ឆ្លៀតឱកាសពេលព្រលឹម ទៅចាប់យកទស្សនីយភាពព្រះអាទិត្យរះនៅខាងមុខប្រាសាទអង្គរវត្ត និងមើលព្រះអាទិត្យលិចនៅលើកំពូលភ្នំបាក់ខែង ជិះកង់ស្រូបយកខ្យល់បរិសុទ្ធតាមដងផ្លូវជិះទៅអង្គរ ដែលអមទៅដោយព្រៃឈើដែលមានអាយុកាលជាង៣០០ឆ្នាំ លោកអ្នកប្រាកដជាទទួលបានអារម្មណ៍ស្រស់ស្រាយ ជាមួយនឹងភាពស្ងប់ស្ងាត់ និងសុខសាន្តបែបនេះ នៅក្នុងទឹកដីខេត្តសៀមរាប។
ក្រុងសៀមរាប ដែលជាឋានសួគ៌តូចច្រឡឹងមួយ តែសម្បូរទៅដោយសម្បត្តិវប្បធម៌ ដែលរួមមាន ប្រាសាទបុរាណរាប់ពាន់ ភ្នំ ទឹកជ្រោះ និងប្រជាជនរាក់ទាក់ បានទាក់ទាញអ្នកធ្វើដំណើរទាំងក្នុងស្រុក និងក្រៅស្រុករាប់លាននាក់ ជារៀងរាល់ឆ្នាំ។
ក្រៅពីការដើរទស្សនាប្រាសាទទាំងក្នុងវង់តូច វង់ធំ បារាយណ៍ ទឹកជ្រោះភ្នំបាក់ខែង ។ល។ សៀមរាប មានកន្លែងទេសចរណ៍ជាច្រើនទៀតដែលអ្នកមិនគួរខកខានក្នុងការទៅទស្សនា។
សម្រាប់ឱកាសបុណ្យចូលឆ្នាំចិននេះ LIFT ណែនាំលោកអ្នកទៅកាន់កន្លែងទេសចរណ៍ពិសេសៗមួយចំនួនក្នុងខេត្តសៀមរាប។
១.ទស្សនីយភាពថ្ងៃលិចនៅភូមិលិចទឹក
ធ្លាប់តែគយគន់ថ្ងៃលិចនៅភ្នំបាក់ខែងទស្សនារដ្តី LIFT នឹងណែនាំកន្លែងថ្មីមួយ ដែលមានចម្ងាយពីក្រុងសៀមរាបជាង២០គម មានឈ្មោះថា «កំពង់ភ្លុក» ដែលអ្នកទេសចរអាចចំណាយពេលកន្លះថ្ងៃធ្វើដំណើរ និងទស្សនាថ្ងៃលិចនៅទីនោះបាន។ បន្តការធ្វើដំណើរដោយទូកជាង ៣០ នាទីទៀត លោកអ្នកនឹងទៅដល់ភូមិលិចទឹកកំពង់ភ្លុកដែលមានប្រជាជនរស់នៅយ៉ាងកុះករ មានផ្សារ មានសាលារៀន និងសាលាឃុំ ហើយអ្វីដែលគួរឲ្យចាប់អារម្មណ៍ជាងនេះទៅទៀតនោះ យើងនឹងឃើញមានទូកក្តោងដែលជាយានជំនិះដាក់ចតនៅខាងមុខផ្ទះប្រជាជននីមួយៗប្រៀបបានដូចជាម៉ូតូ ឬរថយន្តអ៊ីចឹង។
នៅពេលដែលទៅដល់ភូមិនេះ លោកអ្នកអាចជួលទូកក្តោងតូចៗដើម្បីជិះទស្សនាតាមផ្លូវតូចៗនៅក្នុងភូមិ និងទៅកណ្តាលទន្លេសាប លោកអ្នកអាចចែវដោយខ្លួនឯង វាជាការជួយគាំទ្រជីវភាពប្រជាជននៅទីនោះផងដែរ។ ទន្ទឹមនឹងនេះ លោកអ្នកអាចស្រូបយកខ្យល់អាកាស ទស្សនាជីវភាពរស់នៅរបស់ប្រជាជន និងទទួលយកបទពិសោធមើលថ្ងៃលិចនៅទន្លេសាបបានទៀតផង។
|
២.ជិះខ្សែរ៉កក្នុងព្រៃ Flight of the gibbon
នៅក្នុងវង់តូច និងវង់ធំ តើលោកអ្នកមានធ្លាប់ដើរកម្សាន្តទៅណាក្រៅពីប្រាសាទទៀតទេ? ប្រសិនបើលោកអ្នកមិនខ្លាចខ្ពស់ហើយចង់ទទួលបានបទពិសោធជិះខ្សែរ៉កឆ្លងកាត់ព្រៃស្រោងក្នុងតំបន់អង្គរ «Flight of the Gibbon Angkor» គឺជាជម្រើសទី១ដែលលោកអ្នកគួរសាកល្បង។
ស្ថិតនៅលាក់កំបាំងពីផ្លូវលំអង្គរហួសប្រាសាទតាកែវបន្តិច យើងនឹងឃើញស្លាកសញ្ញាមួយបង្ហាញទិសទៅ Flight of the Gibbon Angkor។ ហោះពីដើមឈើមួយ ទៅដើមឈើមួយ ពីកម្ពស់ទាបទៅកម្ពស់ខ្ពស់ រហូតដល់ដើមឈើដែលធំជាងគេ និងខ្ពស់ជាងគេ អ្នកទេសចរប្រាកដជាទទួលអារម្មណ៍រំភើបស្រស់ស្រាយ។
|
|
