យោងតាមតួលេខពីហាងលក់សៀវភៅនានានៅកម្ពុជា សៀវភៅជាភាសាបរទេសនៅប៉ុន្មានឆ្នាំចុងក្រោយនេះ មានការកើនឡើងជាលំដាប់។
ដូច្នេះ សប្តាហ៍នេះ ទស្សនាវដ្តី LIFT នឹងបង្ហាញសៀវភៅជាភាសាបរទេសដែលមានប្រជាប្រិយភាពបំផុតចំនួន ១០ ក្បាល ប្រចាំហាងលក់សៀវភៅបរទេសល្បីៗនៅកម្ពុជា។
បើតាមប្រភពពី Monument Book និងបណ្ណាគារ D''s Book សៀវភៅជាភាសាបរទេសដែលលក់ដាច់ជាងគេនៅបណ្ណាគារទាំងពីរនោះមាន៖
|
1.Hun Sen’s Cambodia
និពន្ធដោយលោក Sebastian Strangio ជាអ្នកកាសែតមួយរូបនៅកម្ពុជា។ សៀវភៅនេះ រៀបរាប់ពីស្ថានភាពរបស់ប្រទេសកម្ពុជាដែលស្ថិតនៅក្រោមការដឹកនាំដោយលោកហ៊ុន សែន បន្ទាប់ពីការផ្តួលរំលំសម័យខ្មែរក្រហមឆ្នាំ១៩៧៩។
|
|
2.Fifty Shades of Grey
និពន្ធដោយ E. L. James ជាប្រភេទរឿងស្នេហា របស់យុវតីដែលទើបតែបញ្ចប់ ការសិក្សានៅមហាវិទ្យាល័យ ជាមួយនឹងអ្នកជំនាញវ័យក្មេងម្នាក់។ ភាគច្រើននៅក្នុងសៀវភៅរឿងនេះគឺនិយាយពីឈុតឆាកទំនាក់ទំនងសេ្នហាប្រុសស្រី។
|
|
3.The Fault in Our Stars
និពន្ធដោយ John Green ជារឿងបែបមនោសញ្ចេតនាមួយ និយាយពីគូស្នេហ៍មួយគូ ដែលមានជំងឺមហារីកដូចគ្នា។ គេរំពឹងថាអ្នកដែលស្លាប់មុន គឺជាតួឯកស្រី តែចុងបញ្ចប់បែរជាតួឯកប្រុសទៅវិញ។
|
|
4.If I Stay
និពន្ធដោយ Gayle Forman ជារឿងប្រលោមលោកបែបមនោសញ្ចេតនា របស់នារីម្នាក់ដែលជួបឧបទ្ទវហេតុគ្រោះថ្នាក់ចរាចរណ៍ រួចធ្វើឲ្យនាងភ្លឹកស្មារតី មិនអាចដឹងខ្លួន។ ប៉ុន្តែនាងអាចមើលឃើញអ្វីនៅជុំវិញខ្លួន ហើយនាងកំពុងតែសម្រេចចិត្តថាគួរតែបន្តជិវិតរស់នៅ ឬក៏ទៅ។
|
|
5.The Maze Runner
និពន្ធដោយលោកJames Dashner រឿងនេះនិយាយពី ប្រតិបត្តិការរបស់យុវជនមួយក្រុម ដើម្បីរកផ្លូវចេញពីកន្លែងមួយឈ្មោះថា ព្រៃវង្វេងដោយមានការគ្រប់គ្រងដោយក្រុមមួយផ្សេងទៀតហៅថា Glade។
|
|
6.The Hunger Games
និពន្ធដោយ Suzanne Collins ជារឿងនិយាយពីខ្សែរជីវិតរបស់នារីម្នាក់មានជំនាញខាងបាញ់ព្រួញ។ នាងបានស្ម័គ្រចិត្តជំនួសប្អូនស្រីដើម្បីចូលប្រកួតលេងល្បែងមួយដែលតម្រូវឱ្យអ្នកចូលរួមទាំងអស់សម្លាប់គ្នាទៅវិញទៅមក។
|
|
7.Divergent
និពន្ធដោយ Veronica Roth ជាសៀវភៅនិយាយពីជីវិតរបស់នារីម្នាក់ដែលបោះបង់គ្រួសាររបស់ខ្លួន ដើម្បីហ្វឹហាត់ខ្លួនឯងទៅជាមនុស្សដ៏ខ្លាំងម្នាក់។ តែចុងក្រោយនាងបានប្រើជំនាញទាំងនោះ ដើម្បីបំផ្លាញរដ្ឋាភិបាលព្រៃផ្សៃនៅក្នុងតំបន់របស់នាង។
|
|
8.Where Rainbows End ( Love, Rosie)
និពន្ធដោយCecelia Ahern ជាប្រភេទរឿងស្នេហារបស់គូស្នេហ៍មួយ ដែលស្គាល់គ្នាតាំងពីកុមារភាព តែពួកគេត្រូវឃ្លាតឆ្ងាយពីគ្នា ដោយសារតែគ្រួសារតួឯកប្រុសត្រូវរើផ្ទះទៅកន្លែងផ្សេង។
|
|
9.Rich Dad, Poor Dad
និពន្ធដោយ Robert Kiyosaki ជារឿងប្រលោមលោក ពិពណ៌នាពីជីវិតបុរសម្នាក់ដែលមាន ឳពុក២ ដែល ម្នាក់ជាឳពុកបង្កើត(ក្រ) និងម្នាក់ទៀតជាឪពុករបស់មិត្តភក្តិជិតស្និទ្ធ(មាន)។ ពួកគេបានបង្រៀនតួឯកប្រុសដើម្បីឱ្យមានភាពជោគជ័យ ដោយរបៀប២ ខុសគ្នា។
|
|
10.City of Bones
និពន្ធដោយ Cassandra Clare ជាប្រភេទរឿងផ្សងព្រេង ដែលជាភាគមួយនៅក្នុងរឿង The Mortal Instruments និយាយ ពីប្រតិបត្តិការកម្ចាត់បិសាចរបស់យុវជនមួយក្រុម ដែលដើមហេតុកើតឡើង ដោយសារក្រុមបិសាចបានចាប់ខ្លួនម្តាយរបស់តួឯកស្រី។
|
អត្ថបទដោយ
ម៉ៅ មង្គលរង្សី និង អ៊ុំ សូនីតា
.jpg)
