Search form

Login - Register | FOLLOW US ON

Logo of Phnom Penh Post newspaper Phnom Penh Post - ព័ត៌មាន​ទាក់ទង​ ​វិស័យ​អប់រំ

Content image - Phnom Penh Post
លោក​បណ្ឌិត​សភា​ចារ្យ ហង់ ជួនណារ៉ុន ចូល​រួម​បើក​កិច្ច​ប្រជុំ​ការ​រៀបចំ​ប្រឡង​សញ្ញា​បត្រ​ទុតិយភូមិ ដែល​នឹង​មក​ដល់​នៅ​ថ្ងៃ​ទី​២១-២២ ខែ​សីហា ឆ្នាំ​២០១៧​ ខាង​មុខ​នេះ។ រូបថត សហការី

ព័ត៌មាន​ទាក់ទង​ ​វិស័យ​អប់រំ

ប្រព័ន្ធ​អប់រំ​របស់​កម្ពុជា​កំពុង​តែ​ត្រូវ​បាន​ពង្រឹង​ឲ្យ​កាន់​តែ​ខ្លាំង​ថែម​ទៀត​ដើម្បី​បង្រៀន​ក្មេងៗ​នូវ​បំណិន​ជីវិត​ដើម្បី​ទប់ទល់​ទៅ​នឹង​ការ​រើសអើង​។

ព័ត៌មាន​ផ្សេងៗ​ទៀត​អំពី​ការ​អប់រំ​កាលពី​រយៈពេល​៣​ខែ​មុន​រួម​មាន​ទាំង​របាយការណ៍​ដែល​បាន​បង្ហាញ​នូវ​តួលេខ​ថវិកា​ទាប​សម្រាប់​ប្រព័ន្ធ​អប់រំ ខណៈ​រាជ​រដ្ឋាភិបាល បាន​បញ្ជាក់​ថា ការ​ប្រឡង​មធ្យម​សិក្សា​ទុតិយភូមិ ដែល​នឹង​ប្រព្រឹត្ត​នៅ​ខែ​ក្រោយ​នេះ​នឹង​ដំណើរ​ការ​ទៅ​ដូច​ឆ្នាំ​មុនៗ​ដែរ​។

ខែ​ឧសភា ឆ្នាំ​២០១៧
តម្រូវ​ការ​អ្នក​ចេះ​និយាយ​ភាសា​ចិន​មាន​ការ​កើន​ឡើង

ជំនាញ​ភាសា​ចិន​កំពុង​មាន​ការ​ពេញ​និយម​ខ្លាំង​ពី​សំណាក់​ក្រុមហ៊ុន​ដែល​កំពុង​ផ្សព្វផ្សាយ​ស្វែងរក​បុគ្គលិក​លើ​ទីផ្សារ​ការងារ​នៅ​កម្ពុជា ដោយ​សារ​តែ​ប្រទេស​ចិន​កំពុង​ជះឥទ្ធិពល​ជា​បន្តបន្ទាប់​ទាំង​ក្នុង​វិស័យ​ជំនួញ និង​ទេសចរណ៍ នេះ​បើ​យោង​តាម​គេហទំព័រ​ស្វែងរក​ការងារ Everjobs​។

នាយក​គ្រប់គ្រង​ប្រចាំ​ប្រទេស​កម្ពុជា សម្រាប់​គេហទំព័រ Everjobs គឺ​លោក Neils van Klooster បាន​ថ្លែងថា ក្រុមហ៊ុន​នានា​កំពុងតែ​ស្វែងរក​បុគ្គលិក​ដែល​ចេះ​និយាយ​ភាសា​ចិន បើទោះជា​ចំនួន​អ្នក​ចេះ​ភាសា​នេះ​នៅ​កម្ពុជា​នៅ​មាន​តិច​នៅឡើយ​ក្តី​។

