.jpg)
កីឡាករ ភក្តី គុនខ្មែរ របស់កម្ពុជា បានបុកកែងទៅលើអ្នកប្រដាល់ជប៉ុន គីម៉ា ស៊ូជី ក្នុងការប្រកួត កាលពីយប់ថ្ងៃអាទិត្យ។ រូបថត ថោន
ភ្នំពេញ៖ កីឡាករជប៉ុន គីម៉ា ស៊ូជី (Keima Shoji) បានលុតជង្គង់គ្រវីក្បាល បង្ហាញការសរសើរពីបច្ចេកទេសវាយកែង និងបុកកែងដ៏មានគ្រោះថ្នាក់របស់កីឡាករកម្ពុជា ភក្តី គុនខ្មែរ ដែលបានធ្វើឱ្យក្តោងច្រមុះ និងផ្ទៃមុខរបស់គេមានរបួសជាទម្ងន់ ចំណែក គង់ ហូវ បានសារភាពពីចំណុចខ្វះខាតរបស់ខ្លួន និងបានសុំទោសពីកំហុសឆ្គង ដែលបានវ៉ៃថែមខុសបទបញ្ជាប្រកួតទៅលើកីឡាករអ៊ីរ៉ង់ Mehrddad Khanzadeh។
សម្រាប់ការប្រកួតក្នុងកម្មវិធី Mas Fight Cambodia នៅលើសង្វៀនថោន កាលពីថ្ងៃអាទិត្យ កន្លងមកនេះ ភក្តី គុនខ្មែរ បានប្រើផ្លែកែងរបស់គេវាយស្រោចទៅលើផ្ទៃមុខរបស់កីឡាករជប៉ុន គីម៉ា ស៊ូជី យ៉ាងរន្ថើន និងបានធ្វើឱ្យដៃគូម្នាក់នេះមានរបួសក្តោងច្រមុះ ហូរឈាមមិនដាច់តាំងពីចុងទឹកទី១។
ឃើញស្ថានភាពបែបនេះ ភក្តី គុនខ្មែរ កាន់តែបង្កើនការវាយសម្រុកខ្លាំង នៅក្នុងទឹកទី២ ព្រោះរូបគេចង់វ៉ៃកីឡាករជប៉ុនម្នាក់នេះឱ្យសន្លប់ ឬត្រូវបានគ្រូពេទ្យបញ្ឈប់ ដើម្បីទទួលបានប្រាក់រង្វាន់បន្ថែមចំនួន ១ លានរៀល ពីម្ចាស់ឧបត្ថម្ភ ប៉ុន្តែ គីម៉ា ស៊ូជី មិនព្រមឈប់ប្រកួតនោះទេ។
បើទោះបីជាអ្នកឱ្យទឹករបស់គេ មានបំណងបោះកន្សែងសសុំចុះចាញ់ក្នុងការប្រកួតនេះ ព្រោះឃើញឈាមហូរមកច្រើនពេក ហើយការតស៊ូមិនចុះញមរបស់អ្នកលេងសាមួរ៉ៃ Keima Shoji បានបង្កើតបាននៅឈុតឆាកប្រយុទ្ធគ្នាកាន់តែកក្រើក នៅក្នុងទឹកទី៣ ដោយអ្នកទាំង២នេះ វាយប្តូរគ្នាទៅវិញទៅមករហូតអស់កម្លាំងរៀងៗខ្លួន។
នៅក្រោយបញ្ចប់ការប្រកួតភ្លាម គីម៉ា ស៊ូជី និង ភក្តី គុនខ្មែរ បានលុតជង្គង់សម្តែងការសុំទោសគ្នាទៅវិញទៅមក ហើយក្នុងពេលនោះ កីឡាករជប៉ុន បានគ្រវីក្បាលបង្ហាញការសរសើរពីការវាយកែង និងបុកកែងបានយ៉ាងល្អរបស់ ភក្តី ដែលធ្វើឱ្យផ្ទៃមុខរបស់គេមានស្នាមពកជាច្រើនកន្លែង ជាពិសេសច្រមុះតែម្តង គឺមានរបួស និងមានឈាមហូរស្រក់មកមិនឈប់ មុនពេលពិធីករប្រកាសឱ្យចាញ់ ភក្តី ដោយពិន្ទុ។
