Search form

Login - Register | FOLLOW US ON

Logo of Phnom Penh Post newspaper Phnom Penh Post - Sipar និង NTC Group រួម​គ្នា​បង្កើត «យុទ្ធនាការអំណាន» នៅ​គ្រឹះស្ថាន​សិក្សា​ឯកជន​លើក​ដំបូង

Content image - Phnom Penh Post
លោក ហុក សុទ្ធិ នាយក​អង្គការ​ស៊ីប៉ា(បង់កក្រមា)​ និង លោក ឃឹម ផុន (ឆ្វេង) ប្រធាន​នាយក​ប្រតិបត្តិ​ស្ថាប័ន​អប់រំ NTC Group ក្នុង​ពិធី​ចុះ​ហត្ថលេខា​សហការរវាង​ស្ថាប័ន​ទាំពីរ។ រូប សហការី

Sipar និង NTC Group រួម​គ្នា​បង្កើត «យុទ្ធនាការអំណាន» នៅ​គ្រឹះស្ថាន​សិក្សា​ឯកជន​លើក​ដំបូង

ភ្នំពេញៈ ​អង្គការ ​ស៊ីប៉ា ​និង ​ស្ថាប័ន​អប់រំ ​NTC Group ដែល​មាន​សាលារៀន​ សុវណ្ណភូមិ​ សាលា ​ប្រ៊ីជតុន​ សាលា​ ញូវ​តុន​ធីឡាយ​ សាលា​អន្ដរ​ជាតិ​អាមេ​រិកាំង​ប៉ាស៊ី​ហ្វិក​ និង​សាលា​អន្ដរ​ជាតិ​អ៊ីស​វ៉េស​ បាន​ផ្ដើម ​«យុទ្ធ​នាការ​អំណាន​»​ ក្នុង​ប្រទេស​កម្ពុជា​នៅ​សាលា​ឯក​ជន​លើក​ដំបូង​ ដើម្បី​បណ្ដុះ ​និង​ពង្រឹង​ទម្លាប់​នៃ​ការ​អាន​ពេញ​មួយ​ជីវិត​ របស់​កុមារ​។

លោក ​ហុក ​សុទ្ធិ ​នាយក​អង្គការ​ស៊ីប៉ា ​បាន​ថ្លែង​នៅ​ក្នុង​ពិធី​ចុះ​ហត្ថ​លេខា​សហការ​គ្នា​នា​ព្រឹក​ថ្ងៃ​ព្រហស្បតិ៍​នេះ​ថា យុទ្ធនា​ការ​អំណាន​នេះ​នឹង​ផ្តោត​ជា​ពិសេស​លើ​សកម្ម​ភាព​ផ្សេងៗ​ ដើម្បីបណ្តុះ និង​ពង្រឹង​ទម្លាប់​នៃ​ការ​អាន​ពេញ​មួយ​ជីវិត​របស់​កុមារ​ទាំង​នៅ​ក្នុង​សាលា​ និង​នៅ​ផ្ទះ ​ដោយ​មាន​ការចូល​រួម​ពីសិស្ស​ អាណា​ព្យាបាល គ្រូ​បង្រៀន​របស់​ពួក​គេ។

លោក​បាន​ថ្លែង​ថា «នៅ​ក្នុង​យុទ្ធ​នាការ​នេះ Sipar នឹង​ប្រើ​ប្រាស់​បណ្ណា​ល័យ​ចល័ត​របស់​ខ្លួន​ដើម្បី​រៀប​ចំសប្តាហ៍​អំណាន​ដែល​​មាន​សកម្ម​ភាព​ផ្សេងៗ​ ដូច​ជា​និទាន​រឿង​កម្សាន្ត​បែប​អប់រំ ​និង​សំណួរ​ល្បង​ប្រាជ្ញា​ដល់​សិស្ស​» ។

លោក​បាន​បន្ដ​ថា​ Sipar ក៏​នឹង​បង្កើត​សកម្ម​ភាពអំ​ណាន​ក្នុង​សាលា ​ដូច​ជា​ព្រឹត្តិ​ការណ៍​ជជែក​អំពី​សៀវភៅ​ បង្កើត​ក្លឹប​អ្នក​អាន​ រៀប​​ចំព្រឹ​ត្តិការណ៍​សម្ពោធ​សៀវ​ភៅ​ចេញថ្មី​ បង្កើត​​ទំនាក់​​ទំនង​យ៉ាង​ជិត​ស្និទ្ធ​ជា​មួយ​នឹង​សិស្ស​កម្រិត​វិទ្យា​ល័យ​ដើម្បី​ពង្រីក​កម្រិត​អំណាន​របស់​ពួក​គេ​ ក៏មានរៀប​ចំសិក្ខា​សាលា​ជា​មួយ​គ្រូបង្រៀននិង​បណ្ណា​រក្ស​ស្តីពី​របៀប​ជ្រើស​រើស​សៀវ​ភៅអាន​ឲ្យ​បាន​ត្រឹម​ត្រូវ​តាម​​កម្រិត​នៃការ​យល់​ដឹង​របស់​កុមារផងដែរ។

លោក ​សុទ្ធិ ​បាន​អះអាង​ថា ​ «អង្គការ​ Sipar​ មាន​មោទនភាព​ក្នុង​ការ​បង្កើត​ភាពជា​ដៃគូ​ផ្លូវការ​លើក​ទីមួយ​ជា​មួយ​នឹង​សាលា​ឯក​ជន​ដើម្បី​អភិវឌ្ឍ​ទម្លាប់​អំណាន​ក្នុង​ប្រទេស​កម្ពុជា​»។

