.jpg)
ភ្នំពេញៈ ស៊ីអាយអិមប៊ីគ្រុប (CIMB Group) ប្រកាសផ្តល់អាហារូបករណ៍ ១០០% ដល់និសិ្សតក្នុងបណ្តាប្រទេសតំបន់អាស៊ានដែលមានបំណងចង់បន្តការសិក្សាថ្នាក់បរិញ្ញាបត្រនៅគ្រប់សាកលវិទ្យាល័យល្បីឈ្មោះណាមួយនៅជុំវិញពិភពលោក។
នេះគឺជាលើកទីបីហើយ ដែលក្រុមហ៊ុននេះបានផ្តល់អាហារូបករណ៍សម្រាប់សិស្ស-និស្សិតជយលាភីនៅក្នុង ប្រទេសកម្ពុជា ម៉ាឡេស៊ី ឥណ្ឌូនេស៊ី សិង្ហបុរី ថៃ វៀតណាម និងហ្វីលីពីន។
អាហារូបករណ៍ពេញលេញ ដែលរួមបញ្ចូល រួមមានថ្លៃសិក្សា សំបុត្រយន្តហោះ កន្លែងស្នាក់នៅ ដំណើរកម្សាន្តមកស្រុកកំណើត សេវាធានារ៉ាប់រង ព្រមទាំងថ្លៃចំណាយផ្សេងៗផងដែរ អនុញ្ញាតឲ្យសិស្សនិស្សិតដែលត្រូវបានជ្រើសរើស សិក្សាជំនាញដែលខ្លួនពេញចិត្ត សម្រាប់ថ្នាក់បរិញ្ញាបត្រនៅសាកលវិទ្យាល័យជុំវិញពិភពលោក។
លើសពីនេះទៅទៀត ស៊ីអាយអិមប៊ីគ្រុប (CIMB Group) ក៏ផ្តល់ឱកាសឲ្យនិស្សិតជយលាភីទទួលបានការងារ ក្នុងចំណោម ១៧ ប្រទេសដែលមានសាខារបស់ ស៊ីអាយអិមប៊ីគ្រុប ក្រោយបញ្ចប់ការសិក្សាផងដែរ។
លោកស្រី អ៊ុំ ចិន្តាភក្តី ដែលជានាយិកាធនធានមនុស្សរបស់ធនាគារ CIMB បានថ្លែងថា៖ «តាងនាមឲ CIMB Group នៅកម្ពុជា ខ្ញុំសូមលើកទឹកចិត្តដល់និស្សិតខ្មែរទាំងអស់ចូលរួមដាក់ពាក្យស្នើសុំអាហារូបករណ៍នេះ ហើយនេះជាមោទនភាពរបស់ប្រទេសកម្ពុជាដែលមាននិស្សិតខ្មែរយើងកន្លងបានប្រឡងជាប់កម្មវិធីអាហារូបករណ៍នេះ។»
យុវត្តី ងួន ពញ្ញានាត ជានិស្សិតខ្មែរឆ្នើមមួយរូបដែលទទួលបានអាហារូបករណ៍របស់ CIMB ហើយបច្ចុប្បន្ននាងកំពុងសិក្សានៅសាកលវិទ្យាល័យ McGill នៃប្រទេសកាណាដា បានឲដឹងដែរថា៖ “ខ្ញុំពិតជាពេញចិត្តចំពោះការសិក្សារបស់ខ្ញុំនៅទីនេះ ជាមួយនឹងគុណភាពអប់រំស្តង់ដារពិភពលោក ហើយខ្ញុំសូមលើកទឹកចិត្តដល់សិស្សនិស្សិតខ្មែរទាំងអស់ចូលរួមដាក់ពាក្យស្នើសុំអាហារូបករណ៍នេះ។»
អាហារូបករណ៍តំបន់អាស៊ានរបស់ CIMB ឆ្នាំ ២០១៨ បើកទទួលពាក្យពីថ្ងៃនេះ រហូតដល់ថ្ងៃទី ០៥ ខែ មិនា ឆ្នាំ២០១៨។ សម្រាប់លក្ខខណ្ឌដាក់ពាក្យស្នើសុំ និងពត៌មានបន្ថែមសូមចូលទៅកាន់គេហទំព័រ:www.cimb.com/aseanscholarship។
