Search form

Login - Register | FOLLOW US ON

Logo of Phnom Penh Post newspaper Phnom Penh Post - សៀវភៅ​អេឡិចត្រូនិក​ ៨​ ក្បាល​​ជំរុញ​​កុមារ​ឲ្យ​ចូលចិត្ត​មុខ​វិជ្ជា​ស្ទែម

Content image - Phnom Penh Post
សិក្ខាសាលា ​ប្រមូល​ផ្ដុំ​ក្រុម​អ្នក​និពន្ធ និង​វិចិត្រករ​ដើម្បី​ផលិត​សៀវភៅ​អាន​សម្រាប់​​កុមារ​​​រៀប​ចំ​ដោយ​មូលនិធិ​អាស៊ី កាល​ពី​ចុង​សប្តាហ៍​មុន។ រូបថត សហការី

សៀវភៅ​អេឡិចត្រូនិក​ ៨​ ក្បាល​​ជំរុញ​​កុមារ​ឲ្យ​ចូលចិត្ត​មុខ​វិជ្ជា​ស្ទែម

ភ្នំពេញៈ ខណៈ​ក្មេង​ៗ​កម្ពុជា​ត្រូវ​បាន​មើល​ឃើញ​ថា មាន​​ចាប់​អារម្មណ៍​សិក្សា ជំនាញ​ស្ទែម​នៅ​តិច​នៅ​ឡើយ ​អង្គការ​មូលនិធិ​អាស៊ី បាន​​រៀប​ចំ​​ព្រឹត្តិការណ៍​​ពីរ​ថ្ងៃ កាលពី​ចុង​សប្តាហ៍មុន ផលិត​សៀវភៅ​រឿង​អេឡិចត្រូនិក​អំពី​មុខវិជ្ជា ស្ទែម​សម្រាប់​កុមារ ចំនួន​ ៨ ​ក្បាល ដោយ​រំពឹង​ថា​នឹង​នាំ​ឲ្យ​កុមារ​កម្ពុជា​ស្គាល់ និង​ចង់​សិក្សា​ជំនាញ​ ស្ទែម។

ស្ទែម គឺ​ជា​ពាក្យ​កាត់​ភាសា​អង់គ្លេស​ដែល​មាន​ន័យ​ពេញ​ថា វិទ្យាសាស្ត្រ បច្ចេកវិទ្យា វិស្វកម្ម និង​គណិតវិទ្យា។

ថ្លែងក្នុង​ព្រឹត្តិការណ៍​ឈ្មោះ​ «ហាក់កាសន» ​ប្រមូល​ផ្ដុំ​ក្រុម​អ្នក​និពន្ធ និង​វិចិត្រករ​ដើម្បី​ផលិត​សៀវភៅ​អាន​សម្រាប់​កុមារ​​នេះ​លោក ​ជូ ជីនិត ​អ្នក​រៀបរៀង​អត្ថបទ​រឿង និង​ជា​អ្នក​គ្រប់គ្រង​​បាន​ឲ្យ​ដឹង​ថា ​ការ​ផលិត​សៀវភៅ​ដោយ​ផ្តោត​លើ​មុខ​វិជ្ជា​ស្ទែម គឺ​មាន​ការ​លំបាក ដោយសារ​តែ​ជា​ប្រធានបទ​ថ្មី​សម្រាប់​អ្នក​និពន្ធ ដែល​ទាមទា​ឲ្យ​មាន​ការ​កែ​តម្រូវ​អត្ថបទ​រឿង ជា​ច្រើន​លើក​។

តែ​យ៉ាង​ណា​ លោក​ថា ​ការ​ផលិត​សៀវភៅ​ទាំងនេះ គឺ​មាន​ការ​ចូល​រួម​ត្រួត​ពិនិត្យ ដោយ​អ្នក​ជំនាញ​មក​ពី​ប្រទេស ​ឥណ្ឌា​។