«​យើង​បាន​សម្គាល់​ឃើញ​ថា មាន​ក្រុមហ៊ុន​ចិន​ជាច្រើន​កំពុង​បោះ​ទីតាំង​នៅ​កម្ពុជា ដូច្នេះហើយ​ភាគច្រើន​គេ​សួរ​យើង​អំពី​អ្នក​ចេះ​ភាសា​ចិន ដែល​ចង់​រក​ការងារ​ធ្វើ​» លោក​ថ្លែង​ប្រាប់​អ្នក​យក​ព័ត៌មាន​ថា​៖ «​ខ្ញុំ​គិតថា ប្រសិន​បើ​អ្នក​អាច​ផ្តល់​យោបល់​ដល់​កូន​សិស្ស​បាន គឺ​ឲ្យ​ពួក​គេ​ជ្រើសរើស​ជំនាញ​ភាសា​»​។

Content image - Phnom Penh Post
សកម្មភាព​របស់​កម្មករ​កម្មការិនី​រោងចក្រ​កាត់​ដេរ​មួយ​កន្លែង​នៅ​ទីក្រុង​ភ្នំពេញ របាយ​ការណ៍​មួយ​បាន​បង្ហាញ​ថា​ពួក​គេ​ភាគ​ច្រើន​អត់​ចេះ​អក្សរ​ទេ។

ការ​ជំរុញ​បង្កើន​ចំណេះ​ដឹង​សម្រាប់​កម្មករ​

កម្មករ​ច្រើន​ជាង​១០០​នាក់ នៅ​រោងចក្រ​កាត់​ដេរ​ចំនួន​៦​កន្លែង នៅ​ក្នុង​ខេត្ត សៀមរាប និង​ភ្នំពេញ បាន​បញ្ចប់​វគ្គ​បណ្តុះ​បណ្តាល​អក្ខរកម្ម​ក្រោម​កម្មវិធី​សាកល្បង​ដែល​នឹង​បន្ត​បន្ថែម​សម្រាប់​រោងចក្រ​ចំនួន​១៨​កន្លែង​ផ្សេង​ទៀត ក្នុង ប្រទេស​កម្ពុជា​។

កម្មវិធី​សិក្សា​សាកល្បង​ដែល​បាន ទទួល​ថវិកា​ឧបត្ថម្ភ​ពី​អង្គការ​យូណេស្កូ អង្គការ​ក្រៅ​រដ្ឋាភិបាល Sipar ដែល​លើក កម្ពស់​ផ្នែក​អក្ខរកម្ម និង​ក្រសួង​អប់រំ​នោះ បាន​ចាប់​ផ្តើម​កាលពី​ខែ​កុម្ភៈ និង​បញ្ចប់​នៅ​ខែ​មេសា ឆ្នាំ​២០១៧ ជាមួយ​នឹង​លទ្ធផល «​ជោគជ័យ​»​។

លោក ស៊ិន សុធា ប្រធាន​គ្រប់គ្រង​កម្មវិធី​បណ្ណាល័យ​របស់​អង្គការ Sipar បាន​ថ្លែង​ថា អត្រា​អក្ខរកម្ម​របស់​កម្មករ​រោងចក្រ​ចំនួន​៧​សែន​នាក់ នៅ​កម្ពុជា​ត្រូវ​បាន​គេ​ប៉ាន់​ស្មាន​ថា​មាន​ត្រឹម​តែ​៥០​ភាគរយ​ប៉ុណ្ណោះ​។

លោក​ថ្លែង​ដោយ​បន្ត​ថា​ ៖ «​យើង​ចង់​បន្ត​បង្កើន​អត្រា​នេះ​ថែម​ទៀត​។ យើង​ជឿ​ជាក់​ថា នៅ​មាន​ការ​ពាក់​ព័ន្ធ​គ្នា​រវាង​អត្រា​អក្ខរកម្ម និង​អត្រា​សមិទ្ធផល​»​។

កម្មករ​សរុប ១២០​នាក់ បាន​រៀន​អំពី​មូលដ្ឋាន​គ្រឹះ​នៃ​ជំនាញ​សំណេរ​ខ្មែរ និង​ការ​អាន​អក្សរ​ខ្មែរ​ក្រោម​កម្មវិធី​សាក​ល្បង នេះ​បើ​យោង​តាម​សម្តី​អ្នក​តំណាង​អង្គការ​យូណេស្កូ គឺ​អ្នក​ស្រី Anne Lemaistre។

