Search form

Login - Register | FOLLOW US ON

Logo of Phnom Penh Post newspaper Phnom Penh Post - រដ្ឋមន្ត្រី៖ គុណភាព​សិស្ស​កាន់តែ​ល្អ ខណៈ​ការ​ប្រឡង​ថ្នាក់​ជាតិ​បន្ត​ការ​រឹតបណ្តឹង

Content image - Phnom Penh Post
លោក​បណ្ឌិត​សភា​ចារ្យ ហង់ ជួនណារ៉ុន រដ្នមន្ត្រី​ក្រសួង​អប់រំ យុវជន និង​កីឡា​។ មឿន ញាណ

រដ្ឋមន្ត្រី៖ គុណភាព​សិស្ស​កាន់តែ​ល្អ ខណៈ​ការ​ប្រឡង​ថ្នាក់​ជាតិ​បន្ត​ការ​រឹតបណ្តឹង

សម្មតិកម្ម​មួយ​ចំនួន​បាន​បញ្ជាក់​ថា​សិស្សានុសិស្ស​កម្ពុជា ជាពិសេស​អ្នក​ត្រៀម​ប្រឡង និង​អ្នក​បាន​ប្រឡង​ជាប់​សញ្ញាបត្រ​ទុតិយភូមិ (Bac II) មាន​គុណភាព​ខ្ពស់​ល្អ​ដោយ​កម្រិត​ចំណេះដឹង​របស់​ពួកគាត់​កាន់តែ​ខ្ពស់​ឡើងៗ ពួកគាត់​ខំ​សិក្សា​រៀនសូត្រ​ច្រើន​ជាង​មុន ខណៈ​រដ្ឋមន្ត្រី​ក្រសួង​អប់រំ យុវជន និង​កីឡា​បាន​ថ្លែង​ថា​ក្រសួង​នឹង​នៅ​តែ​រក្សា​វិធានការ​រឹតបន្តឹង​ការ​ប្រឡង​ថ្នាក់​ជាតិ​នេះ​បន្ត​ទៅ​ទៀត​សម្រាប់​សម័យ​ប្រឡង​នៅ​ចុង​ខែ​សីហា​ឆ្នាំ​ ២០១៧ ខាង​មុខ​នេះ​។

នៅឯ​ពិធី​ប្រកាស​ជា​ផ្លូវការ​ការ​គាំទ្រ​សកម្មភាព​អំណាន​តាមរយៈ​បច្ចេកវិទ្យា​ព័ត៌មាន​នៅ​បណ្ណាល័យ​ជាតិ​កម្ពុជា​ លោក ហង់ ជួនណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា​បាន​ថ្លែង​ថា​នៅ​ឆ្នាំ​នេះ​ក្រសួង​នៅ​តែ​បន្ត​រក្សា​វិធានការ​រឹតបន្តឹង​ការ​ប្រឡង​សញ្ញាបត្រ​ទុតិយភូមិ​ដូច​ឆ្នាំ​មុនៗ​ដែរ «​គឺ​អត់​មាន​បន្ធូរបន្ថយ​ទេ​។ កម្រិត​ស្តង់ដារ​ការ​ប្រឡង​កាន់តែ​ខ្ពស់​ទៅៗ និង​កម្រិត​សំណួរ​នៃ​វិញ្ញាសា​ក៏​កាន់​តែ​លំបាក​ទៅៗ​ហើយ​យើង​ឃើញ​សិស្ស​កាន់តែ​ខំប្រឹង​រៀន​ទៅ​ដែរ​»​។

លោក​បាន​បន្ថែម​ថា​ចំពោះ​អ្នក​អង្កេត​ការ​សម័យ​ប្រឡង​អាច​ឈាន​ទៅ​ដល់​រាប់​ពាន់​រាប់ម៉ឺន​នាក់​ដោយ​មាន​ការ​ចូលរួម​ពី​អង្គភាព​ប្រឆាំង​អំពើ​ពុករលួយ​។