លោក​ថ្លែង​ថា​៖ «​វា​ស្រប​ទៅ​នឹង​គោលដៅ​របស់​ក្រសួង​អប់រំ​យុជន និង​កីឡា ដែល​ព្យាយាម​បញ្ជ្រាប ប្រធានបទ​ស្ទែម​ទៅ​ដល់​កុមារ នៅ​ថ្នាក់​តូច ហើយ​វា​រួម​ចំណែក​ច្រើន​សម្រាប់​ក្មេង​ៗ មាន​ភាព​ក្លាហាន។ ក្មេង​មិនសូវចូលចិត្ត​​មុខវិជ្ជា​ស្ទែម​ហ្នឹង ព្រោះវា​ទាមទា​ការ​គិត​វិភាគ​ស៊ី​ជម្រៅ និង ​ស្មុគស្មាញ​ អញ្ជឹង​ពេល​ខ្លះ​ក្មេង​គាត់​អាច​មាន​ការ​ធុញ​ទ្រាន់ ប៉ុន្តែ​បើ​យើង​បង្កើត​ទៅ​ជា​សាច់រឿង​វិញ​គឺ​អាច​ធ្វើ​ឲ្យ​ក្មេង​ងាយ​ស្រួល​រៀន​»។

អ្នកស្រី Yamini Vijayan ជា​ការីនិពន្ធ​នៃ Pratham Books បាន​ធ្វើ​ដំណើរ​មក​ពី​ប្រទេស​ឥណ្ឌា ដើម្បី​ចូល​រួម​ព្រឹត្តិការណ៍​នេះ​ក្នុង​ការ​ពិនិត្យ​ខ្លឹមសារ​សៀវភៅ​។

Content image - Phnom Penh Post
សៀវភៅ​ស្ទែម​ទាំង ៨​ក្បាល​ដែល​បាន​ផលិត​ឡើង​សម្រាប់​កុមារ។ រូបថត សហការី

អ្នកស្រី​បាន​និយាយ​ថា​ គាត់​បាន​អាន​គ្រប់​អត្ថបទ ហើយ​សាច់រឿងទាំងអស់​គឺ​មាន​លក្ខណៈ​​គួរ​ឲ្យ​ចាប់អារម្មណ៍​ខ្លាំងណាស់​សម្រាប់​កុមារ​។

អ្នកស្រី​បាន​ផ្តល់​ចំណាប់​អារម្មណ៍​ថា​៖ «​អ្វី​ដែល​កាន់​តែ​ពិសេស​នោះ​គឺ​សៀវភៅ​ទាំងនេះ​ត្រូវ​បាន​សរសេរ​ឡើង​ជា​ភាសាជាតិ​ដែល​ជម្រុញ​ឲ្យ​ក្មេង​ៗ​យល់​ដឹង​ពី​ស្ទែម​ជា​ភាសា​ខ្លួន​ផ្ទាល់​ទៀត​ផង​»។

បើ​យោង​តាម​ លោក ​ស៊ិន ធួកណា ដែល​មាន​ជំនាញ​ផ្នែក​គំនូរ​ជីវចល និង​តុក្កតា បាន​រៀបរាប់​ពី​ការ​ផលិត​សៀវភៅ​រឿង​អេឡិចត្រូនិច​ថា មុនដំបូង​គាត់​ត្រូវ​បាន​ចាប់​ដៃគូរ​ជាមួយ​អ្នក​សរសេរ​រឿង ហើយ​ក្នុង​ថ្ងៃ​ទី ​១ នៃ​ព្រឹត្តិការណ៍​គឺ​ការ​ផ្តើម​គូស​តួអង្គ​ក្នុង​រឿង និង​គូស​ទៅ​តាម​សាច់រឿង ដោយ​ការ​គូស​ព្រាង និង​គូស​ក្នុង​កម្មវិធី​មួយ​ចំនួន​ដូច​ជា Adobe Photoshop, Illustrator, Adobe After Affect និង Adobe Premier ដើម្បី​ឲ្យ​រូបភាព​មាន​ចលនា​។ ក្នុង​ថ្ងៃ​ទី​ ២ ​គឺ​ការ​ធ្វើ​គម្រប​សៀវភៅ​ឲ្យ​មាន​ភាព​ទាក់ទាញ ហើយ​នឹង​ការ​ធ្វើ​ការងារ​បញ្ចប់​ទៅ​លើ​សៀវភៅ​ទាំងមូល​។

លោក ជូ ជីនិត រំពឹង​ថា ​សៀវភៅ​រឿង​អំពី​មុខ​វិជ្ជា ស្ទែម​នេះ នឹង​ជួយ​បណ្ដុះ​គំនិត​កុមារ​ឲ្យ​ចង់​សិក្សា​មុខវិជ្ជា​ស្ទែម ដែល​មាន​សារៈសំខាន់​ក្នុង​ការ​អភិវឌ្ឍ​ប្រទេស​៕

អត្ថបទដោយ នៅ ស៊ីណា

0

Comments

Please, login or register to post a comment

ព័ត៌មានពាក់ព័ន្ធ