Content image - Phnom Penh Post
ទិដ្ឋភាព និង​សកម្មភាព​របស់​សិស្ស​ថ្នាក់​ទី​១២ ជា​បេក្ខភាព​ប្រឡង​សញ្ញា​បត្រ​ទុតិយភូមិ​កាល​ពី​ឆ្នាំ​មុន។ រូបថត ភ្នំពេញប៉ុស្តិ៍

ខែ​មិថុនា ឆ្នាំ​២០១៧
​វគ្គ «​បំណិន​ជីវិត​»

វគ្គ​សិក្សា​ថ្មី​អំពើ​ហិង្សា​ផ្លូវភេទ និង​យេនឌ័រ នៅ​សាលា​នឹង​បង្រៀន​កូនសិស្ស​ពី​ថ្នាក់​ទី​៥ ដល់ទី​១២ ជា​លើកដំបូង​បង្អស់​អំពី​អ្នក​ស្រឡាញ់​ភេទ​ដូចគ្នា ដែល​រួមមាន ស្រី​ស្រឡាញ់​ស្រី ប្រុស​ស្រឡាញ់​ប្រុស អ្នក​ដែល​ស្រឡាញ់​ទាំងស្រី​ទាំង-​ប្រុស និង​អ្នក​កែ​ភេទ ហៅ​កាត់​ជា​ភាសា​អង់គ្លេស​ថា LGBT ដែលជា​ផ្នែក​មួយ​ក្នុង​សំណើ​សម្រាប់​កម្មវិធី​សិក្សា​ថ្មី​ពី​សំណាក់​ក្រសួង​អប់រំ​។

​វគ្គ​ថ្មី​ដែល​មាន​ឈ្មោះ​ថា «​បំណិន​ជីវិត​» នឹងត្រូវ​បង្រៀន​ពី​កម្រិត​ថ្នាក់​ទី​១​ដល់ទី​១២ ជាមួយនឹង​វគ្គ​សិក្សា​អំពី​បញ្ហា​អ្នក​ស្រឡាញ់​ភេទ​ដូច​គ្នា ដែល​នឹង​ចាប់​ផ្តើម​ពី​ថ្នាក់​ទី​៥​។

លោក ស្រ៊ុន ស្រ៊ន សកម្មជន​អ្នក​ស្រឡាញ់​ភេទ​ដូច​គ្នា ដែល​បាន​ចូលរួម​ក្នុងការ​ពង្រាង​សំណើ​នេះ បាន​ថ្លែងថា កម្មវិធី​សិក្សា​ថ្មី​នេះ​គឺជា​ជំហាន​ដ៏​សំខាន់​ក្នុងការ​ទប់ទល់​ទៅនឹង​ការ​រើសអើង​សហគមន៍​អ្នក​ស្រឡាញ់​ភេទ​ដូចគ្នា​នៅ​កម្ពុជា ខណៈ​មេរៀន​នេះ​នឹង​ត្រូវ​បាន​បង្រៀន​នៅ​ជុំវិញ​ប្រទេស​កម្ពុជា ព្រម​ទាំង​និយាយ​អំពី​បញ្ហា​នេះ​ជាច្រើន​ទៀត​ផង​ដែរ​។​

​នាយកដ្ឋាន​សុខភាព​នៅ​តាម​សាលារៀន​របស់​ក្រសួង​អប់រំ ក្រោម​ការ​គ្រប់គ្រង​លោកស្រី​នាយិកា​បណ្ឌិត ឆាយ គឹម​សិទ្ធធាវី ជា​អ្នក​ទទួល​បន្ទុក​ខាង​ការ​ព្រាង​កម្មវិធី​សិក្សា​នេះ​ក្រោម​កិច្ចសហការ​ពី​អង្គការ​យូណេស្កូ និង​អង្គការ​នានា​ផង​ដែរ​។