លោក​រដ្ឋមន្ត្រី ហង់ ជួនណារ៉ុន ក៏​បាន​ឲ្យ​ដឹង​ដែរ​ថា៖ «​ឆ្នាំ​នេះ​មាន​សិស្ស​ចូលរួម​ប្រឡង​បាក់ឌុប​មាន​ការ​កើនឡើង​រហូត​ដល់​ជាង ១០ ​ម៉ឺន​នាក់ និង​មាន​ ១៧៤ ​មណ្ឌល​»​។

Content image - Phnom Penh Post
លោក​បណ្ឌិត សេង ប៊ុនធឿន​។ មឿន ញាណ

ចំណែកឯ​ ការ​ចំណាយ​លើ​ការ​ប្រឡង​ថ្នាក់​ជាតិ​នៅ​ទូទាំង​ប្រទេស​កម្ពុជា​គឺ​ «​ប្រមាណ ៣,៥០ ​លាន​ដុល្លារ​អាមេរិក​ដូច​ឆ្នាំ​មុនៗ​ដែរ ហើយ​ចំណាយ​ភាគច្រើន​គឺ​ផ្តល់​ទៅ​លើ​គ្រូ​សម្រាប់​ជា​ប្រាក់​បំប៉ន​ដល់​ពួកគាត់​»​។

លោក​បណ្ឌិត សេង ប៊ុនធឿន សាកលវិទ្យាធិការរង​នៃ​សាកលវិទ្យាល័យ​ជាតិ​គ្រប់គ្រង​បាន​ថ្លែង​ថា​បន្ទាប់ពី​ក្រសួង​មាន​វិធានការ​រឹតបន្តឹង​ការ​ប្រឡង​សញ្ញាបត្រ​ទុតិយភូមិ​នា​រយៈពេល​ប៉ុន្មាន​ឆ្នាំ​ចុង​ក្រោយ​នេះ «​ខ្ញុំ​ឃើញ​ថា​លក្ខណ​សម្បត្តិ​របស់​សិស្សនិស្សិត​ដែល​បាន​ចូល​រៀន​បន្ត​នៅ​កម្រិត​ឧត្តមសិក្សា​មាន​ការវិវត្ត​ជា​វិជ្ជមាន​ផ្នែក​ចំណេះដឹង​ល្អ​ជាង​មុន​រហូត​ដល់​ ៧០ ទៅ​​ ៨៥ ​ភាគរយ​គឺ​ពួកគាត់​ (​និស្សិត​) ​មាន​ការ​យក​ចិត្ត​ទុក​ដាក់​រៀនសូត្រ​បាន​ល្អ​ប្រសើរ​»​។

«​និស្សិត​គាត់​មាន​ចំណេះដឹង​ទូទៅ​ជា​មូលដ្ឋាន​ល្អ​មាន​ការ​ជ្រើស​ចូល​រៀន​មុខ​ជំនាញ​ត្រឹមត្រូវ​ល្អ ពួកគាត់​ខំ​យក​ចិត្ត​ទុកដាក់​ស្តាប់​ការ​បង្រៀន​របស់​លោកគ្រូ​អ្នកគ្រូ​មាន​ការ​សួរ​នាំ​ពិភាក្សា​បាន​ច្រើន​ជាង​មុន ហើយ​ពួកគាត់​ក៏​គោរព​ច្បាប់​ទម្លាប់​បាន​ត្រឹមត្រូវ​សមរម្យ​ដែរ​»​។ នេះ​បើ​តាម​ប្រសាសន៍​របស់​លោក​បណ្ឌិត ប៊ុនធឿន​។ «​ដល់​អ៊ីចឹង​ទៅ​ពួកយើង​ជា​គ្រូបង្រៀន​ក៏​ត្រូវ​តែ​ខិតខំ​សម្រិត​សម្រាំង​មេរៀន វិធីសាស្ត្រ​បង្រៀន និង​ប្រតិបត្តិ​ក្រម​គរុកោសល្យ​យ៉ាង​ច្បាស់​លាស់​ព្រោះ​បច្ចុប្បន្ន​នេះ​ពួកយើង​កំពុង​បង្រៀន​ក្រុមនិស្សិត​ដែល​ជា​អ្នក​មាន​ចំណេះដឹង និង​ពួកគេ​កំពុង​ខំប្រឹង​ក្រេប​យក​ចំណេះ​វិជ្ជា​ថ្មីៗ​បន្ថែម​ទៀត​»​។

