Search form

Login - Register | FOLLOW US ON

Logo of Phnom Penh Post newspaper Phnom Penh Post - សិល្បៈ​ឆ្លាក់​ផ្លែ​ឈើ​ដ៏​ពិសេស​របស់​ថៃ ​ត្រូវ​យុវវ័យ​មើល​រំលង

Content image - Phnom Penh Post
តាំង​ពីមើមការ៉ុត ឪឡឹក ល្ពៅ ល្ហុង និង​ត្រសក់​ក្រអូប ត្រូវ​បាន​ឆ្លាក់​ជាផ្កា និង​សត្វ​យ៉ាង​រស់រវើក​។ AFP

សិល្បៈ​ឆ្លាក់​ផ្លែ​ឈើ​ដ៏​ពិសេស​របស់​ថៃ ​ត្រូវ​យុវវ័យ​មើល​រំលង

ក្រុងបាងកក: ជា​ប្រពៃណី​រាជវង្ស​ដែល​មនុស្ស​ជំនាន់​មុនៗ​ខំរៀន​សូត្រ​ផ្ដល់​តម្លៃ​ខ្ពស់​នោះ សិល្បៈ​ឆ្លាក់​ផ្លែឈើ​ដ៏ពិសេស​របស់​ជនជាតិ​ថៃ​កំពុងតែ​ត្រូវ​បាន​យុវវ័យ​មើល​រំលង ខណៈ​សិល្បករ​ជាច្រើន​បាន​ព្យាយាម​រក្សា​វាឲ្យ​ស្ថិតស្ថេរ។

មើម​រុក្ខជាតិ​ពណ៌​ក្រហម​ត្រូវ​បាន​ផ្លែ​កាំបិត​ចិត​ឆ្លាក់​ប្រែក្លាយ​ជាផ្កា​កុលាប រីឯ​ល្ហុង និង​ឪឡឹក បាន​រំលេច​ស្រទាប់​ផ្កា និង​ក្បូរ​ក្បាច់​រចនា​គួរឲ្យ​ស្ងើច​សរសើរ ខណៈ​ដែល​អ្នកជំនាញ​ឆ្លាក់​ផ្លែឈើ​ថៃ​នាំគ្នា​មក​ចូលរួម​ការប្រកួត​កាល​ពីថ្ងៃ​សុក្រ​ចុង​សប្ដាហ៍​កន្លង​ទៅ​នេះ។ ប៉ុន្តែ​សម្រាប់​អ្នកចូលរួម​ប្រកួត​លោក ភីយ៉ាណាត ធីវ៉ាតូ ការ​ឆ្លាក់​ផ្លែឈើ​គឺមាន​ន័យ​ជាង​ការ​ឈ្នះ​ពានរង្វាន់​ទៅ​ទៀត។

លោក​បាន​ពោល​ថា៖ «ការ​ឆ្លាក់​ផ្លែ​ឈើ​អាច​ធ្វើឲ្យ​ចិត្ត​អារម្មណ៍​យើង​ប្រសើរ​ឡើង ព្រោះវា​ទាមទារ​ការយក​ចិត្ត​ទុកដាក់ និង​ផ្ចិតផ្ចង់​ខ្ពស់»។

ប្រពៃណី​ឆ្លាក់​ផ្លែឈើ​នេះ​ត្រូវបាន​កត់ត្រា​តាំង​ពី​រាជវង្ស សុខោ​ថៃ ក្នុង​សតវត្ស​ទី ១៤។ អ្នករៀបចំ​កម្មវិធី​ប្រកួត​ឆ្លាក់​ផ្លែឈើ​អ្នកនាង អារ៉ាយ៉ា អារុនណានន់ឆាយ បាន​រៀបរាប់​ថា៖ «សិល្បៈ​តុបតែង​ម្ហូបអាហារ និង​ឆ្លាក់​ផ្លែឈើ​នេះ​មាន​ប្រវត្តិ​រាប់រយ​ឆ្នាំ​មក​ហើយ។ ប្រទេស​ថៃ​ពោរពេញ​ទៅ​ដោយ​គំនិត​សិល្បៈ និង​សិប្បកម្ម។ វា​ប្រៀប​បី​ដូចជា​រតនសម្បត្តិ​ដ៏ស្រស់​ស្អាត​ដែល​យើង​មាន»។

