Search form

Login - Register | FOLLOW US ON

Logo of Phnom Penh Post newspaper Phnom Penh Post - សិស្ស​កម្ពុជា​៤ រូប​ជាប់​ការ​ប្រកួត​កម្មវិធី SBC ទៅ​ប្រទេស​សិង្ហបុរី

Content image - Phnom Penh Post
យុវតី ភោគ កន្និកា (ស្ដាំ) ក្នុង​ពិធី​អបអរសាទរ​ជយលាភី នៅ​វិទ្យាស្ថាន អន្ដរជាតិ កម្ពុជា អាស៊ាន ។

សិស្ស​កម្ពុជា​៤ រូប​ជាប់​ការ​ប្រកួត​កម្មវិធី SBC ទៅ​ប្រទេស​សិង្ហបុរី

ភ្នំពេញៈ​ សិស្ស​តំ​ណាង​កម្ពុជា ​៤ រូប ​មកពី​សាលា ​និង​វិទ្យាស្ថាន​នានា​ នៅ​រាជធានី​ភ្នំពេញ ​និង​ខេត្ដ​កំពង់​ឆ្នាំង ​បាន​ប្រឡង​ជាប់​ក្នុង​កម្ម​វិធី​ STEP-NUS Sunburst Brain Camp 2017 (SBC) ខណៈ​ពួកគេ​នឹង​ទទួល​បាន​ឱកាស​ទៅ​ចូល​រួម​រយៈ​ពេល​ ១ សប្ដាហ៍​នៅ​ប្រទេស​សិង្ហបុរី ​នាខែមិថុនា ​ឆ្នាំ២០១៧ ​ដើម្បី​ទទួល​ការ​បណ្ដុះ​បណ្ដាល ​ផ្នែក​ចំណេះ​ដឹង ​ខួរក្បាល ​និង​ការ​ផ្លាស់​ប្ដូរ​ផ្នត់​គំនិត ក្នុង​ការ​សិក្សា​បែប​វិទ្យា​សាស្រ្ដ​សម្រាប់​យុវជន​អាស៊ាន​។

កម្ម​វិធី​ SBC រៀប​ដោយ ​Singapore ​Technologies Endowment ​Program ​សហការ​ជាមួយ​សាកល​វិទ្យា​ល័យ​ជាតិ​សិង្ហ​បុរី​(NUS) ដែល​​ផ្តោត​សំខាន់​ទៅលើ​យុវជន​តាម​បណ្ដា​ប្រទេស​ទាំងអស់​ក្នុង​តំបន់​អាស៊ាន​ ដើម្បីឲ្យ​ពួកគេ​ធ្វើការ​សិក្សា​ស្រាវជ្រាវ​រួម​គ្នា ​ទៅលើ​មុខងារ​នៃ​ខួរក្បាល​មនុស្ស ​ផ្លាស់ប្តូរ​គំនិត ​និង​ចែក​រំលែក​បទពិសោធ​ការ​សិក្សា​ពីគ្នា​ទៅវិញ​ទៅមក​ ដើម្បី​ជំរុញ​ការសិក្សា​របស់​ពួកគេ​ និង​តម្រង់​ទិស​ការអប់រំ​ចំណេះ​​ដឹង​បែប​វិទ្យា​សាស្ត្រ​។

សិស្ស​ជយលាភី​ទាំង​ ៤ រូប​រួម​មាន ​យុវតី ​ភោគ ​កន្និកា ​សិស្ស​វិទ្យាល័យ​បាក់ទូក​ យុវតី ​កុយ ​រតនមុនៀត ​សិស្ស​សាលា​ AIS ​យុវជន ​ហេង ​គន្ធារៈ ​សិស្ស​អនុវិទ្យា​ល័យ​ចតុមុខ ​និង​យុវជន ​គឹម ​វណ្ណារ៉ូ ​សិស្ស​វិទ្យា​ល័យ​កំពង់​ឆ្នាំង។

យុវតី ​ភោគ ​កន្និកា ​សិស្ស​មក​ពីវិទ្យាល័យ​បាក់ទូក ​និង​វិទ្យាស្ថាន​ Cam-ASEAN ​តំ​ណាង​សិស្ស​ជយលាភី​បាន​ថ្លែង​ប្រាប់​ LIFT-យុវវ័យ ថា ​ការ​ទទួល​បាន​ឱកាស​ទៅ​បន្ដ​វគ្គបណ្ដុះ​បណ្ដាល​ SBC ​នៅ​សិង្ហបុរី​នេះ ​នាង ​ទទួល​បាន​ការ​ណែនាំ​ពីលោកគ្រូ​អ្នកគ្រូ​នៅ​ Cam-ASEAN ចំពោះ​ព័ត៌មាន​ និង ​ការ​ណែនាំ​ដាក់ឲ្យ​ពាក្យ​ប្រកួត​ ស្រប​នឹង​ចំណង់​​ចំណូល​ចិត្ដ​របស់​នាង​លើ​មុខ​វិជ្ជា​វិទ្យាសាស្រ្ដ​ពិត​ដែល​កំពុង​សិក្សា​នៅ​វិទ្យាល័យ​​ផងដែរ​។