លោក​បណ្ឌិត សេង ប៊ុនធឿន បាន​បន្ថែម​ថា៖ «​ខ្ញុំ​គាំទ្រ​ទាំង​ស្រុង​ដល់​គោលការណ៍​រឹតបន្តឹង​ការ​ប្រឡង​របស់​ឯកឧត្តម​រដ្ឋមន្ត្រី​ក្រសួង​អប់រំ គោលការណ៍​របស់​ក្រសួង​អប់រំ និង​ការ​ចូលរួម​ពី​ភាគី​ពាក់ព័ន្ធ​ទាំង​ឡាយ​ដើម្បី​ជួយ​ជំរុញ​ឲ្យ​អនាគត​សង្គម​កម្ពុជា​សម្បូរ​ទៅ​ដោយ​ធនធាន​មនុស្ស​ប្រកប​ដោយ​ចំណេះដឹង​ខ្ពស់​មាន​សក្តានុពល​ផលិតភាព​ល្អ និង​សីលធម៌​ក្នុង​ការ​រស់នៅ​ល្អ​»​។

Content image - Phnom Penh Post
សិស្ស​ថ្នាក់​ទី​ ១២ វិទ្យាល័យ ១០ ​មករា​ ១៩៧៩ ក្រុង​សៀមរាប រៀបចំ​ពិធី​រំលឹក​គ្រូ​របស់​ពួកគេ​។

កាលពី​សប្តាហ៍​មុន​នៅ​ក្នុង​ពិធី​រំឭក​គុណ​លោកគ្រូ-អ្នកគ្រូ​របស់​សិស្ស​នៅឯ​វិទ្យាល័យ​មួយ​នា​កណ្តាល​ក្រុង​សៀមរាប​លោក ជា សាវី គ្រូបង្រៀន​អក្សរសាស្ត្រ​ខ្មែរ​នៅ​វិទ្យាល័យ​ ១០ ​មករា​ ១៩៧៩ ក្រុង​សៀមរាប​បាន​ជូនពរ​ឲ្យ​កូន​សិស្សានុសិស្ស​ទាំងអស់​ប្រឡង​ជប់​សញ្ញាបត្រ​ទុតិយភូមិ​ឆ្នាំ​ ២០១៧ ​នេះ​ជា​ស្ថាពរ​។

ទន្ទឹម​នឹង​ការ​ជូនពរ​លោកគ្រូ​រូប​នេះ​ក៏​បាន​ផ្តាំ​ផ្ញើ​ជា​សារ​សម្រាប់​មុន​សម័យ​ប្រឡង​នឹង​ឈាន​មក​ដល់​នៅ​ខែ​ក្រោយ​នេះ​ថា៖ «​សិស្ស​ថ្នាក់​ទី​ ១២ ទាំងអស់​គួរ​តែ​បន្ថែម​ការ​ខិតខំ​រៀនសូត្រ​របស់​ខ្លួន​គ្រប់មុខ​វិជ្ជា​តទៅ​ទៀត​ដោយ​ចាប់ផ្តើម​ពី​មុខ​វិជ្ជា​ណា​ដែល​ខ្លួន​ស្រឡាញ់​ចូលចិត្ត និង​ជាពិសេស​ត្រូវ​បន្ត​យក​ចិត្ត​ទុកដាក់​រៀន​មេរៀន​សំខាន់ៗ ២ ដែល​នឹង​ទទួល​បាន​ពិន្ទុ​ខ្ពស់​ពេញ​ ១២៥ លើ​ ១២៥ នៅ​ពេល​ប្រឡង​គឺ​ក្នុង​នោះ​​ ១-​មុខវិជ្ជា​វិទ្យា​សង្គមសាស្ត្រ​គឺ​ភាសា​ខ្មែរ​និយាយ​ឲ្យ​ចំ​គឺ “​តែងសេចក្តី​” តែ​ម្តង និង​ ២-មុខវិជ្ជា​វិទ្យាសាស្ត្រ​ពិត គឺ​“​គណិតវិទ្យា​” ​ហ្នឹង​ឯង​»​។

