ការ​ស្ទះ​ចរាចរណ៍​នៅ​ក្នុង ទីក្រុង​ភ្នំពេញ កើត​ឡើង​សឹង​តែ​រៀង​រាល់​ថ្ងៃ ពិសេស​នៅ​ចន្លោះ​ពេល​ល្ងាច ខណៈ​ដែល​សិស្សានុសិស្ស កម្មករ និង​បុគ្គលិក​រដ្ឋ ឬ​ក្រុម​ហ៊ុន​នានា បាន​បញ្ចប់​ការងារ និង​ប្រញាប់​រូតរះ​ត្រឡប់​ទៅ​កាន់​គេហដ្ឋាន​រៀងៗ​ខ្លួន។ ការ​កក​ស្ទះ ត្រូវ​បាន​ប្រជា​ពលរដ្ឋ​ទូទៅ​យល់​ដឹង​ជា​រួម​ថា ដោយ​សារ​អ្នក​បើក​បរ​ភាគ​ច្រើន​មិន​សូវ​គោរព​ច្បាប់ គ្មាន​ភាព​អធ្យាស្រ័យ ការ​ចត​លើ​ចំណី​ផ្លូវ និង​ភាព​ប៉ះពាល់​ដោយ​សារ​មាន​ការដ្ឋាន​សាង​សង់​ជាដើម។