អ្នកនាង​បន្តថា៖ «កាលពី​អតីតកាល សិល្បៈ​ឆ្លាក់​ផ្លែឈើ​នេះ​គឺត្រូវ​បាន​ធ្វើ​ឡើង​នៅ​ក្នុង​វាំង​សម្រាប់​ខ្សែ​រាជវង្ស»។

ក្នុង​កម្មវិធី​កាលពី​ថ្ងៃ​សុក្រ សិល្បករ​ថៃ​រាប់សិប​នាក់​បាន​ចូលរួម​ប្រកួត​ឆ្លាក់​បន្លែ និង​ផ្លែឈើ ដើម្បី​អបអរ​បុណ្យ​ចម្រើន​ព្រះជន្ម​ម្ចាស់​ក្សត្រិយ៍ សិរី​គិត ដែល​នឹង​ឈាន​ចូល ៨៥ ព្រះវស្សា នៅ​ថ្ងៃទី ១២ ខែ​សីហា​នេះ។

Content image - Phnom Penh Post
ជំនាញ​ឆ្លាក់​ផ្លែឈើ​កាន់តែ​ខ្សត់ខ្សោយ​អ្នក​រៀន​។ AFP

ក្នុងចំណោម​អ្នកចូលរួម​ជាង ២០ ក្រុម អ្នកខ្លះ​ឆ្លាក់​រូប​ទីទុយ ដំរី ក្បូរ​ក្បាច់​រចនា​បែបបទ​ថៃ​នៅ​លើ​ត្រាវ ឪឡឹក ត្រសក់​ស្រូវ និង​ល្ហុង​ជាដើម។ សិល្បៈ​ឆ្លាក់​ផ្លែឈើ​នៅតែ​មាន​ប្រជាប្រិយភាព សម្រាប់​ធ្វើជា​គ្រឿង​តង្វាយ​នៅ​វត្ត ឬជា​គ្រឿង​លម្អ​ក្នុង​ពិធីមង្គលការ។

និស្សិត​វិចិត្រសិល្បៈ​អាច​រៀន​យក​ជំនាញ​នេះ​នៅ​មហាវិទ្យាល័យ ដូច​ទៅ​នឹងការ​រៀន​មុខ​ជំនាញ​គូរគំនូរ​ដែរ តែ​ប្រពៃណី​នេះ​នៅ​តែបន្ត​សាបរលាប។

អ្នកជំនាញ​ឆ្លាក់​បន្លែ​ផ្លែឈើ ម៉ានីរ៉ាត ស្វាស្ទីវ៉ាត បាន​ឲ្យដឹង​ថា៖ «ក្មេងៗ​មិន​ច្រើន​ទេ​ដែល​ចាប់​អារម្មណ៍​រៀន​ឆ្លាក់​ផ្លែឈើ ហើយ​មូលហេតុ​អាចថា​មកពី​រៀន​ចប់​ជំនាញ​នេះ​ហើយ មិនអាច​ឲ្យ​ពួកគេ​ចិញ្ចឹមជីវិត​បាន ទើប​យើង​កាន់​តែខ្សត់​អ្នក​បន្តវេន​ជំនាន់​ក្រោយ»៕

Content image - Phnom Penh Post
សិល្បៈ​ឆ្លាក់​ផ្លែ​ឈើ​មាន​ប្រវត្តិតាំង​ពី​សតវត្សរ៍ទី ១៤ មក​ម្ល៉េះ។ AFP

0

Comments

Please, login or register to post a comment

ព័ត៌មានពាក់ព័ន្ធ