.jpg)
លោកហង់ជួន ណារ៉ុន នៅក្នុងពិធីសម្ពោធនិងបំពាក់ផ្លាកឡាបែលហ្វ្រង់កាលពីថ្ងៃទី១៩ មីនា ។ រូបថត ក្រសួងអប់រំ
បាត់ដំបងៈ វិទ្យាល័យព្រះមុនីវង្ស ខេត្តបាត់ដំបង ត្រូវបានដាក់សម្ពោធនិងបំពាក់ផ្លាកឡាបែលហ្វ្រង់ (Label France) ដោយក្រសួងអប់រំ យុវជន និងកីឡា និងស្ថានទូតបារាំងប្រចាំកម្ពុជា ដើម្បីទទួលស្គាល់ជាគ្រឹះស្ថានមធ្យមសិក្សាចំណេះទូទៅសាធារណៈ ដែលមានគុណភាពអប់រំកម្រិតបទដ្ឋានអន្តរជាតិផ្នែកភាសាខ្មែរ-បារាំង។
ពិធីសម្ពោធនិងបំពាក់ផ្លាកឡាបែលហ្វ្រង់នៅវិទ្យាល័យព្រះមុនីវង្សនេះ បានធ្វើឡើងក្រោមអធិបតីភាពលោកឧបនាយករដ្ឋមន្ត្រី ហង់ជួនណារ៉ុន រដ្ឋមន្ត្រីក្រសួងអប់រំ យុវជននិងកីឡានិងលោក ស្រី Elodie តំណាងស្ថានទូតបារាំងប្រចាំកម្ពុជា កាលព្រឹកថ្ងៃទី១៩ ខែមីនាឆ្នាំ២០២៤។នេះបើយោងតាមក្រសួងអប់រំ។
ផ្លាកសញ្ញាឡាបែលហ្វ្រង់អេឌុយកាស្យុង ( Label France) ដែលត្រូវបានសម្ពោធនិងបំពាក់ដល់វិទ្យាល័យព្រះមុនីវង្សនាពេលនេះគឺជាផ្លាកសញ្ញាមួយដែលទទួលស្គាល់គុណភាពអប់រំកម្រិតបទដ្ឋានអន្តរជាតិដែលត្រូវបានផ្ដល់ជូនគ្រប់គ្រឹះស្ថានសិក្សាសាធារណៈ និងឯកជន ក្នុងការអនុវត្តកម្មវិធីសិក្សាថ្នាក់២ភាសានិងបានបំពេញគ្រប់លក្ខខណ្ឌតម្រូវតាមនិយាមកំណត់របស់កម្មវិធី។
ក្រសួងបានបញ្ជាក់ថា៖«ជារួមកម្មវិធីឡាបែលហ្វ្រង់អេឌុយកាស្យុងនេះ បច្ចុប្បន្នមានគ្រឹះស្ថានសិក្សាសមាជិកពេញសិទ្ធិសរុបចំនួន ៦៥១ និងអ្នកសិក្សានៅក្នុងក្របខ័ណ្ឌកម្មវិធីចំនួន ១៩ ម៉ឺននាក់ នៃបណ្ដាប្រទេសចំនួន៦៣ នៅទូទាំងពិភពលោក»។
ក្រសួងអប់រំបានឱ្យដឹងទៀតថា វិទ្យាល័យព្រះមុនីវង្សគឺជាគ្រឹះស្ថានមធ្យមសិក្សាចំណេះទូទៅសាធារណៈឈានមុខគេមួយនៅកម្ពុជាដែលកំពុងតែបន្តនិរន្តរភាពកម្មវិធីសិក្សាថ្នាក់២ភាសាបារាំង-ខ្មែររហូតមកទល់នឹងពេលបច្ចុប្បន្ន។
ក្នុងក្របខ័ណ្ឌនៃកិច្ចសហការរវាងការិយាល័យថ្នាក់ចំនួន២ភាសានិងស្ថានទូតបារាំងគឺក្នុងស្មារតីលើកកម្ពស់គុណភាពសិក្សាភាសាបារាំងនៅប្រទេសកម្ពុជា។
