Search form

Login - Register | FOLLOW US ON

Logo of Phnom Penh Post newspaper Phnom Penh Post - ហ្គេម​ស្មាតហ្វូន​ដំបូង​នៅ​កម្ពុជា​ បង្កើត​កម្មវិធី AR លើក​កម្ពស់​មរតក​ដូនតា និង​ប្រាក់​រៀល

Content image - Phnom Penh Post
រូបអ្នករាំ​របាំ​ក្ងោក​មួយ​គូ​ ដែល​ត្រូវ​បាន​បង្ហាញ​ឡើង​លើ​ក្រដាស​ប្រាក់ ៥០០ រៀល និង ១ ០០០ រៀល តាម​រយៈ​កម្មវិធី Osja AR។ ហុង​ មីនា

ហ្គេម​ស្មាតហ្វូន​ដំបូង​នៅ​កម្ពុជា​ បង្កើត​កម្មវិធី AR លើក​កម្ពស់​មរតក​ដូនតា និង​ប្រាក់​រៀល

ភ្នំពេញៈ ស្ទូឌីយោ សប្បាយអស្ចារ្យ (Sabay Osja) បាន​ក្លាយ​ជា​ស្ទូឌីយោ​បង្កើត​ហ្គេម​ដំបូង​គេ​បំផុត​នៅ​កម្ពុជា​ដែល​បង្កើត​កម្មវិធី​ស្មាតហ្វូន​ប្រើប្រាស់​បច្ចេក​វិទ្យា​ការពិត​និម្មិត្ត (Augmented Reality) ហៅ​កាត់​ថា AR ជា​បច្ចេកវិទ្យា​ដែល​បង្កើត​រូបភាព​និម្មិត​ដែល​មាន​ចលនា​នៅ​លើរូបភាព​ពិត​ផ្ទាល់ និងត្រូវ​បាន​គេ​ស្គាល់​ច្រើន​តាម​រយៈ​ហ្គេម Pokemon Go ជាមួយ​នឹង​គោល​បំណង​ចង់​លើក​កម្ពស់មរតក​ប្រពៃណី និង​រូបិយ​ប័ណ្ណ​រៀល​របស់​​កម្ពុជា។

ត្រូវ​បាន​បង្កើត​ឡើង​ដោយ​ក្រុម​អ្នក​អភិវឌ្ឍហ្គេម និង​អ្នកជំនាញ​ខាង​ឌីហ្សាញវ័យ​ក្មេង​ដែល​មាន​សមាជិក ១៨​ នាក់ កម្មវិធី Osja ជួយ​ឲ្យ​អ្នក​ប្រើប្រាស់​ធ្វើទំនាក់​ទំនង​ជាមួយនឹង​ក្រដាស​ប្រាក់​រៀល​។

នៅ​ពេល​ដែល​អ្នក​ប្រើប្រាស់​បើក​កម្មវិធី​នៅ​លើ​ស្មាត​ហ្វូន ឬ​ថែបប្លែតនេះ វា​នឹង​លោតចេញ​នូវ​ផ្ទាំង​មុខងារ​ស្រដៀង​នឹង​កាមេរ៉ា ហើយនៅ​ពេល​ដាក់វា​នៅ​លើក្រដាស​ប្រាក់ អ្នក​ប្រើប្រាស់​នឹង​បាន​ឃើញ​រូបភាព 3D លេច​ឡើង​នៅ​លើ​ក្រដាស​ប្រាក់​នោះ។

ប្រាក់​រៀល​ក្នុង​សម័យ​បច្ចេក​វិទ្យា

ជា​ទូទៅ ក្រដាស​ប្រាក់ ១០០ រៀល ជា​ក្រដាស​ប្រាក់​ដែល​មាន​តម្លៃ​ទាប​បំផុត នឹង​ឲ្យ​អ្នក​ប្រើប្រាស់​លេង​ហ្គេម​ស្ទូច​ត្រី ខណៈ​ក្រដាស​ប្រាក់ ៥០០ និង ១ ០០០ រៀល បង្កើតជា​គំនូរជីវចល​នៃ​អ្នក​រាំ​របាំ​ក្ងោក​ប៉ៃលិន​មួយគូ ពត់​ពេន​ខ្លួន​ទៅ​តាម​សាច់​ភ្លេង​ប្រពៃណី​របស់​របាំ​នេះ។
ក្រដាស​ប្រាក់ ២ ០០០ រៀល ដែល​មាន​រូបភាព​របស់​ប្រាសាទ​ព្រះវិហារ​ជា​គ្រឿង​សម្គាល់​ពិសេស នឹង​បង្ហាញ​អ្នក​ប្រើ​ប្រាស់​នូវ​រូបភាព​ពិត​នៃ​រចនាសម្ព័ន្ធ​ប្រាសាទ​នេះ។