លោក​ស្រី​នាយិកា​រូប​នេះ​បាន​ថ្លែងថា ក្រសួង​នឹង​រៀបចំ​នូវ​កិច្ចប្រជុំ​ផ្ទៃ​ក្នុង​មួយ​ដើម្បី​ពិភាក្សា​លើ​កម្មវិធី​សិក្សា​ថ្មី​ដែល​បាន​ដាក់​ស្នើ​មក​នេះ​។ «​បន្ទាប់​ពី​នោះ យើង​ត្រូវ​អនុវត្ត​នូវ​កម្មវិធី​បណ្តុះ​បណ្តាល​សាក​ល្បង​» លោក​ស្រី​នាយិកា​ថ្លែង​។ បន្ទាប់​​ពី​នោះ ពួក​គេ​នឹង​រៀបចំ​កម្មវិធី​សិក្ខាសាលា​ជាច្រើន​ទៀត​ជាមួយ​អង្គការ​ស្ថាប័ន​ពាក់ព័ន្ធ និង​ចាប់ផ្តើម​ពង្រាង​សៀវភៅ​នេះ​សម្រាប់​ឆ្នាំ​សិក្សា​២០១៨-២០១៩​។

សំណើ​ដាក់​បញ្ចូល​ឲ្យ​រៀន​អំពី​ខ្សែ​ជីវិត​របស់​លោក​នាយក​រដ្ឋ​មន្ត្រី ត្រូវ​បាន​មនុស្ស​មួយ​ចំនួន​មើល​ឃើញ​ថា សិស្សានុសិស្ស​តាម​សាលា​នៅ​ប្រទេស​កម្ពុជា នឹង​រៀន​អំពី​ខ្សែ​ជីវិត សមិទ្ធផល និង​ការ​ដឹក​នាំ​របស់​លោក​នាយក​រដ្ឋ​មន្ត្រី​ហ៊ុន សែន ក្រោម​សំណើរ​របស់​ក្រសួង​ការ​ពារ​ជាតិ ដើម្បី​ផ្លាស់​ប្តូរ​កម្មវិធី​សិក្សា​របស់​ប្រទេស​នេះ និង​នាំយក​នូវ​សាច់​រឿង​ប្រវត្តិសាស្ត្រ​របស់​គណបក្ស​កាន់​អំណាច​ទៅ​ចូល​ក្នុង​សៀវភៅ​សិក្សា​។

អគ្គនាយក​នៃ​ក្រសួង​ការពារជាតិ លោក ណិប សុវត្ថិ បាន​ថ្លែង​ថា វា​មាន​តម្រូវ​ការ​បំពេញ​បន្ថែម «​ក្នុង​ចន្លោះ​ប្រវត្តិសាស្ត្រ​»​។

យ៉ាង​ណា​មិញ អ្នក​ឃ្លាំ​មើល​បាន​មើល​ឃើញ​ថា ខ្សែ​ជីវិត​ផ្ទាល់​ខ្លួន​របស់​លោក ​ហ៊ុន សែន ត្រូវ​បាន​គេ​ផ្សព្វផ្សាយ​ពាសពេញ​ផ្ទៃ​ប្រទេស​ដោយ​គណបក្ស​ប្រជាជន​កម្ពុជា​រួច​ទៅ​ហើយ ដោយ​មិន​រាប់​ទាំង​ការ​ផ្សព្វផ្សាយ​ដោយ​ខ្លួន​លោក​ផ្ទាល់​ដោយ​បទ​វិភាគ​មួយ​បាន​ហៅ​សំណើ​នេះ​ថា ជា​រឿង «​នយោបាយ​»​។

លោក សុវត្ថិ បាន​ថ្លែង​ថា ក្រសួង​ចង់​ឲ្យ​សិស្សានុ​សិស្ស​មាន «​ឱកាស​» ដើម្បី​រៀន​ឲ្យ​បាន​ដឹង​ថា «​លោក​នាយក​រដ្ឋ​មន្ត្រី​មាន​ដំណើរ​ជីវិត​ចាប់​ផ្តើម​ពី​ណា​ គោល​ការណ៍​ដឹកនាំ​របស់​លោក​» និង «​អ្វីៗ​ដែល​យើង​បាន​ធ្វើ​កន្លង​មក​»​។