លោក​បាន​បញ្ជាក់​បន្ថែម​ថា ​«ភាព​ជាដៃ​គូនេះ​នឹង​បើក​ផ្លូវ​ឱ្យ​ស្ថាប័ន​អប់រំ​ផ្សេងៗ​ទៀត​ (ទាំង​សាលា​ឯក​ជន និង​សាលា​រដ្ឋ​) ​ចាប់​ផ្តើម​ដំណើរ​ការដូចគ្នា​នេះ​ដើម្បី​ជា​ប្រយោជន៍​យូរ​អង្វែង​ដល់​សិស្ស​គ្រប់​ៗគ្នា» ។

លោក​ ឃឹម​ ផុន​ ប្រធាន​នាយក​ប្រតិ​បត្តិ​ស្ថាប័ន​អប់រំ ​NTC Group ​បាន​ឲ្យ​ដឹង​ដែរ​ថា ​ទោះ​បី​នេះ​គឺ​ជា​លើក​ដំបូង​ដែល​ស្ថាប័ន​របស់​លោក​បាន​សហ​ការ​ជា​មួយ​អង្គការ​ស៊ីប៉ា​ក៏ដោយ​ ប៉ុន្ដែ​កន្លង​មក​ស្ថាប័ន​អប់រំរបស់​លោក​ក៏ដូច​ជា​សាលា​ទាំងអស់​បាន​ធ្វើ​សកម្ម​ភាព​ជាច្រើន​រួច​មក​ហើយ​ ក្នុង​ការ​ជំរុញ​ការ​អាន​នេះ​ដល់​សិស្ស​ តាម​រយៈ​ការ​បង្កើត​បណ្ណាល័យ​នៅ​គ្រប់​សាលា ​មាន​ទាំង​បណ្ណា​ល័យ​ដែល​មាន​សៀវភៅ​ជា​ភាសា​ខ្មែរ​ និង​អង់​គ្លេស​ដើម្បី​ជំរុញ្​ការ​អាន​បន្ថែម​ដល់​សិស្ស ។

លោក​បាន​បន្ដ​ថា ​«កន្លង​មក​យើង​បាន​បង្កើត​បណ្ណា​ល័យ​ឲ្យ​មាន​នៅ​គ្រប់​ទីតាំង​ទាំង​អស់​នៅ​សាលា​រៀន​របស់​យើង​ ហើយ​បណ្ណា​ល័យ​នោះ​មាន​ពីរផ្នែក​ទៅទៀត​ គឺផ្នែក​ភាសាខ្មែរ ​និង​បណ្ណា​ល័យ​ផ្នែក​ភាសា​អង់គ្លេស ។ ហើយ​យើង​បាន​បំពាក់​នៅ​សៀវ​ភៅ​ទំនើបៗ​ជាច្រើន​ដើម្បី​ជំរុញ​ការ​អាន​ដល់​សិស្ស ​ហើយ​នៅ​ ៣-៤​ឆ្នាំ​ចុង​ក្រោយ​នេះ​ យើង​សង្កេត​ឃើញ​ថា ​សន្ទុះ​នៃ​ការ​អាន​របស់​សិស្ស​មាន​ការ​កើន​ឡើង​ច្រើន​ណាស់​» ។

លោក​ ឃឹម​ផុន​ បាន​អះអាង​ថា «​សន្ទុះ​នៃការ​អាន​ច្រើនដោយ​សារ​មាតាបិតា​របស់​សិស្ស គាត់​បា​ន​ចាប់​អា​រម្មណ៍​ចំពោះ​ការ​អាន​ច្រើន ​ពួកគាត់​បាន​មក​សំណូម​ពរ​ដូច្នេះ​សូម្បី​តែនៅ​ក្នុង​ថ្នាក់ ​ក៏​យើង​មាន​កន្លែង​សម្រាប់​ឲ្យ​សិស្ស​អាន​ដែរ ​ដើម្បី​ជួយ​​ឲ្យ​សិស្ស​ដែល​គាត់​មិន​ទាន់​មាន​កាល​វិភាគ​អាន​ គាត់​អាច​យក​ថ្នាក់​រៀន​របស់​គាត់​ជា​កន្លែង​អាន​ក៏បាន​» ។

លោក​បាន​លើក​ឡើង​ថា ​ការ​សហការ​គ្នា​នេះ​ គឺ​ជា​ពេល​ដ៏ល្អ​មួយ​ដើម្បី​បង្កើន​សកម្មភាព​ជំរុញ​ការ​អាន​នេះ​បន្ថែម​ទៀត​ ព្រោះ​អង្គការ ​ស៊ីប៉ា ​គឺជា​ស្ថាប័ន​ដែល​មាន​ជំនាញ​ស្រាប់​ចំពោះ​រឿង​នេះ ​ដូច្នេះ​ការ​ជំរុញ​ការ​អាន​នៅ​ស្ថាប័ន​អប់រំ​របស់ ​NTC Group និង​រឹត​តែ​ប្រសើរ​ ។

លោក​បាន​ឲ្យ​ដឹង​ទៀត​ថា « ​ស្ថាប័ន​អប់រំ​យើង​នឹង​ឲ្យ​អង្គការ​ស៊ីប៉ា ​បង្កើត​យុទ្ធនា​ការ​នៃការ​អាន​នៅ​តាម​សាលា​របស់​យើង​ទាំង​អស់ ​និង​​លើក​ទឹក​ចិត្ត​អាណា​ព្យា​បាល​កុមារ​ឱ្យ​ប្រើ​ប្រាស់​សៀវភៅ Sipar ​នៅ​តាម​ផ្ទះ ដើម្បី​បង្កើត​វប្ប​ធម៌​អំណាន​នៅ​ក្នុង​គ្រួសារ​របស់​សិស្ស​» ៕

0

Comments

Please, login or register to post a comment

ព័ត៌មានពាក់ព័ន្ធ