៣.ទស្សនីយភាពសម្តែងសៀក ហ្វារ (PhareThe Cambodian Circus)
ក្រោយពីការធ្វើដំណើរទៅកន្លែងទេសចរណ៍ពេញមួយថ្ងៃ សៀមរាបនៅតែមានកន្លែងពិសេសមិនចេះអស់ សម្រាប់ផ្ទាំងទស្សនីយភាពពេលរាតី្រ យើង សូមណែនាំ ការសម្តែងសៀកហ្វារ របស់យុវជនកម្ពុជា។
ស្ថិតនៅក្រោមតង់ខ្នាតធំពណ៌ក្រហមស្រស់ មានឆាកសម្តែងរាងមូលនៅចំកណ្តាល រៀបចំទៅដោយឧបករណ៍ទាំងភ្លេងបុរាណ និងសម័យ ព័ទ្ធជុំវិញទៅដោយកៅអីអង្គុយទស្សនារៀបជាថ្នាក់ៗយ៉ាងមានសណ្តាប់ធ្នាប់។
ហ្វារ ជាប្រភេទសៀកសហសម័យម្យ៉ាងសម្តែងដោយយុវជនខ្មែរដែលរួមបញ្ចូលការសម្តែងសៀក ការរាំ និងច្រៀងទាំងបែបបុរាណ និងទំនើបចូលគ្នាជាសាច់រឿង ស្តែងពីជីវភាពពិតៗរបស់ប្រជាជនខ្មែរនៅក្នុងសង្គម។ ហ្វារមានទីតាំងនៅខាងក្រោយសារមន្ទីរសៀមរាប និងការសម្តែងមានរយៈពេលប្រហែលមួយម៉ោង ចាប់ពីម៉ោង ៨ យប់ទៅដែលសាច់រឿងមានការផ្លាស់ប្តូរជារៀងរាល់យប់។
|
|
៤.ភ្លក្សអាម៉ុកនៅ Red Piano
បន្ទាប់ពីទស្សនាសៀករួច លោកអ្នកមិនគួរភ្លេចពីអាហារពេលល្ងាចនោះទេ។ ក្រុងសៀមរាបមានភោជនីយដ្ឋានជាច្រើន មានជម្រើសម្ហូប រាប់តាំងពីហាងតូចៗតាមដងផ្លូវទៅហាងទំនើបធំៗ តាមចំណង់ចំណូលចិត្ត។ Red Piano ជាភោជនីយដ្ឋានមួយស្ថិតនៅកាច់ជ្រុង Pub Street បម្រើអាហារទាំងអាស៊ី និងអឺរ៉ុបមានរសជាតិឆ្ងាញ់ និងតម្លៃសមរម្យ ហើយអ្វីដែលសំខាន់នោះលោកអ្នកសាកភ្លក្សអាម៉ុកត្រីនៅទីនោះបាន។
លក្ខណពិសេសរបស់ «Red Piano» គឺសុទ្ធសឹងតែគ្រប់ម្ហូបទាំងអស់មានលាយជាមួយខ្ទិះដូង ដែលជួយបន្ថែមរសជាតិមួយកម្រិតទៀត។ ជញ្ជាំងពណ៌ក្រហម តុបតែងជាមួយគ្រឿងសង្ហារិមពណ៌ស និងខ្មៅ បូករួមជាមួយពន្លឺអំពូលក្រហម បង្កើតនូវបរិយាកាសរ៉ូមែនទិកសម្រាប់ការជួបជុំគ្រួសារ ឬមិត្តភក្តិជាក្រុម។
|
|
៥.ផ្សាររាត្រី និងPub Street
ជឿជាក់ថា មិត្តអ្នកអានទាំងអស់គ្នាមិនដែលខកខានទៅកម្សាន្តនៅផ្សាររាត្រី និងPub Street នោះទេរាល់ពេលធ្វើដំណើរទៅសៀមរាប យើង សូមណែនាំកន្លែងពីរដែលត្រូវតែទៅនៅពេលដែលទៅដល់ទីនោះ។
ទី១គឺទៅម៉ាស្សាជើងនៅក្នុងផ្សាររាត្រី ដើម្បីបំបាត់ការនឿយហត់មួយថ្ងៃពេញ ដើរទស្សនាពីមួយកន្លែងទៅមួយកន្លែង និងទុកជាកាដូសម្រាប់ខ្លួនឯង ហើយលោកអ្នកអាចសម្រាក និងជជែកលេងជាមួយអ្នកម៉ាស្សា ដែលភាគច្រើនជាប្រជាជនសៀមរាបតែម្តង។
ទី២ គឺទៅកម្សាន្តនៅអាសនៈ (The Wooden House Pub)។ សម្រាប់អ្នកដែលចង់ផ្លាស់ប្តូរបរិយាកាស ចង់ស្តាប់ភ្លេង ជជែកគ្នាលេង អាសនៈជាជម្រើសមួយក្នុងចំណោម Pubជាច្រើននៅម្តុំ Pub Street។
ស្ថិតនៅខាងក្រោយបារ៍ Temple អាសនៈ ជាផ្ទះឈើយ៉ាងប្រណីតមួយ មានពីរជាន់ តុបតែងលក្ខណៈបុរាណ មានគ្រែ អង្រឹង និងសាឡុង ដែលមានខ្នើយគ្របដណ្តប់ដោយកំណាត់ប៉ាក់ អមជាមួយបទភ្លេង Jazz យ៉ាងពីរោះរណ្តំ៕
|
អត្ថបទ និងរូបភាពដោយ រ៉េត មុនីនាថ
.jpg)