លោក​ថ្លែង​ដោយ​បន្ថែម​ទៀត​ថា​ ៖ «ខ្ញុំ​គិតថា យើង​ត្រូវតែ​រៀបចំ​បញ្ចូល​នូវ​ចំណេះ​ដឹង​ទាំង​នេះ ដោយ​បញ្ចេញ​ជា​សាធារណៈ និង​បញ្ចូល​ទៅ​ក្នុង​កម្មវិធី​សិក្សា​ប្រវត្តិសាស្ត្រ​តែ​ម្តង​។ យើង​បាន​រៀន​អំពី​ស្តេច​កាល​ពី​រជ្ជកាល​មុនៗ ហើយ​ស្តេច​សោយរាជ្យ​ពី​រជ្ជកាល​មួយ​ទៅ​រជ្ជកាល​មួយ​ទៀត ចំណែក​សម្តេច​ ហ៊ុន សែន ​វិញ គឺ​ដោយ​សារ​តែ​ការគាំទ្រ​ពី​ប្រជាជន​ពិតៗ​»​។

Content image - Phnom Penh Post
អ្នក​សារ​ព័ត៌មាន​កំពុង​ថត​ផ្តិត​យក​រូប​ភាព​ពី​អតីកាល​របស់​លោក ហ៊ុន សែន នាយក​រដ្ឋ​មន្ត្រី​កម្ពុជា ដែល​មាន​មន្ត្រី​ខ្លះ​ចង់​ឲ្យ​មាន​ការ​ដាក់​បញ្ចូល​ជីវប្រវត្តិ​របស់​គាត់​ទៅ​ក្នុង​កម្មវិធី​អប់រំ​ជាតិ។ រូបថត សហការី

ខែ​កក្កដា ឆ្នាំ​២០១៧
​ការ​សិក្សា​បង្ហាញ​ថា អក្ខរកម្ម​ហិរញ្ញវត្ថុ​នៅ​មាន​កម្រិត​ទាប​ខ្លាំង

ការ​យល់​ដឹង​អំពី​វិស័យ​ហិរញ្ញវត្ថុ​នៅ​កម្ពុជា​នៅ​តែ​បន្ត​ស្ថិត​នៅ​កម្រិត​ទាប បើ​ទោះ​ជា​មាន​កម្រិត​នៃ​ការ​យល់​ដឹង​ខ្ពស់​អំពី​ថវិកា សម្រាប់​ប្រើប្រាស់​ផ្អែក​តាម GDP បច្ចុប្បន្ន​របស់​កម្ពុជា នេះ​បើ​យោង​តាម​ការសិក្សា​ចេញ​ដោយ​វិទ្យាស្ថាន​មួយ​នៃ​ធនាគារ Asian Development Bank Institute (ADBI) កាលពី​ថ្ងៃទី​១១ ខែ​កក្កដា​។

វិទ្យាស្ថាន​នៃ​ធនាគារ ADBI បាន​រៀបចំ​ឡើង​នូវ​ការ​សិក្សា​ស្ទាបស្ទង់​មតិ​មួយ​នៅ​កម្ពុជា និង​វៀត​ណាម ដើម្បី​វាស់​ស្ទង់​អំពី​ការ​យល់​ដឹង​អំពី​វិស័យ​ហិរញ្ញវត្ថុ​ក្នុង​វិស័យ​នានា​សម្រាប់​ប្រជាជន​កម្ពុជា ដោយ​បែងចែក​លទ្ធផល​តាម​ក្រុម​អាយុ កម្រិត​ប្រាក់​ចំណូល និង​កម្រិត​នៃ​ការ​អប់រំ។

ប្រទេស​កម្ពុជា​បាន​ទទួល​ពិន្ទុ​១១,៥០ លើ​២១ បើ​យោង​តាម​របាយការណ៍ ដែល​ជា​ពិន្ទុ​មួយ​ទាប​ជាង​ការ​ស្ទាបស្ទង់​ក្នុង​អង្គការ​ចំនួន​៣០ សម្រាប់​ប្រទេស​ដែល​ជា​សមាជិក OECD (Economic Cooperation and Development​។

