ភ្នំពេញៈ របាយការណ៍សិក្សាស្រាវជ្រាវរបស់ក្រសួងអប់រំ យុវជន និងកីឡាបានរកឃើញថា ក្នុងរយៈពេល ១ ឆ្នាំចុងក្រោយនេះ កុមារ និងយុវជន អាចនឹងកើនឡើងគួរជាក្ដីបារម្ភ ចំពោះការប្រើប្រាស់បារីអេឡិចត្រូនិក ខណៈការរឹតបន្តឹងរបស់អាជ្ញាធរលើការលក់ និងចែកចាយបារីនេះនៅគ្រប់គ្រងមិនទាន់បានគ្រប់ជ្រុងជ្រោយនៅឡើយ។
តាមរបាយការណ៍សិក្សាស្រាវជ្រាវស្ដីពី៖ «ការទប់ស្កាត់ហានិភ័យផ្នែកសុខភាពសិក្សា បង្កដោយការប្រើប្រាស់និងការចែកចាយបារីអេឡិចត្រូនិកក្នុងចំណោមយុវជន»របស់ក្រសួងអប់រំ យុវជន និងកីឡា ដោយគាំទ្រពីអង្គការចលនាដើម្បីសុខភាពកម្ពុជាបានចេញផ្សាយនៅថ្ងៃទី ២៧ ខែមីនា បានបង្ហាញថា ក្នុងចំណោមអ្នកផ្តល់ការសម្ភាស១ ៣១៧ នាក់ មាន ៩៥ ភាគរយ បានដឹងអំពីផលប៉ះពាល់នៃការប្រើប្រាស់បារីអេឡិចត្រូនិកចំពោះសុខភាពមនុស្ស ជាពិសេសគឺបានដឹងពីផលប៉ះពាល់ដល់ការអភិវឌ្ឍកោសិកាប្រព័ន្ធប្រសាទរបស់កុមារនិងយុវជនវ័យក្មេង និង៥ភាគរយទៀត គឺបានបដិសេធថាមិនដឹងពីផលប៉ះពាល់។
របាយការណ៍ដដែលបានឱ្យដឹងទៀតថា ក្នុងចំណោមអ្នកផ្តល់ការសម្ភាសទាំងនោះមាន ៧៩ ភាគរយ បានដឹងថាបារីអេឡិចត្រូនិកជាផលិតផលដែលត្រូវបានហាមឃាត់ដោយរាជរដ្ឋាភិបាលកម្ពុជា និងមានការហាមឃាត់ផលិតផលនេះនៅតាមគ្រឹះស្ថានសិក្សា ការផ្សព្វផ្សាយតាមបណ្តាញព័ត៌មានសង្គម និងការផ្សព្វផ្សាយតាមសហគមន៍ផ្តល់ដោយក្រសួង ស្ថាប័នពាក់ព័ន្ធ អង្គការសង្គមស៊ីវិល និងអាជ្ញាធរមានសមត្ថកិច្ច និង ២១ ភាគរយទៀត ឆ្លើយថាមិនបានដឹងពីការហាមឃាត់ទាំងនោះឡើយ។ទន្ទឹមនេះក៏មាន ៧ ភាគរយនៃអ្នកចូលរួមផ្តល់ការសម្ភាស បញ្ជាក់ថា រយៈពេល ១ ឆ្នាំចុងក្រោយនេះ ខ្លួនធ្លាប់ប្រើប្រាស់បារីអេឡិចត្រូនិក។
ប្រភពខាងលើបញ្ជាក់ថា៖ «ចំនួនអ្នកប្រើប្រាស់បារីអេឡិចត្រូនិក ជាពិសេសក្នុងចំណោមកុមារនិងយុវជន នៅតែជាក្តីព្រួយបារម្ភរបស់យើងទាំងអស់គ្នាព្រោះថាលទ្ធផល ៧ ភាគរយនៃចំនួនអ្នកចូលរួមផ្តល់ការសម្ភាស បានអះអាងថា ពួកគេបានប្រើប្រាស់បារីអេឡិចត្រូនិកក្នុងរយៈពេល ១ ឆ្នាំចុងក្រោយនេះ។ បរិមាណនេះ បើធៀបទៅនឹងបរិមាណចំនួនយុវជនវ័យក្មេង គឺវាមានបរិមាណនៅទាបជាងចំនួនជាក់ស្ដែងដោយហេតុថាបារីអេឡិចត្រូនិកគឺជាផលិតផលខុសច្បាប់ដែលធ្វើឱ្យអ្នកចូលរួមផ្តល់ការសម្ភាសមួយចំនួនមិនហ៊ានប្រាប់ពីការពិតថាខ្លួនបានប្រើប្រាស់បារីអេឡិចត្រូនិក»។