សូមបញ្ជាក់ដែរថា កន្លងមក ក្រុមការងារបច្ចេកទេសទទួលបន្ទុកផ្នែកភាសាបារាំងនៃការិយាល័យថ្នាក់ ២ ភាសា (បារាំង-ខ្មែរ )និងវិទ្យាល័យព្រះមុនីវង្ស គឺបានខិតខំប្រឹងប្រែងយកចិត្តទុកដាក់ក្នុងការបន្តនីតិវិធីដាក់ពាក្យស្នើសុំបញ្ចូលវិទ្យាល័យព្រះមុនីវង្សទៅក្នុងសាលាបណ្ដាញកម្មវិធីឡាបែលហ្វ្រង់អេឌុយកាស្យុងតាំងពីឆ្នាំ២០១៧ រហូតទទួលបានការប្រកាសទទួលស្គាល់ជាបណ្តាញជាផ្លូវការនៅថ្ងៃទី៤ ខែកញ្ញា ឆ្នាំ២០២៣ពីក្រសួងអឺរ៉ុបនិងកិច្ចការបរទេសនៃសាធារណរដ្ឋបារាំង។
លោកហង់ជួន ណារ៉ុន បានចាត់ទុកផ្លាកឡាបែលហ្វ្រង់នេះជាការផ្ដល់ឱកាសដល់លោកគ្រូ អ្នកគ្រូ សិស្សានុសិស្សទាំងអស់ទទួលបានធនធានសិក្សាជាច្រើនក៏ដូចជាមានឱកាសចូលរួមទៅក្នុងការរៀបចំជាគម្រោងដែលរៀបចំឡើងដោយដៃគូសហការ។
លោកគង់ សំនៀង ប្រធានសហព័ន្ធសេវាអប់រំនៅកម្ពុជាបានសាទរចំពោះលទ្ធផលការវាយតម្លៃគុណភាពអប់រំជាលក្ខណៈអន្តរជាតិនេះ ដោយលោកថ្លែងថា នេះគឺជាការរួមចំណែកដ៏សំខាន់ក្នុងការលើកកម្ពស់គុណភាពអប់រំរបស់គ្រូនិងសិស្សឱ្យកាន់តែមានការយល់ពីភាសាបរទេស ពិសេសភាសាបារាំង។
លោកបានបញ្ជាក់ថា៖«តាមរយៈ វិទ្យាល័យព្រះមុនីវង្ស ត្រូវបានបំពាក់ផ្លាក Label France ទទួលស្គាល់គុណភាពអប់រំកម្រិតបទដ្ឋានអន្តរជាតិផ្នែកភាសាខ្មែរ-បារាំងនាពេលនេះនឹងក្លាយជាឱកាសជំរុញកិច្ចសហប្រតិបត្តិការលើវិស័យអប់រំ ទ្វេភាគីកម្ពុជា-បារាំងឱ្យកាន់តែប្រសើរឡើងថែមទៀតផងដែរ»។
ក្រសួងអប់រំ កាលពីពេលកន្លងទៅធ្លាប់បានឱ្យដឹងថា វិទ្យាល័យព្រះមុនីវង្សគឺជាវិទ្យាល័យដែលមានវ័យចំណាស់មួយ ហើយមានលក្ខណៈជាប្រវត្តិសាស្ត្រ។ចំណុចពិសេសដែលវិទ្យាល័យមានគឺការបង្កើនទំនុកចិត្ដដល់សហគមន៍ ទប់ស្កាត់ការបោះបង់ការសិក្សា ជួយឱ្យលទ្ធផលសិក្សារបស់សិស្សមានការកើនឡើងរាល់ឆ្នាំនិងមានបរិស្ថានសាលារៀនល្អ ជាពិសេសថ្នាក់រៀននីមួយៗមានផាសុកភាព៕