យុវតី​រូបនេះ​បន្ដថា ​«ខ្ញុំ​យល់ថា​ ការខិតខំ​ប្រឹងប្រែង​សិក្សា​ដោយ​ខ្លួន​ឯង​ល្អ​ហើយ ​តែ​នៅ​​មិនទាន់​គ្រប់គ្រាន់​ទេ​យើង​ត្រូវ​មាន​អ្នក​ផ្តល់​ឱកាស ​និង​ជួយ​ជ្រោមជ្រែង​ក្នុងការ ​ផ្តល់​ព័ត៌មាន ​ចំពោះការ​ប្រឡង​នានា​ជាដើម​។ ​ខ្ញុំ​ទម្រាំ​ទទួល​បាន​ជយ​លាភី​នេះ ​ខ្ញុំ​ក៏​ទទួល​បាន​ការ​ជ្រោម​ជ្រែងពី​សាលា ​និង​លោក​គ្រូ​អ្នក​គ្រូ​ដែរ​»។

កន្និកា ​ជឿជាក់​ថា ​ឱកាស​ចូល​រួម​បន្ដ​ជា​មួយ​កម្ម​វិធីនេះ​នៅសិង្ហ​បុរី​ អាច​ឲ្យ​នាង​​បាន​រៀនសូត្រ​ពី​សិស្សា​នុសិស្ស​ដ៏ទៃទៀត​នៅ​ក្នុង​តំបន់​អាស៊ាន ​ហើយ​​​ហ្វឹកហាត់​ខ្លួនឯង ​ឲ្យ​មាន​ទំនួល​ខុស​ត្រូវ ​និង​ភាព​ជាអ្នក​ដឹក​នាំ​ម្នាក់ថែម​ទៀត​។

លោក ​យ៉ាន់ ​ឧត្ដម ​Head of Center for ASEAN Studies បានឲ្យ​ដឹងដែរ​ថា ​កម្មវិធីនេះ​បង្កើត​ឡើង​ដើម្បី​ជំរុញ​សិស្ស​មាន​អាយុចាប់​ពី ១៧-១៨ ​ឆ្នាំ ​នៅ​ក្នុង​តំបន់​អាស៊ាន​ ដែល​មាន​ចំណោះ​ដឹង​ និង​ចំណង់​ចំណូល​ចិត្ដ​ លើ​មុខវិជ្ជា​ វិទ្យាសាស្រ្ដ​ និង​ការ​សិក្សា​ស្រាវជ្រាវ​ ហើយ​កម្ម​វិធីនេះ​នឹង​ជំរុញ​ការ​សិក្សា​របស់​ពួក​គេ​លើ​ចំណេះ​ដឹង​ផ្នែក​ខួរក្បាល​ មុខងារ​នៃ​ខួរក្បាល​ និង​បញ្ហា​ប្រឈម​នៃខួរក្បាល​ជាដើម ​។

បើ​តាម​ លោក ឧត្ដម​ ថា លោក​មិន​ដឹង​ពី​ទិន្នន័យ​សិស្ស​ប៉ុន្មាន​នាក់​ដែល​បាន​ដាក់​ពាក្យ​ចូល​រួម​ការ​ប្រកួតទេ ព្រោះ​ការ​ប្រកួត​នេះ ​តម្រូវ​ឲ្យ​សិស្ស​បំពេញ​ឯកសារ​ដោយ​ខ្លួន​ឯង​ទៅ​កាន់​គណៈកម្មា​ការ​នៅ សិង្ហ​បុរី​ផ្ទាល់​ ប៉ុន្ដែ​ចំពោះ​ការ​ប្រកួត​នេះ ​ខាង​ក្រសួង​អប់រំកម្ពុជា​ បាន​​បញ្ចូន​ព័ត៌មាន​នៃ​ការ​ប្រឡង​ទៅ​កាន់​សាលា​នានា ​ដើម្បី​ឲ្យ​សិស្ស​ដាក់​ពាក្យ​ប្រកួត​ ហើយ​សិស្ស​ដែល​ជាប់​ទាំង​ ៤ រូប​ខាង​លើ ​ជា​សិស្ស​ឆ្នើម​ដែល​ទទួល​បាន​ជយលាភី​ក្នុង​ចំណោម​សិស្ស​ទាំងឡាយ ​៕

0

Comments

Please, login or register to post a comment

ព័ត៌មានពាក់ព័ន្ធ