ទន្ទឹមជាមួយគ្នានេះ ភក្តី គុនខ្មែរ ក៏បានសរសើរពីភាពស៊ូខ្លាំងរបស់ គីម៉ា ស៊ូជី ដោយបាននិយាយក្រោយការប្រកួតថា៖ «តាមរបួសក្តោងច្រមុះរបស់គាត់ ខ្ញុំគិតថា គាត់នឹងឈប់ប្រកួតហើយ ព្រោះបែកធំ ឬអាចបាក់ក្តោងច្រមុះ ហើយខ្ញុំក៏បន់ឱ្យគ្រូពេទ្យបញ្ឈប់គាត់ដែរ ដើម្បីបានប្រាក់រង្វាន់បន្ថែម១លានរៀល ប៉ុន្តែគាត់ពិតជាស៊ូខ្លាំងណាស់ មិនព្រមឈប់ទេ ធ្វើឱ្យខ្ញុំខំវ៉ៃគាត់ឡើងចង់អស់ខ្លួនឯង នៅចុងទឹកទី៣ផងដែរ»។
ចំណែកកីឡាករ គង់ ហូវ បានបង្កើតកំហុសទៅលើអ្នកប្រដាល់របស់អ៊ីរ៉ង់ Mehrddad Khanzadeh តាមរយៈការទាត់ថែម ១ ជើង និងគ្រវាសដៃត្រឡប់ក្រោយចូលថ្គាម បណ្តាលឱ្យដៃគូម្នាក់នេះដួលទាំងវង្វេង ហើយត្រូវបានអាជ្ញាកណ្តាលរាប់។ ប៉ុន្តែដោយសារនេះជាការវាយថែមខុសបទបញ្ជា ព្រោះសំឡេងជួងបញ្ចប់ទឹកទី២ បានពន្លឺឡើងទៅហើយនោះ គឺអាជ្ញាកណ្តាល បានបង្ហាញសញ្ញាទៅចៅក្រមទាំង៥នាក់ឱ្យដកពិន្ទុ គង់ ហូវ។
បន្ថែមទៅលើការចាញ់ប្រៀប ដោយការវាយថែមល្មើសនឹងបទបញ្ជានេះ គង់ ហូវ បានព្យាយាមវាយសម្រុកខ្លាំង នៅទឹកទី៣ ចុងក្រោយ ក្នុងបំណងចង់ស្តារដើមមកវិញ ប៉ុន្តែត្រូវបានកីឡាករ Mehrddad Khanzadeh ម៉ាត់ចូលផ្ទៃមុខ ២ ដៃ បណ្តាលឱ្យដួលទាំងវង្វេង និងត្រូវបានអាជ្ញាកណ្តាលរាប់។ គង់ ហូវ បានព្យាយាមក្រោកឈរឡើងប្រកួតបន្តទាំងស្មារតីមិនទាន់នឹងនរ និងបានចាញ់ Mehrddad Khanzadeh ដោយពិន្ទុ។
បន្ទាប់ពីការប្រកួតនេះ គង់ ហូវ បានសារភាពថា រូបគេពិតជាវង្វេង និងបាត់ស្មារតីមួយភាំង ចំពោះការវាយចូល ២ ដៃរបស់ Mehrddad Khanzadeh ដែលពិតជាមានទម្ងន់ធ្ងន់។ ហូវ បានសរសើរដៃគូម្នាក់នេះ ដែលមានភាពរឹងខ្លាំង មិនខូចជើងក្រោមទម្ងន់ទាត់ធ្ងន់របស់ខ្លួន ហើយជាមួយគ្នានេះ គង់ ហូវ ក៏បានសុំទោស ចំពោះការវាយថែមល្មើសបទបញ្ជាទៅលើកីឡាករអ៊ីរ៉ង់ម្នាក់នេះ។
គង់ ហូវ បាននិយាយថា៖ «នៅចុងទឹកទី២ ហ្នឹង ខ្ញុំមិនបានឮសំឡេងជួងនោះទេ គឺនៅពេលឃើញគាត់ទម្លាក់ដៃ ក្រោមការទាត់ ១ ជើងរបស់ខ្ញុំ ក៏ខ្ញុំបានគ្រវាសថែម ១ ដៃទៀត អ៊ីចឹងនេះជាកំហុសអចេតនារបស់ខ្ញុំទេ។ ខ្ញុំសុំទោសចំពោះគាត់ និងបងប្អូនអ្នកទស្សនា គឺខ្ញុំគ្មានបំណងវាយថែមទៅលើគាត់នោះទេ»៕
