អាជ្ញាធរជាតិអប្សរាកំពុងស្ដារស្រះទឹកនៅប្រាសាទបាយ័នឲ្យមានដូចកាលពីសម័យបុរាណឡើងវិញ ដែលគម្រោងនេះគ្រោងនឹងបញ្ចប់នៅក្នុងឆ្នាំនេះ ខណៈមានការលើកឡើងការបារម្ភអំពីការប៉ះពាល់ទៅលើប្រាសាទ។
ការជីកដីដើម្បីស្ដារស្រះទឹកបុរាណនេះ ធ្វើឡើងបន្ទាប់ពីការធ្វើកំណាយស្រាវជ្រាវនៅតាមស្រះទឹកជុំវិញប្រាសាទបាយ័នដែលគេជឿថា ពីមុនគឺជារចនាសម្ពន្ធរបស់ស្រះទឹកបុរាណ។
លោក ឡុង កុសល អ្នកនាំពាក្យអាជ្ញាធរជាតិអប្សារា បានប្រាប់ភ្នំពេញប៉ុស្តិ៍ថា ការជីកដីស្ដារស្រះទឹកនេះធ្វើឡើងនៅស្រះខាងជើង និង ស្រះខាងត្បូងនៃភាគខាងកើតប្រសាទបាយ័ន។
លោកថាតាមគម្រោង ការជីកស្ដារស្រះនេះគ្រោងនឹងបញ្ចប់នៅក្នុងឆ្នាំនេះ ប៉ុន្តែវាអាស្រ័យទៅលើស្ថានភាពជាក់ស្ដែង។
សារធារណជនមួយចំនួនដែលបានទៅទស្សនាប្រាសាទបាយ័ននិងមិនបានដឹងពីគម្រោងនេះ បានចោទជាសំនួរថាតើការកាយដី ហើយដឹកចេញពីទីនេះធ្វើឡើងក្នុងបំណងអ្វី។ ចម្ងល់នេះក៏ត្រូវបានលើកឡើងដោយលោក សុន ឆ័យ មេដឹកនាំគណបក្សភ្លើងទៀនផងដែរ។
លោក សុន ឆ័យ ដែលបានទៅទស្សនាប្រាសាទនេះ កាលពីថ្ងៃទី៤ ខែឧសភា បានបង្ហោះលើហ្វេសប៊ុកកាលពីថ្ងៃទី៥ ខែឧសភា ដោយស្នើឲ្យអាជ្ញាធរជាតិអប្សរា ឬ អង្គការយូណេស្កូ ពន្យល់អំពីរឿងនេះ។
លោកថា៖ «ខ្ញុំបានប្រទះឃើញសកម្មភាពកាយដី យកចេញពីស្រះបុរាណនៅជាប់ប្រសាទបាយ័ន ដោយប្រើអេស្កាវាទ័រកាយ និងដឹកចេញដោយឡានធំយ៉ាងគគ្រឹកគគ្រេង នៅថ្ងៃទី៤ ខែឧសភា ឆ្នាំ២០២៤នេះ»។
លោកបន្តថា៖ «ខ្ញុំមានការបារម្ភខ្លាចសកម្មភាពនេះធ្វើខុសបច្ចេកទេស អាចនាំឲ្យបែកបាក់ កក្រើកនិងប៉ះពាល់ដល់ប្រាង្គប្រាសាទ (ក្បាលព្រហ្មនៅកំពូលនៃប្រាសាទបាយ័ននេះរបេះធ្លាក់អស់ជាច្រើន និងមិនទាន់បានជួសជុលនៅឡើយ) ហើយដីដែលកាយយកចេញនោះអាចមានរបស់បុរាណយកទៅជាមួយ។ ការជីកកកាយដែលខ្ញុំធ្លាប់ឃើញក្រុមអ្នកបុរាណវិទូធ្វើគឺគេប្រើឧបករណ៍តូច កាយដោយដៃនិងថ្នមណាស់ ដោយខ្លាចប៉ះនិងឲ្យបែកបាក់របស់តូចដែលពិបាកមើលឃើញ»។
ឆ្លើយតបបញ្ហានេះ លោក ឡុង កុសល បញ្ជាក់ថា ការជីកស្ដារនេះធ្វើឡើងតាមជំនាញបច្ចេកទេសត្រឹមត្រូវដែលមិនធ្វើឲ្យប៉ះពាល់ដល់ប្រាសាទទេ។
លោកបញ្ជាក់ដូច្នេះថា៖ «ការងារនេះសុទ្ធតែធ្វើឡើងដោយក្រុមអ្នកជំនាញ។ បើមានបញ្ហា ម្លេះប្រាសាទដែលជួសជុលកន្លងមកបាក់អស់ហើយ។ ដូច្នេះការងារនេះសុទ្ធតែមានអ្នកជំនាញមានភាពច្បាស់លាស់ គឺក្រុមជំនាញជាតិរបស់យើង»។
លោកបន្តថា៖ «មុននឹងគេធ្វើគេបានសិក្សាវាយតម្លៃ ធ្វើកំណាយដើម្បីឲ្យដឹងពីស្រទាប់ដី កំណកនៃដី ហើយក្រោយៗមកនោះវាយ៉ាងម៉េច ហើយស្ថានភាពដីនៅពេលបច្ចុប្បន្នវាយ៉ាងន៉េច គឺគេសិក្សាគ្រប់សព្វបែបយ៉ាង គ្រប់ជ្រុងជ្រោយមុនធ្វើការងារនេះ»។
ប្រាសាទបាយ័ន ស្ថិតនៅក្នុងបរិវេណប្រាសាទអង្គរធំ ដែលជាអតីតរាជធានីនៃអាណាចក្រខ្មែរនៅចុងសតវត្សរ៍ទី១២ កសាងឡើងដោយព្រះបាទជ័យវរ្ម័នទី៧។ ប្រាសាទនេះមិនមានគូទឹកព័ទ្ធជុំវិញដូចប្រាសាទភាគច្រើនទេ ប៉ុន្តែមានស្រះទឹកមួយចំនួន។ ប៉ុន្តែ រាជធានីអង្គរធំទាំងមូលហ៊ុំព័ទ្ធទៅដោយកំពែង និងគូទឹក។
ប្រាសាទនេះគឺជាទីចាប់អារម្មណ៍របស់ភ្ញៀងទេសចរទាំងក្នុងស្រុកនឹងបរទេស ដោយសារតែស្មាមញញឹមនៃកំពូលព្រហ្មមុខបួន ក៏ដូចជារូបចម្លាក់ជាច្រើនដែលរៀបរាប់ពីប្រពៃណី វប្បធម៌និងអរិយធម៌ដ៏រុងរឿងរបស់ខ្មែរពីសម័យដើម៕