លាប់ជាជ័យលាភី​​ផ្នែក​សំណេរ​ចំនួន ៣ ដងនិង​​ជ័យ​លាភី​លេខ ១ ផ្នែក​ជជែក​ពិភាក្សា​ម្តង​ទាក់​ទង​នឹងយេនឌ័រ បន្តថា នាង​បាន​កំណត់​គោល​ដៅ​ថា ធ្វើ​យ៉ាង​ណា​​​ត្រូវ​តែ​បាន​ជិះ​យន្ត​ហោះ​ឬ​បន្ត​ការ​សិក្សា​នៅ​បរទេស​មុន​អាយុ ២២ ឆ្នាំ​ព្រោះ​តាំង​ពី​តូច​មក អត់​ដែល​បាន​ជិះ​សោះ។

នាង បានប្រាប់​​ទាំង​អារម្មណ៍​រីក​រាយ​ថា «ទីបំផុត ខ្ញុំ​ធ្វើ​វា​បាន​សម្រេច​មុន​កាល​កំណត់​ទៅ​ទៀត។ ខ្ញុំ​មាន​អារម្មណ៍​សប្បាយ​ចិត្ត​ខ្លាំង ហើយ​ក៏​មាន​មោទនភាព​តិច​តួច​ដែរ​សម្រាប់​ខ្លួន​ឯង ជា​ពិសេស​សមិទ្ធផល​នេះ​ជម្រុញ​ចិត្ត​ខ្ញុំ​ឱ្យ​ខិត​ខំ​បន្ថែម​ទៀត ហើយ​ខ្ញុំ​កំពុង​គិត​ថា​គួរ​កំណត់​គោល​ដៅ​ណា​បន្ថែម​ទៀត។ ខ្ញុំ​ជឿ​ជាក់​ថា យុវជន យុវតី ផ្សេង​ទៀត​ក៏​អាច​ធ្វើ​បាន​ដែរ ដោយ​មិន​បោះ​បង់​គោល​បំណង​ចោល​នោះ​ទេ»។

យុវតី រ៉ាវី​ សុភារ័ត្ន​ អ្នក​ដែល​ជំរុញ​​លើក​ទឹក​ចិត្ត​ដ៏​សំខាន់​​​គឺ​ក្រុម​គ្រួសារ និង​មិត្ត​ភក្តិ​ល្អៗ​ដែល​តែង​តែ​ផ្តល់​មតិ​យោបល់​ដែល​ជា​គំនិត​ដល់​នាង​ក្នុង​ការ​ធ្វើ​ការ​សម្រេច​ចិត្ត​ដ៏​ល្អ​ត្រឹម​ត្រូវ។ សម្រាប់​សុភារ័ត្ន និយម​ន័យ​នៃ​ពាក្យ​ជោគ​ជ័យ​ គឺ​មិន​មែន​កំណត់​លើ​ចំនួន​ខ្ទង់​ថវិកា​ក្នុង​ធនាគារ​ទេ តែ​ចំនួន​នៃ​ស្នាម​ញញឹម និង​ភាព​រីក​រាយ​ក្នុង​ជីវិត៕

អត្ថបទដោយ នៅ ស៊ីណា

0

Comments

Please, login or register to post a comment