.jpg)
មន្ត្រី KOICA និងមន្ត្រីមន្ទីរពេទ្យព្រះអង្គឌួង ដែលត្រូវបានអញ្ជើញឱ្យចូលរួមវគ្គបណ្តុះបណ្តាលនៅប្រទេសកូរ៉េ។ រូបថត សហការី
ភ្នំពេញៈ មន្ត្រីនៃមន្ទីរពេទ្យព្រះអង្គឌួង កម្រិតថ្នាក់ដឹកនាំចំនួន៥រូបបន្ថែមទៀត ត្រូវបានទីភ្នាក់ងារសហប្រតិបត្តិការអន្តរជាតិកូរ៉េ (KOICA) អញ្ជើញឱ្យចូលរួមវគ្គបណ្តុះបណ្តាល សម្រាប់អ្នកគ្រប់គ្រង នៅសាធារណរដ្ឋកូរ៉េ (កូរ៉េខាងត្បូង) ក្នុងគោលបំណងដើម្បីបង្កើនចំណេះដឹង និងជំនាញគ្រប់គ្រងទាក់ទងនឹងការកសាងសមត្ថភាព សម្រាប់ប្រតិបត្តិការមន្ទីរពេទ្យ និងការបង្កើតផែនការមេ។
កម្មវិធីបណ្តុះបណ្តាល ដែលមានឈ្មោះ «កម្មវិធីបណ្តុះបណ្តាលការអញ្ជើញអ្នកគ្រប់គ្រង» នេះស្ថិតក្នុង «គម្រោងការកសាងសមត្ថភាព សម្រាប់មជ្ឈមណ្ឌលត្រចៀក ច្រមុះ បំពង់ក (ENT) នៅមន្ទីរពេទ្យព្រះអង្គឌួង»។ សិក្ខាកាមទាំង ៥ រូប នឹងចូលរួមវគ្គបណ្តុះបណ្តាលនេះចាប់ពីថ្ងៃទី ២១ ដល់ថ្ងៃទី ២៧ ខែកញ្ញា ឆ្នាំ ២០២២។
ដើម្បីជួយសម្រួលដល់កម្មវិធីបណ្ដុះបណ្ដាលនេះ ការិយាល័យ (KOICA ឬកយកា) ប្រចាំកម្ពុជា បានផ្តល់កម្មវិធីតម្រង់ទិសមុនពេលចេញដំណើរ សម្រាប់សិក្ខាកាមទាំងអស់ នៅថ្ងៃទី ១៩ ខែកញ្ញា ឆ្នាំ ២០២២ ផងដែរ ដើម្បីសម្រួលដល់ការចូលរួមរបស់សិក្ខាកាមកម្ពុជា បានស្គាល់ពីវប្បធម៌កូរ៉េ និងផ្តល់ប្រធានបទចាំបាច់សំខាន់ៗស្តីពី «ព័ត៌មានអំពីប្រទេសកូរ៉េ ព័ត៌មានវគ្គសិក្សា និងក្រមសីលធម៌ស្តីអំពីសុចរិតភាព និងការចៀសវាងការបៀតបៀនផ្លូវភេទ សម្រាប់សិក្ខាកាមជាដើម»។
លោក គីម ខ្វាងវុក (Kim Kwang Wook) អនុប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ (កយកា) ប្រចាំការិយាល័យប្រទេសកម្ពុជា បានចូលរួម និងអបអរសាទរចំពោះវេជ្ជបណ្ឌិត និងគិលានុបដ្ឋាក គិលានុបដ្ឋាយិកាកម្ពុជា។ លោកក៏បានស្នើឱ្យអ្នកចូលរួម ដែលទទួលបានឱកាសដ៏ល្អនេះ សិក្សាស្វែងយល់ពីការអភិវឌ្ឍប្រទេសកូរ៉េ អំឡុងពេលស្នាក់នៅសាធារណរដ្ឋកូរ៉េ និងពេលត្រឡប់មកវិញ សូមចែករំលែកបទពិសោធទៅគិលានុបដ្ឋាក/យិកា ក្នុងប្រទេសកម្ពុជា សម្រាប់ការអភិវឌ្ឍប្រកបដោយចីរភាព។
លោក ហ៊ត ស្រ៊ឺ អ្នកឯកទេសកម្មវិធីជាន់ខ្ពស់ និងលោក ហា ជុនស៊ឹង អ្នកជំនាញវ័យក្មេងនៃការិយាល័យ កយកា ប្រចាំកម្ពុជាបានធ្វើបទបង្ហាញ ដោយសង្ខេប អំពីប្រធានបទទាក់ទងទៅនឹងកម្មវិធីតម្រង់ទិសមុនពេលចេញដំណើរ ដែលបានលើកឡើងខាងលើ។
បុគ្គលិកគ្រប់គ្រងចំនួន ៥ រូប ពីមន្ទីរពេទ្យព្រះអង្គឌួងនោះ ត្រូវបានបង្ហាញឈ្មោះម្នាក់ គឺ លោក លូ លីឃាង ជានាយកមន្ទីរពេទ្យព្រះអង្គឌួង និងជាទីប្រឹក្សាក្រសួងសុខាភិបាល នឹងចូលរួមក្នុងកម្មវិធីបណ្តុះបណ្តាលនោះ ដែលខណៈនេះគឺជាវគ្គបណ្តុះបណ្តាលចុងក្រោយ សម្រាប់គម្រោងនៅមន្ទីរពេទ្យព្រះអង្គឌួង។
ក្នុងឆ្នាំនេះ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ធ្លាប់អញ្ជើញវេជ្ជបណ្ឌិត ៦ រូប ពីមន្ទីរពេទ្យព្រះអង្គឌួង ចូលរួមកម្មវិធីបណ្តុះបណ្តាលស្តីពី «កម្មវិធីបណ្តុះបណ្តាលសម្រាប់វេជ្ជបណ្ឌិត» នៅសាធារណរដ្ឋកូរ៉េ កាលពីថ្ងៃទី ១១ ដល់ទី ៣១ ខែឧសភា ឆ្នាំ ២០២២ រយៈពេល ២១ ថ្ងៃ។ វេជ្ជបណ្ឌិត៣រូប កាលពីថ្ងៃទី ១១ ខែឧសភា ដល់ថ្ងៃទី ៩ ខែមិថុនា ឆ្នាំ ២០២២ រយៈពេល ៣០ ថ្ងៃ។
កយកា ក៏អញ្ជើញវេជ្ជបណ្ឌិត ១ រូបបន្ថែម និងគិលានុបដ្ឋាក-យិកា ៧ រូប ពីមន្ទីរពេទ្យព្រះអង្គឌួង ទៅបន្តការសិក្សានៅសាធារណរដ្ឋកូរ៉េ ក្នុង «កម្មវិធីបណ្តុះបណ្តាល សម្រាប់គិលានុបដ្ឋាក-យិកា» កាលពីថ្ងៃទី ១០ ដល់ទី ២៣ ខែកក្កដា ឆ្នាំ ២០២២ រយៈពេល ១៤ ថ្ងៃ៕