បើតាមរបាយការណ៍ដដែលបានរកឃើញទៀតថា ៨២ ភាគរយ នៃអ្នកចូលរួមសម្ភាសបានប្រាប់ថា ពួកគេធ្លាប់ឃើញគេជក់បារីអេឡិចត្រូនិក ហើយភាគច្រើនពួកគេឃើញអ្នកជក់បារីអេឡិចត្រូនិកនៅតាមហាងកាហ្វេ និងភោជនីយដ្ឋាន និងសួនសាធារណៈ។ ក្នុងចំណោមអ្នកសម្ភាសន៍ទាំងអស់ មាន ៤០ ភាគរយបានឆ្លើយថា មិត្តភក្តិរបស់ពួកគេជាអ្នកជក់បារីអេឡិចត្រូនិកផ្ទាល់ ហើយភាគច្រើននៃមិត្តភក្តិរបស់ពួកគេជាសិស្ស-និស្សិត។
ទន្ទឹមនោះតាមរយៈចម្លើយផ្តល់ការសម្ភាសក៏បានបង្ហាញថា ភាគច្រើនលើសលប់នៃមិត្តភក្តិដែលបានប្រើប្រាស់បារីអេឡិចត្រូនិកមានអាយុចន្លោះពី ១៥ ឆ្នាំ ទៅ ២៩ ឆ្នាំ ដែលសុទ្ធតែជាយុវជនបន្តវេនអភិវឌ្ឍន៍ប្រទេសជាតិ។
ក្នុងរបាយការណ៍អះអាងថា៖ «ផ្អែកតាមលទ្ធផលទាំងនោះ បាននាំដល់ការសន្និដ្ឋានថា ទោះបីមានការអប់រំផ្សព្វផ្សាយពីផលប៉ះពាល់នៃការប្រើប្រាស់បារីអេឡិចត្រូនិកចំពោះសុខភាព និងការហាមឃាត់ផលិតផលនេះពីសំណាក់រាជរដ្ឋាភិបាលកន្លងមកយ៉ាងណាក៏ដោយ ក៏ចំនួនអ្នកប្រើប្រាស់បារីអេឡិចត្រូនិក ជាពិសេសក្នុងចំណោមកុមារនិងយុវជនវ័យក្មេងអាចមានកំណើនគួរជាក្តីព្រួយបារម្ភទៅលើដំណើរការអភិវឌ្ឍន៍ធនធានមនុស្សឆ្លើយតបទៅនឹងគោលដៅអភិវឌ្ឍន៍ជាតិ»។
ម្យ៉ាងការរឹតបន្តឹងទីផ្សារអនឡាញឬតាមគេហទំព័រសាធារណៈនៅមិនទាន់គ្រប់គ្រងជ្រុងជ្រោយ អាចបង្កឱកាសដល់ការលក់ដូរ ចែកចាយឆក់យកឱកាសធ្វើការផ្សព្វផ្សាយតាមគេហទំព័រសាធារណៈ ឬប្រព័ន្ធអនឡាញដែលពេញនិយមប្រើនៅក្នុងសង្គមបច្ចុប្បន្ន និងចំពេលដែលរាជរដ្ឋាភិបាលបាននិងកំពុងលើកទឹកចិត្តដល់អ្នកអប់រំនិងអ្នកសិក្សាខិតខំរៀនសូត្រ ដើម្បីចូលរួមអភិវឌ្ឍខ្លួនឱ្យឆ្លើយតបទៅនឹងគោលនយោបាយអភិវឌ្ឍន៍ជាតិក្នុងបរិបទបច្ចេកវិទ្យាឌីជីថល។ នេះជាការបញ្ជាក់បន្ថែមនៅក្នុងរបាយការណ៍សិក្សាស្រាវជ្រាវរបស់ក្រសួងអប់រំ
យុវជន និងកីឡា។
សូមបញ្ជាក់ថា របាយការណ៍សិក្សាស្រាវជ្រាវនេះបានអនុវត្តការចុះប្រមូលព័ត៌មានបឋមនៅរាជធានីភ្នំពេញនិងខេត្តចំនួន៣រួមមាន ខេត្តកំពង់ចាម សៀមរាប និងខេត្តបាត់ដំបង ដែលមានអ្នកចូលរួមផ្តល់ការសម្ភាសសរុបចំនួន ១ ៣១៧ នាក់ (ស្រី ៤៤ ភាគរយ)។ ក្នុងនោះរាជធានីភ្នំពេញមានចំនួន៦៤០ នាក់ ខេត្តកំពង់ចាម ១៩២ នាក់ ខេត្តសៀមរាប ២៤៧ នាក់ និងខេត្តបាត់ដំបង ២៣៨ នាក់។
របាយការណ៍សិក្សាស្រាវជ្រាវនេះរៀបចំឡើងក្នុងគោលបំណងបង្ការទប់ស្កាត់ហានិភ័យទៅលើផ្នែកសុខភាពសិក្សាដែលបង្កដោយការប្រើប្រាស់ ការចែកចាយបារីអេឡិចត្រូនិកគ្រប់ប្រភេទ និងការផ្តល់វិធានការសមស្របប្រកបដោយប្រសិទ្ធភាពក្នុងការបង្ការ ទប់ស្ដាត់ការប្រើប្រាស់បារីអេឡិចត្រូនិក ជាពិសេសក្នុងចំណោមកុមារ និងយុវជន ក៏ដូចជាសង្គមជាតិទាំងមូលដើម្បីធានាបានធនធានមនុស្សប្រកបដោយសក្តានុភាពឆ្លើយតបទៅនឹងទិសដៅអភិវឌ្ឍន៍ជាតិរបស់រាជរដ្ឋាភិបាល៕