ទន្ទឹម​នឹង​នេះ​ដែរ ក្រដាស​ប្រាក់ ៥ ០០០ និង ១០ ០០០ រៀល បង្កើត​នូវ​រូបភាពរៀង​គ្នា​នៃ​តួអង្គហនុមាន និង​យក្ស​ក្នុង​ល្ខោន​ខោល រឿង​រាមកេរ្តិ៍​របស់​ប្រទេស​កម្ពុជា។

លោក អៀ អ៊ុយ នាយក​ប្រតិបត្តិ និង​ជា​សហស្ថាប​និក​របស់​ស្ទូឌីយោ សប្បាយ​អស្ចារ្យ​ សង្ឃឹម​ថា កម្មវិធី​ស្មាត​ហ្វូន​ប្រើ​ប្រាស់​បច្ចេក​វិទ្យា AR ដំបូង​គេ​បំផុត​របស់​កម្ពុជា​នេះ នឹងជួយ​លើក​កម្ពស់​ប្រាក់​រៀល នៅ​ក្នុង​សេដ្ឋកិច្ច​កម្ពុជា ដែល​រង​ឥទ្ធិពល ដ៏​ខ្លាំង​ក្លា​នៃ​ប្រាក់​ដុល្លារ។

Content image - Phnom Penh Post
លោក អៀ អ៊ុយ នាយក​ប្រតិបត្តិ​របស់​ក្រុមហ៊ុន សប្បាយ​អស្ចារ្យ។ ហុង មិនា

លោក​និយាយថា៖ «កម្មវិធី Osja AR នឹង បង្កើន​តម្រូវការ​នៃ​ប្រាក់​រៀល​នៅ​ក្នុង​សេដ្ឋកិច្ច​កម្ពុជា ព្រោះ​ប្រជាជន នឹង​ចង់​បាន​ប្រាក់​រៀល​កាន់​តែ​ច្រើន​ដើម្បី​ប្រើ​ប្រាស់​ជាមួយ​នឹង​កម្មវិធី​នេះ ដើម្បី​​កម្សាន្ត ដែល​ជួយ​ទៅ​ដល់​ការ​ពង្រឹង​រូបិយបណ្ណ​ជាតិ ជា​កត្តាមួយ​ដែល​សំខាន់ ព្រម​ទាំង​ជា​អត្តសញ្ញាណ​ប្រទេស​ផង​ដែរ»។

កម្មវិធី​នេះ​ក៏​មាន​បេសកកម្ម​ផ្នែក​វប្បធម៌​ផង​ដែរ។

លោក អ៊ុយ អៀ សង្ឃឹម​ថា រូបភាព 3D ទាំង​នេះ នឹង​ជួយ​លើក​កម្ពស់​ស្មារតី​ស្រឡាញ់​សិល្បៈ​វប្បធម៌ជាតិ​របស់​ប្រជាជន​កម្ពុជា ជា​ពិសេស​ក្រុម​យុវជន។ ជា​ឧទាហរណ៍ រូបភាពគំនូរជីវចល​របស់​តួអង្គ​ហនុមាន និង​យក្ស អាច​ជួយ​ជំរុញ​ក្រុម​យុវជន​ឲ្យ​គាំទ្រ​សិល្បៈ​ល្ខោន​ខោល ដែល​កំពុង​តែ​ជួប​នឹង​ហានិភ័យ​នៃ​ការ​បាត់​បង់។

លោក Chivalry Yok សហស្ថាបនិក​ម្នាក់​ទៀត និងជា​នាយក​ផ្នែកច្នៃ​ប្រឌិត​ដែល​មើល​ការ​ខុស​ត្រូវ​ការ​បង្កើត​កម្មវិធី Osja AR បាន​​ឲ្យដឹងថា ក្រុម​របស់​លោក​បាន​ចំណាយ​ពេល​ប្រហែល​ពីរ​ខែ​ក្នុង​ការ​បង្កើត​វា ដោយ​បាន​ឆ្លងកាត់​បញ្ហា​ជា​ច្រើន។

