Search form

Login - Register | FOLLOW US ON

Logo of Phnom Penh Post newspaper Phnom Penh Post - សិស្ស Liger បង្ហាញ​ពី​អតីត បច្ចុប្បន្ន និង​អនាគត​អគារ​ប៊ុលឌិង

Content image - Phnom Penh Post
អគារ​ប៊ុលឌិង ឬអគារ ស មុន​ពេល​វាយ​កម្ទេច ដើម្បី​សាង​សង់​ជា​មជ្ឈមណ្ឌល​ពាណិជ្ជកម្ម​​។ ផា លីណា

សិស្ស Liger បង្ហាញ​ពី​អតីត បច្ចុប្បន្ន និង​អនាគត​អគារ​ប៊ុលឌិង

ភ្នំពេញ: អគារ​ប៊ុលឌិង​ត្រូវ​បាន​កម្ទេច​ចោល​អស់​រយៈ​ជាច្រើន​ខែ​ប៉ុន្ដែ​ភាព​ល្បីល្បាញ​របស់​វា​នៅ​មិន​ទាន់​សាបសូន្យ​ឡើយ។

កិច្ចការ​រយៈ​ពេល ២ ខែ សិស្ស ចំនួន ៩ នាក់ មក​ពី​មជ្ឈមណ្ឌល Liger Learning Centre ធ្វើការ​តាំង​បង្ហាញ​ស្នាដៃ​ទាំង​ស្រុង​នៅ​ផ្ទះ​មេត្ដា​កាល​ពី​ម្សិលមិញ ដោយ​បង្ហាញ​ពី​សំណង់​និមិត្ត​រូប​ពី​អតីតកាល បច្ចុប្បន្ន អនាគតកាល និង​ពលរដ្ឋ​ធ្លាប់​រស់​នៅ​ទីនោះ​ផងដែរ។

ឌីហ្សាញ​ឡើង​ដោយ លូ បានហាប់ និង​ស្ថាបត្យករ​រុស្ស៊ី Vladimir Bodiansky អគារ​ស ឬ​ប៊ុលឌិង​ត្រូវ​បាន​រចនា​ឡើង​សម្រាប់​ជា​ផ្ទះ​តម្លៃ​ថោក​ដល់​មន្ដ្រីរាជការ។ រយៈពេល​មិន​យូរ​ប៉ុន្មាន​វា​ត្រូវ​បាន​បោះបង់​រហូត​ដល់​ចាស់​ទ្រុឌទ្រោម ហើយ​ថ្មីៗ​នេះ​វា​ត្រូវ​បាន​វាយ​កម្ទេច​ដើម្បី​សង់​មជ្ឈមណ្ឌល​ពាណិជ្ជកម្ម និង​លំនៅឋាន​របស់​ក្រុមហ៊ុន​អភិវឌ្ឍន៍​ជប៉ុន។

គំនិត​បង្កើត​គម្រោង​នេះ​គឺជា​ការ​ផ្ដួចផ្ដើម​របស់​លោក Jeff Bouchard ជាគ្រូ​គណិតវិទ្យា​នៅ Liger និង​សិស្ស​មាន​បទពិសោធ​ម្នាក់​ឈ្មោះ ទេព ថាធីនី អាយុ ១៤ ឆ្នាំ ដែល​ធ្លាប់​រស់នៅ​ក្នុង​អគារ​ប៊ុលឌិង។

លោក Jeff Bouchard និយាយ​ថា៖ «គំនិត​មួយ​ផ្នែក​កើត​ពីបទ​ពិសោធ ធីនី ដែល​នាង​ធ្លាប់​រស់នៅ​ទីនោះ។ ខ្ញុំ​គិតថា វាជា​ការ​សិក្សា​ផ្នែក​សង្គមនរ​វិទ្យា​ស្ដីពី​ទីក្រុង​ដ៏គួរ​ឲ្យ​ចាប់​អារម្មណ៍ ព្រមទាំង​ជាការ​សិក្សា​អំពី​ប្រវត្ដិសាស្ដ្រ និង​កំណើន​សេដ្ឋកិច្ច​ក្រុង​ភ្នំពេញ​ផងដែរ»។

