ពោធិ៍សាត់ៈ ពលរដ្ឋចំនួន ៦៨គ្រួសារ ក្នុងចំណោម ៩៥គ្រួសារដែលបានធ្វើអត្តសញ្ញាណជាមួយរដ្ឋបាលខេត្តពោធិ៍សាត់បានស្ម័គ្រចិត្តប្តូរលំនៅឋានចេញពីតំបន់ទេសចរណ៍ធម្មជាតិភ្នំ១៥០០ ដើម្បីបើកផ្លូវឱ្យមានការស្តារព្រៃបៃតងឡើងវិញសម្រាប់បម្រើវិស័យទេសចរណ៍។ នេះបើយោងតាមអភិបាលខេត្តពោធិ៍សាត់ លោកខូយ រីដា។
លោកអភិបាលខេត្តបានមានប្រសាសន៍នាថ្ងៃទី៨ ខែឧសភានេះថា ជាគោលការណ៍ តំបន់ភ្នំ ១៥០០ ស្ថិតក្នុងដែនជម្រកសត្វព្រៃភ្នំសំកុស ជាតំបន់អភិរក្សធនធានធម្មជាតិ ដែលជាតំបន់ទេសចរណ៍ល្អឯកតែមួយក្នុងប្រទេសកម្ពុជា។ តាមអនុសាសន៍ ក៏ដូចជាសំណូមពររបស់ពលរដ្ឋក្នុងខេត្តពោធិ៍សាត់ និងទូទាំងប្រទេស គឺសុំឱ្យរាជរដ្ឋាភិបាលឱ្យជួយការពារ និងអភិរក្សធនធានធម្មជាតិទុកជាតំបន់ទេសចរណ៍។
ឆ្លើយតបទៅនឹងសំណូមពរនេះ គឺតម្រូវឱ្យពលរដ្ឋដែលបានទៅរស់នៅក្នុងតំបន់នោះដោយខុសច្បាប់«ត្រូវចេញ» ហើយអាជ្ញាធរក៏បានរៀបចំគោលការណ៍ឱ្យមានទីតាំងថ្មីអស់ហើយ ដើម្បីប៉ះប៉ូវឱ្យគាត់វិញ។
កន្លងមក ពលរដ្ឋដែលបានទៅរស់នៅចំណុចអូរ១៧ ស្ថិតក្នុងភូមិដីក្រហម ឃុំអន្លង់រាប ស្រុកវាលវែងនោះ ត្រូវបានអះអាងថា មានប្រមាណជា ១១៧គ្រួសារ ប៉ុន្តែជាក់ស្តែងមានតែ ៩៥គ្រួសារប៉ុណ្ណោះដែលបានទៅធ្វើអត្តសញ្ញាណជាមួយនឹងរដ្ឋបាលខេត្ត។ ក្រៅពីនោះពិបាកកំណត់អត្តសញ្ញាណបាន ព្រោះអាចថាជាក្រៅស្រុក ដែលគ្រាន់តែបានចូលទៅត្រួសត្រាយព្រៃនៅទីនោះប៉ុណ្ណោះ។
លោកមានប្រសាសន៍ថា៖ «ទេសចរណ៍កន្លែងហ្នឹង គឺល្អដាច់គេហើយ។ គេឱ្យតម្លៃម៉ាស្រុកខ្មែរ កន្លែងហ្នឹងហើយដែលល្អ ជាងគេ ចាប់អារម្មណ៍ជាងគេ មនុស្សទៅលេងភ្លូកទឹកភ្លូកដី...តែទៅកាប់ដើមឈើជុំវិញអស់ មានអីធម្មជាតិទៀត។ នេះជាបញ្ហា»។
លោកបានថ្លែងបន្តដូច្នេះថា៖«កាលណារស់នៅកន្លែងហ្នឹង កន្លែងហ្នឹងមានបៃតងអីទៀត។ វាទៅជាកន្លែងភូមិនិងផ្ទះបាត់ទៅហើយហ្នឹង។ អញ្ជឹងមានន័យថា ប្រជាជនក៏ដោយ ភ្ញៀវជាតិ អន្តរជាតិមកហ្នឹង មកថតផ្ទះហ្នឹង។ យើងរៀបចំកន្លែងហ្នឹងត្រូវដាំដើមឈើឡើងវិញ ឱ្យមានពណ៌បៃតងឡើងវិញ»។