លោកនិយាយថា៖​ «ជា​ការ​ពិត​ណាស់ ពិត​ជា​មិន​ងាយ​នោះទេ ដែល​យើង​បង្កើត​អ្វី​មួយ​ដែល​ថ្មី​ស្រឡាង​បែប​នេះ ដោយ​យើង​បាន​ទទួល​បរាជ័យ​ក្នុង​ការ​សាកល្បង​ជា​ច្រើន​ដង។ ក៏​ប៉ុន្តែ យើង​បាន​បន្ត​ការ​ខិត​ខំ​ប្រឹង​ប្រែង និង​ព្យាយាមសិក្សា​ពី​បរាជ័យ​របស់​យើង ក៏​ដូចជា ​ប្រទេស​ដទៃ​ទៀត​ដែល​បច្ចេកវិទ្យា​នេះ​ត្រូវ​បាន​គេ​ប្រើប្រាស់​ទូលំ​ទូលាយ​រួច​ទៅ​ហើយ»។

បង្កើត​ឡើង​នៅ​ឆ្នាំ ២០១១ ដោយ «អ្នក​ស្រឡាញ់​ហ្គេម» ៤ នាក់ ស្ទូឌីយោ អស្ចារ្យ គឺ​ជាក្រុមហ៊ុន​បង្កើត​ហ្គេម​ដំបូង​គេ​បង្អស់​នៅ​កម្ពុជា ដោយ​ក្រោយ​មក​បាន​ប្តូរ​ឈ្មោះ​មក​ជា សប្បាយ​អស្ចារ្យ វិញ។ ក្រុមហ៊ុន​នេះ​បាន​ឈ្នះ​ពាន​រង្វាន់ ASEAN Character Award សម្រាប់​តួអង្គ អាស្វា នៅ​ក្នុង​ហ្គេម Asva the Monkey។

ចាប់​តាំង​ពី​ការ​ដាក់​ឲ្យ​ទាញយក​កាល​ពីមួយ​ខែមុន កម្មវិធី Osja AR ត្រូវ​បាន​ទាញ​យក​ជាង ៤ ម៉ឺន ដង គិត​មក​ត្រឹម​សប្តាហ៍​មុន។

លោក អ៊ុយ អៀ និងលោក Chivalry Yok សង្ឃឹមថា កម្មវិធី​នេះ​នឹង​ជួយ​បើក​ទ្វា​សម្រាប់​បច្ចេកវិទ្យា​ការពិត​និម្មិត្ត សម្រាប់​ការ​ប្រើប្រាស់​ក្នុង​វិស័យ​ដទៃ​ទៀត​នៅ​កម្ពុជា។ បច្ចុប្បន្ន​នេះ ក្រុមហ៊ុន កំពុង​តែ​ធ្វើ​ការ​ដើម្បី ប្រើ​ប្រាស់​បច្ចេក​វិទ្យា​​នេះ ដើម្បី​ផ្សព្វ​ផ្សាយ​ពី​ព្រឹត្តការណ៍​នានា​។

លោក អៀ អ៊ុយ បន្ថែម​ថា៖ «ក្រៅពីមុខងារ​ជា​កម្មវិធី​កម្សាន្ត បច្ចេកវិទ្យា AR ត្រូវ​បាន​គេ​ប្រើប្រាស់​នៅ​ក្នុង​វិស័យ​ជា​ច្រើន​ដូចជា វេជ្ជសាស្រ្ត ស្ថាបត្យកម្ម និងការ​បង្ហាញ​ផ្លូវ នៅ​ក្នុង​ប្រទេស​អភិវឌ្ឍន៍​មួយ​ចំនួន។ កម្មវិធី Osjar AR អាច​នឹង​ជា​ជំហាន​ដំបូង​ឆ្ពោះ​ទៅ​រក​កម្រិត​ព័ត៌មាន​វិទ្យា​បែប​នោះ នៅ​ប្រទេស​កម្ពុជា»៕

0

Comments

Please, login or register to post a comment

ព័ត៌មានពាក់ព័ន្ធ