.jpg)
សកម្មភាពជីកប្រឡាយធ្វើព្រំដី ដើម្បីបន្តការពារ និង អភិរក្សធនធានធម្មជាតិ នៅឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប។ រូបថត ឧទ្យាន ឫស្សីត្រឹប
ព្រះវិហារ៖ ឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹបកំពុងតែរៃអង្គាសថវិកាពីសប្បុរសជនប្រមាណជា ៥២ម៉ឺនដុល្លារអាមេរិកយកទៅជីកប្រឡាយធ្វើព្រំដី ដើម្បីបន្តការពារ និង អភិរក្សធនធានធម្មជាតិ និង អរិយធម៌បុរាណដែលបន្សល់ទុកក្នុងតំបន់នោះ។
គម្រោងជីកប្រឡាយ ដែលមានប្រវែង ៥២គីឡូម៉ែត្រ ទទឹង ៦ម៉ែត្រ និងជម្រៅ ២ម៉ែត្រកន្លះនេះគឺ ដើម្បីធ្វើការរក្សាព្រំប្រទល់ដីឧទ្យាន រក្សាព្រៃឈើ ក៏ដូចជាសត្វព្រៃឱ្យបានគង់វង្ស រក្សាទឹកទុកប្រើក្នុងរដូវប្រាំង និងចង់បង្កើតឱ្យមានទេសចរណ៍បរិស្ថាន ដើម្បីឱ្យប្រជាពលរដ្ឋក្នុងមូលដ្ឋានទទួលបានចំណូលបន្ថែម។ នេះបើយោងតាមលោក សុខ ទូច ប្រធានរាជបណ្ឌិត្យសភាកម្ពុជា ដែលបានថ្លែងក្នុងពេលបើកការដ្ឋានជីកប្រឡាយនេះ កាលពីថ្ងៃទី៥ ខែឧសភានេះ។
លោក សុខ ទូច បានបញ្ជាក់ថា៖«រក្សាឱ្យបានជាមេរៀនសម្រាប់ប្រវត្តិសាស្រ្ត ជាមេរៀនឱ្យកូនខ្មែរជំនាន់ក្រោយចេះស្រលាញ់ព្រៃឈើ ស្រលាញ់សត្វ ចេះស្រលាញ់អ្វីដែលជាភោគផលធម្មជាតិ។ បើជនណាមកកាយមកកាប់នៅទីនេះទុកឱ្យប្រវត្តិសាស្រ្តជាអ្នកចារទៅ ព្រោះប្រជាពលរដ្ឋបានចូលរួមម្នាក់១ពាន់ ២ពាន់ ១ដុល្លា ឬ៥ម៉ឺន»។
លោក សុខ ទូច បានសំដែងក្តីសង្ឃឹមថា បងប្អូនប្រជាពលរដ្ឋនឹងចូលរួម ដើម្បីឱ្យគម្រោងជីកប្រឡាយនេះទទួលបានជោគជ័យសម្រាប់ការពារឧទ្យានដែលមានទំហំជាង ១ម៉ឺនហិកតា ស្ថិតក្នុងស្រុកឆែប ខេត្តព្រះវិហារនេះ។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍ នាថ្ងៃអង្គារទី៧ ខែឧសភាថា ថវិកាដែលទទួលបានមានប្រមាណជា ៧ម៉ឺនដុល្លារអាមេរិកហើយមកដល់ពេលនេះ។ ប៉ុន្តែ បើសរុបទាំងថវិកា ដែលសប្បុរសជនបានសន្យាចូលរួមមានជាង ១០ម៉ឺនដុល្លារឯនោះ។
លោក យង់ ពៅ បានថ្លែងថា៖«យើងសារទរទាំងអស់សម្រាប់ការចូលរួមហ្នឹង ព្រោះជាស្មារតីប្រជាជាតិសម្រាប់ការពារបរិស្ថាន អញ្ជឹងបើគាត់មានលទ្ធភាព១ពាន់ ឬពាន់រៀលក៏អាចចូលរួមបានតាមរយៈQRកូដហ្នឹង»។
លោកបានឱ្យដឹងថា ឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹបជាប្រភពអរិយធម៌ខ្មែរដ៏សំខាន់មួយ ព្រោះថាតំបន់នោះមានបន្សល់ទុកឡស្លដែកបុរាណជាច្រើន ដែលត្រូវបានប្រើប្រាស់ដើម្បីផលិតដែក សម្ភារៈប្រើប្រាស់ប្រចាំថ្ងៃ ឬអាវុធសម័យបុរាណ។ ក្រៅពីនោះ ឧទ្យានមានធនធានធម្មជាតិ និងជីវៈចម្រុះដ៏សម្បូរបែប ដូចជា ព្រៃឈើ សត្វព្រៃ និងរ៉ែជាដើម។
ហ្វេសប៊ុកឧទ្យានតេជោសែន ឫស្សីត្រឹបបានសរសេរថា៖ «ការចូលរួមបន្តិចបន្តួចរបស់បងប្អូន ជាកម្លាំងដ៏ធំ ក្នុងការរួមចំណែកការពារអភិរក្សព្រៃឈើនិងសត្វព្រៃ ក្នុងតំបន់ឧទ្យានដែលមានផ្ទៃដីជាង ១ម៉ឺនហិកតា សម្រាប់កូនចៅជំនាន់ក្រោយ»៕