រដ្ឋបាលខេត្តពោធិ៍សាត់បានបញ្ជាក់ កាលពីថ្ងៃទី៧ ខែឧសភាថា តំបន់ភ្នំ១៥០០ គឺជាសក្តានុពលទេសចរណ៍ ធម្មជាតិគ្មានពីររបស់ខេត្តពោធិ៍សាត់ ក៏ដូចក្នុងប្រទេសកម្ពុជា ដែលជាផ្ទាំងទស្សនីយភាពដ៏សែនមនោរម្យរបស់ភ្ញៀវទេសចរជាតិ និងអន្តរជាតិ។ ដោយសារលក្ខណៈសម្បត្តិដ៏សម្បូរបែបបង្កប់ខ្លួនក្នុងព្រៃ ជ្រលងដងអូរបែបនេះហើយទើបអតីតនាយករដ្ឋមន្ត្រី លោកហ៊ុន សែនបានប្រសិទ្ធនាមថា “បុប្ផាលាក់ខ្លួន”។
ការប្រសិទ្ធនាមនេះបានធ្វើឱ្យសាធារណៈជនមានការចាប់អារម្មណ៍ ពេញចិត្ត និងដក់ជាប់ក្នុងក្រអៅបេះដូងមនុស្សម្នាក់ៗជារៀងរហូតមក។ ហេតុនេះ ការថែរក្សា ការពារ អភិរក្ស និងការស្ដារគម្របបៃតងឡើងវិញក្នុងតំបន់នោះ គឺជាការបំពេញនូវបំណងប្រាថ្នារបស់ពលរដ្ឋ ភ្ញៀវទេសចរជាតិ និងអន្តរជាតិ សម្រាប់កម្សាន្ត ស្រូបយកខ្យល់អាកាសដ៏ត្រជាក់ល្អបរិសុទ្ធ និងគយគន់ផ្ទាំងទស្សនីយភាពដែលល្អគ្មានពីរនេះ។
រដ្ឋបាលខេត្តបានបន្តថា ដោយមើលឃើញពីគុណសម្បត្តិដ៏ធំធេងនៃការថែរក្សា ការពារ អភិរក្ស និងស្តារគម្របបៃតងឡើងវិញនោះ ទើបប្រជាពលរដ្ឋមួយចំនួនធំបានស្ម័គ្រចិត្ត និងសាទរ ប្រគល់ទីតាំង ជូនរដ្ឋបាលខេត្តពោធិ៍សាត់វិញ។ ពួកគាត់គ្រាន់តែសំណូមពរឱ្យរដ្ឋបាលខេត្តពោធិ៍សាត់ ពិនិត្យលទ្ធភាពផ្តល់កន្លែងរស់នៅអាចប្រកបមុខរបរបានតែប៉ុណ្ណោះ។ រីឯអ្នកមួយចំនួនតូចនៅមានការរារែកក្នុងការចូលរួមចាកចេញ ដោយសារពួកគាត់ពុំទាន់បានយល់ច្បាស់អំពីគុណសម្បត្តិដ៏ធំធេងនៃការអភិរក្ស និងការស្ដារគម្របបៃតងឡើងវិញ។
តាមរយៈបណ្តាញសង្គម KH Plus News កាលពីពេលថ្មីៗនេះ ក្រុមពលរដ្ឋបង្ហាញបំណងឱ្យមានការកាត់ខ្វៀលដីឱ្យពួកគាត់បានបន្តរស់នៅទីនោះទៀត។
ទោះយ៉ាងណា រហូតមកទល់ពេលនេះ រដ្ឋបាលខេត្តពោធិ៍សាត់ពុំទាន់បានចាប់បង្ខំ ឬណែនាំដល់ប្រជាពលរដ្ឋរូបណាម្នាក់ឱ្យធ្វើការរុះរើចេញនោះឡើយ។
រដ្ឋបាលខេត្តពោធិ៍សាត់បានអំពាវនាវដល់ប្រជាពលរដ្ឋដែលមានការពាក់ព័ន្ធ សូមចូលរួមជាមួយរដ្ឋបាលខេត្តពោធិ៍សាត់ ដើម្បីថែរក្សា ការពារ អភិរក្ស និង ស្តារតំបន់បៃតងឡើងវិញនៅផ្លូវអន្ទង់អាំង ឬ បុប្ផាលាក់ខ្លួន ក្នុងគោលដៅ បម្រើប្រយោជន៍សាធារណៈ៕