Content image - Phnom Penh Post
សិស្ស​ថ្នាក់​ទី​ ១២ វិទ្យាល័យ ១០ ​មករា​ ១៩៧៩ ក្រុង​សៀមរាប រៀបចំ​ពិធី​រំលឹក​គ្រូ​របស់​ពួកគេ​។

«​ក្នុង​នាម​ជា​គ្រូបង្រៀន​ផ្នែក​អក្សរសាស្ត្រ​ខ្មែរ ខ្ញុំ​បាន​សង្កេត​ឃើញ​ថា​ប៉ុន្មាន​ឆ្នាំ​ចុង​ក្រោយ​នេះ​វិញ្ញាសា​តែង​សេចក្តី​ឃើញ​មាន​ចេញ​លើ “​ប្រធាន​ពិភាក្សា​”​ញឹកញាប់​ជាង​គេ​គឺ​ប្រហែល​ជា​ក្រសួង​ចង់​បណ្តុះ​គំនិត​ដល់​សិស្សានុសិស្ស ដែល​នឹង​ក្លាយ​ជា​ទំពាំង​ស្នង​ប្ញស្សី​របស់​សង្គម​យើង​ឲ្យ​លោក​ប៉ិនប្រសប់​ក្នុង​ការ​ជជែក​ពិភាក្សា​ប្រកប​ដោយ​ពហុគំនិត​មាន​ការ​ត្រិះរិះ​ពិចារណា​ត្រឹមត្រូវ​»​។ នេះ​បើ​តាម​ប្រសាសន៍​របស់​លោកគ្រូ សាវី​។ សម្រាប់​រយៈពេល​ពីរ​បី​ថ្ងៃ​មុន​ប្រឡង និង​ ១ ​ថ្ងៃ​មុន​ពេល​ប្រឡង សិស្ស​ទាំងអស់​ត្រូវ​ហូប​តែ​អាហារ​ល្អៗ​សម្រាក​ (​គេង​) ឲ្យ​បាន​គ្រប់គ្រាន់ «​ចៀសវាង​មាន​ជំងឺ​មក​រំខាន​យើង​»​។

ចំពោះ​នៅ​ថ្ងៃ​ប្រឡង​មក​ដល់​បេក្ខជន​ទាំងអស់ «​ត្រូវ​រូតរះ​ស្រស់ស្រូប និង​ទៅ​ឲ្យ​ដល់​មណ្ឌល​ប្រឡង​ឲ្យ​បាន​មុន​ម៉ោង ៦ ​និង​ ៣០ ​នាទី​ព្រឹក​។ ពេល​ចូល​បន្ទប់​ប្រឡង​អ្នក​ត្រូវ​តាំង​ចិត្ត​ឲ្យ​ស្ងប់ កុំ​ជ្រួលច្របល់​ត្រូវ​មើល​វិញ្ញាសា​ឲ្យ​បាន​ច្បាស់លាស់ ហើយ​បើ​យល់​ថា​សំណួរ​ណា​មួយ​ងាយស្រួល​ជាង​គេ​ត្រូវ​ចាប់ផ្តើម​ធ្វើ​ជា​មុន​គេ​តាម​លំដាប់​តទៅ​ដើម្បី​កុំ​ឲ្យ​ខាត​ពេលវេលា ឬ​បាក់​ទឹកចិត្ត​»​។ នេះ​បើ​តាម​ប្រសាសន៍​របស់​លោកគ្រូ ជា សាវី​។ «​បើ​អនុវត្ត​បាន​បែប​នេះ ​នោះ​សិស្ស​ទាំងអស់​នឹង​ទទួល​បាន​ជោគជ័យ​ហើយ​»៕

0

Comments

Please, login or register to post a comment

ព័ត៌មានពាក់ព័ន្ធ