.jpg)
ជំនួបតាមប្រព័ន្ធវីដេអូរវាងលោក ហ៊ុន សែន និងលោក មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋមីយ៉ាន់ម៉ា តាមប្រព័ន្ធវីដេអូ នាថ្ងៃទី៧ ខែឧសភា។ SHS
ភ្នំពេញៈ ប្រធានព្រឹទ្ធសភាលោក ហ៊ុន សែន បានស្នើជាថ្មីម្តងទៀតឱ្យលោក មីន អ៊ុងឡាំង (Min Aung Hlaing) មេដឹកនាំយោធាមីយ៉ាន់ម៉ា ពិចារណារៀបចំឱ្យមានជំនួបតាមប្រព័ន្ធវីដេអូរវាងលោក ហ៊ុន សែន និងលោកស្រី អ៊ុង សាន ស៊ូជី (Aung San Suu Kyi) អតីតមេដឹកនាំរដ្ឋាភិបាលស៊ីវិលមីយ៉ាន់ម៉ា ក្នុងគោលបំណង «សួរសុខទុក្ខ»។
ការស្នើនេះធ្វើឡើងក្នុងជំនួបតាមប្រព័ន្ធវីដេអូរវាងលោក ហ៊ុន សែន និងលោក មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋមីយ៉ាន់ម៉ា តាមប្រព័ន្ធវីដេអូ នាថ្ងៃទី៧ ខែឧសភា។ ជំនួបនេះធ្វើឡើងក្នុងគោលបំណងដើម្បីសាកសួរសុខទុក្ខគ្នា និងដើម្បីទទួលបានការចែករំលែកពីបច្ចុប្បន្នភាពនៃការវិវឌ្ឍនៅមីយ៉ាន់ម៉ា។
ហ្វេសប៊ុកលោក ហ៊ុន សែន បញ្ជាក់ថា ក្នុងជំនួបនោះ លោក មីន អ៊ុងឡាំង បានវាយតម្លៃខ្ពស់នៃការចូលរួមរបស់លោក ហ៊ុន សែន ដែលបានបំពេញទស្សនកិច្ចនៅមីយ៉ាន់ម៉ា ហើយព្យាយាមចូលរួមចំណែកដោះស្រាយបញ្ហាមីយ៉ាន់ម៉ាក្នុងពេលដែលលោកធ្វើជាប្រធានអាស៊ាន កាលពីឆ្នាំ២០២២។
ហ្វេសប៊ុកដដែលបញ្ជាក់ក្រោយជំនួបនេះថា៖ «សម្តេចតេជោ ក៏បានស្នើជាថ្មីម្តងទៀតឱ្យ ឯកឧត្តម មីន អ៊ុងងឡាំង ពិចារណារៀបចំឱ្យមានជំនួបតាមប្រព័ន្ធវីដេអូរវាង សម្តេចតេជោ និងលោកជំទាវ អ៊ុង សាន ស៊ូជី ក្នុងគោលបំណងសួរសុខទុក្ខ ដោយសារសម្តេចតេជោ និងលោកស្រីធ្លាប់ជាសហការីជាមួយគ្នាជាច្រើនឆ្នាំនៅក្នុងកិច្ចការអាស៊ាន»។
លោក ហ៊ុន សែន ក៏បានគូសបញ្ជាក់ពីសារៈសំខាន់នៃការអនុវត្តកិច្ចព្រមព្រៀងឯកច្ឆន្ទ ៥ចំណុច ឬហៅថា កុងសង់ស៊ីស របស់អាស៊ាន ហើយរំពឹងថា ការរីកចម្រើននៃការអនុវត្តកុងសង់ស៊ីសនេះនឹងចូលរួមចំណែកដល់ដំណើរការស្វែងរកសន្តិភាពដែលមានមីយ៉ាន់ម៉ាខ្លួនឯងជាអ្នកដឹកនាំ និងជាម្ចាស់។
លោក ហ៊ុន សែន ក៏បានស្វាគមន៍ការសម្រេចចិត្តរបស់ក្រុមប្រឹក្សារដ្ឋបាលរដ្ឋមីយ៉ាន់ម៉ា ដែលបានបញ្ជូនតំណាងមិននយោបាយឱ្យចូលរួមក្នុងកិច្ចប្រជុំចង្អៀតរបស់រដ្ឋមន្រ្តីការបរទេសអាស៊ានកាលពីខែមករា និងលើកទឹកចិត្តឱ្យមីយ៉ាន់ម៉ាបន្តចាត់តំណាងចូលរួមក្នុងកិច្ចប្រជុំសំខាន់ៗរបស់អាស៊ាន។
ហ្វេសប៊ុកលោក ហ៊ុន សែន បញ្ជាក់ថា លោក មីន អ៊ុងឡាំង បានឯកភាពបន្តបញ្ជូនតំណាងមិននយោបាយរបស់ខ្លួនចូលរួមក្នុងកិច្ចប្រជុំអាស៊ាន និងបានសន្យាថានឹងយកសំណើដទៃទៀតទៅពិចារណា ដោយយកចិត្តទុកដាក់ខ្ពស់បំផុត។
ប្រភពដដែលបន្តថា លោក មីន អ៊ុងឡាំង ក៏បានឯកភាពនឹងបញ្ជូនប្រេសិតពិសេសរបស់ខ្លួនមកកាន់កម្ពុជានាពេលដ៏ឆាប់ខាងមុខ ដើម្បីបន្តពិភាក្សាទៅលើសំណើទាំងនេះ និងដើម្បីទទួលយកនូវការចែករំលែកបទពិសោធន៍ល្អៗពីគណៈកម្មាធិការជាតិរៀបចំការបោះឆ្នោត (គ.ជ.ប) របស់កម្ពុជា ពាក់ព័ន្ធនឹងការរៀបចំការបោះឆ្នោតមួយដែលសេរី យុត្តិធម៌ និងមានតម្លាភាព។
លោក ហ៊ុន សែន និងលោក មីន អ៊ុងឡាំង ក៏បានពិភាក្សា និងផ្លាស់ប្តូរយោបល់គ្នាផងដែរពាក់ព័ន្ធនឹងកិច្ចសហប្រតិបត្តិការវប្បធម៌ និងកីឡា៕