សិស្ស ៩ នាក់ បាន​បង្កើត​គម្រោង​រៀងៗ​ខ្លួន​ដោយ​ប្រើ​វិធីសាស្ដ្រ​ខុសៗ​គ្នា ដូចជា ប្រព័ន្ធ​សោត​ទស្សន៍ podcast វីដេអូ​កម្រង​សៀវភៅ​ខ្លី​គំរូ​ប្លង់ 3D ចម្រៀង និង​រូបភាព​ស៊េរី ដោយ​គម្រោង​នីមួយៗ​ផ្ដោត​លើ​តថភាព​ផ្សេងៗ​នៃ​អគារ​ស។

Content image - Phnom Penh Post
ទេព ថាធីនី, សួន គីមសេង និង យុន សូលីដេ។ ហុង មិនា

កញ្ញា យុន សូលី​ដេ អាយុ ១៦ ឆ្នាំ បាន​និយាយ​ថា៖ «ទោះបី​ជា​ខ្ញុំ​សម្រេច​ចិត្ដ​ធ្វើ​ឯកសារ​ដោយសារ​ខ្ញុំ​មាន​បទពិសោធ​ថត​ភាពយន្ដ​ស្រាប់ វា​នៅ​តែ​ធ្វើ​ឲ្យ​ខ្ញុំ​ពិបាក​ពី​ព្រោះ​វាជា​ឯកសារ​រយៈពេល​វែង​លើស​ពី​អ្វី​ដែល​ខ្ញុំ​ធ្លាប់​ធ្វើ​កន្លង​មក»។

ភាពយន្ដ​ខ្លី​របស់​យុវ​សិស្ស​រូបនេះ បាន​បង្ហាញ​ពីបទ​សម្ភាស​ជាមួយ​អតីត​ពលរដ្ឋ និង​ការសន្ទនា​ជាមួយ​មន្ដ្រី​រដ្ឋាភិបាល រួម​ទាំង​ក្រុមហ៊ុន​អភិវឌ្ឍន៍ Arakawa Co។

បន្ថែម​លើ​ការងារ​នេះ ក៏​នៅ​មាន​វីដេអូ​បង្ហាញ​ពី​សិស្ស​ចែក​រំលែក​អារម្មណ៍​ក្រោយ​ពី​គម្រោង​នេះ​ត្រូវ​បាន​បញ្ចប់​ទាំង​ស្រុង។ ចំពោះ​មនុស្ស​ភាគ​ច្រើន វា​ពិតជា​លំបាក​ក្នុងការ​បែង​ចែក​រឿង​ពិត​នៃ​អគារ​ស​ពី​កេរ្ដិ៍​ឈ្មោះ​របស់​វា។

សិស្ស​ឈ្មោះ សួន គីមសេង អាយុ ១៣ ឆ្នាំ​បាន​និយាយ​ថា៖ «វា​មិនមែន​ជាអ្វី​ដែល​មនុស្ស​ម្នា​និយាយ​ពី​វា ដូច្នេះ​យើង​មិន​សូវ​ស្គាល់​ច្បាស់​អំពី​អគារ​ស​ពីមុន​មក​ទេ។ ប៉ុន្ដែ​ក្រោយ​ពី​យើង​សិក្សា​ពី​ប្រវត្ដិ និង​សហគមន៍ បុគ្គល​ម្នាក់​ដែល​យើង​ធ្វើ​សម្ភាស​បាន​និយាយ​ថា អគារ​ស​គឺជា​សហគមន៍​ត្រូវ​បាន​ស្គាល់​ច្បាស់ ដែល​ធ្វើ​ឲ្យ​ខ្ញុំ​ងាយ​យល់។ វាជា​អគារ​ស្ថិត​នៅ​ចំ​កណ្ដាល​ក្រុង»។

ពិព័រណ៍​នេះ​ធ្វើ​នៅ​ឡើង​នៅ​ផ្ទះ​មេត្ដា​ថ្ងៃទី ៩ ខែ​វិច្ឆិកា ដោយ​ស្នាដៃ​ទាំង​នេះ​ត្រូវ​បាន​បង្ហោះ​លើ​ទំព័រ​ហ្វេសប៊ុក Liger Learning Centre៕HR

0

Comments

Please, login or register to post a comment