របាយ​ការណ៍​នោះ ក៏បាន​បង្ហាញ​ថា ការ​អប់រំ​ក៏​ដើរតួ​យ៉ាង​សំខាន់​ក្នុង​ការ​យល់​ដឹង​អំពី​ហិរញ្ញវត្ថុ ហើយ​ក្នុង​ប្រទេស​កម្ពុជា មាន​អ្នក​ចូលរួម​ដែល​មាន​កម្រិត​ការ​អប់រំ​ថ្នាក់​វិទ្យាល័យ​ក្នុងការ​ស្ទាបស្ទង់​បានទទួល​ពិន្ទុ​ខ្ពស់ជាង​អ្នក​ចូលរួម​ដែល​មាន​កម្រិត​អប់រំ​បឋមសិក្សា ឬ​អនុវិទ្យាល័យ​។

ក្រសួង​ចាត់ «​អ្នក​ជំនាញ​» ឲ្យ​ត្រួត​ពិនិត្យ​លើ​ការ​ដាក់​ពិន្ទុ​ប្រឡង

រដ្ឋ​មន្ត្រី​ក្រសួង​អប់រំ ហង់ ជួន ណារ៉ុន បាន​ប្រកាស​ថា ការ​ប្រឡង​មធ្យម​សិក្សា​ទុតិយភូមិ ដែល​នឹង​ប្រព្រឹត្ត​ទៅ​ក្នុង​ខែ​សីហា​ខាង​មុខ​នេះ នឹង​ដំណើរការ​ទៅ​ដូច​ឆ្នាំ​មុនៗ នេះ​បើ​យោងតាម​សម្តី​របស់​អ្នក​នាំ​ពាក្យ​បាន​លើក​ឡើង​ថា «​អ្នក​ជំនាញ» មុខ​ជំនាញ​ថ្មីៗ នឹង​ចូលរួម​ក្នុង​ការ​ធ្វើ​កំណែ​វិញ្ញាសា​ប្រឡង​ផង​ដែរ។

«​គិត​រហូត​មក​ដល់​ពេល​នេះក្រសួង​បាន​ធ្វើ​ការ​វាស់​ស្ទង់​ដើម្បី​ពង្រឹង​ទាំង​លើ​ការ​ប្រឡង និង​ការធ្វើ​កំណែ​» នេះ​បើ​យោង​តាម​សម្តី​ឯកឧត្តម​បណ្ឌិត ហង់ ជួន ណារ៉ុន ថ្លែង​ក្នុង​កិច្ចប្រជុំ​នៅ​ក្រសួង នៅ​មុន​ការ​ប្រឡង​ឈាន​ចូល​មក​ដល់​នៅ​ថ្ងៃទី​២១ និង​២២ សីហា​ខាង​មុខ​នេះ​។

អ្នក​នាំ​ពាក្យ​មន្ត្រី​ក្រសួង​អប់រំ គឺ​លោក រស់ សា​លីន បាន​ថ្លែង​តាម​ទូរស័ព្ទ​ឲ្យ​ដឹង​ថា «​អ្នក​ជំនាញ​» លើ​មុខ​វិជ្ជា​នីមួយៗ​នឹង​ចូលរួម​ក្នុង​ការ​ត្រួត​ពិនិត្យ​ធ្វើ​កំណែ​ប្រឡង​ក្រោយពេល​វិញ្ញាសា​ត្រូវ​កែ​រួចរាល់​ដោយ​គណៈកម្មការ​នេះ​។ ការ​ប្រឡង​នេះ​រួម​មាន​មុខវិជ្ជា​ចំនួន​៧ ដូចជា​គណិតវិទ្យា ជីវវិទ្យា និង​ប្រវត្តិ​សាស្ត្រ​។

លោក​បន្ថែម​ថា អនុរក្ស​ពី​អង្គភាព​ប្រឆាំង​អំពើ​ពុករលួយ នឹង​បន្ត​ឃ្លាំ​មើល​សិស្សានុសិស្ស​ក្នុង​ពេល​ប្រឡង ហើយ​បាន ​ អះអាង​ថា យ៉ាង​ហោច​ណាស់​រយៈ​ពេល​៥​ ទៅ​១០​ឆ្នាំ​ទៀត​ដែរ ដើម្បី​ធ្វើ​កំណែ ទម្រង់​ បែប​នេះ​ឲ្យ​មាន​ប្រសិទ្ធភាព៕

0

Comments

Please, login or register to post a comment

ព័ត៌មានពាក់ព័ន្ធ