ភ្នំពេញ៖ កីឡាករជើងខ្លាំងទម្ងន់ធ្ងន់របស់កម្ពុជា ព្រំ សំណាង បានសរសើរទៅដល់កីឡាករអ៊ីរ៉ង់ Keivan Soleimani ដែលមានភាពធន់ និងរឹងមាំខ្លាំង មិនព្រមទន់ជ្រាយ និងចុះចាញ់ក្រោមទម្ងន់ជើងទាត់ចូលធ្ងន់ៗរបស់ខ្លួន នៅពេលអ្នកទាំង ២ បានជួបគ្នា ជាលើកដំបូង នៅលើសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍ ស្របពេលដែល គង់ ហូវ បានយកឈ្នះកីឡាករថៃ ភេត ណាមខាំ ទាំងលំបាក។
ដោយធ្លាប់ឈ្នះ រឿង សោភ័ណ្ឌ និងស្មើពិន្ទុជាមួយ ធន់ រិទ្ធី កីឡាករ Keivan Soleimani បានបោះពាក្យសម្តីធ្ងន់ៗ ដោយអះអាងថា រូបគេស្គាល់ពីសមត្ថភាព ព្រំ សំណាង ច្បាស់ ហើយមានការជឿជាក់ថា ត្រូវតែឈ្នះការប្រកួតនេះ ប៉ុន្តែតាមរយៈការប្រកួតជាក់ស្តែង អ្នកប្រដាល់របស់អ៊ីរ៉ង់ម្នាក់នេះ បានថមថយកម្លាំង និងចង់អស់ម្តងៗ នៅចុងទឹកទី២ និងទឹកទី៣ ក្រោមការតាមវាយសង្រ្គប់របស់ សំណាង។
តាមរយៈការប្រកួតនេះ ព្រំ សំណាង ជាអ្នកដើរចូលវាយលុក តែ Keivan Soleimani ក៏បានព្យាយាមវាយបកសងវិញមួយប្រាវៗផងដែរ។ តែទោះបីជាយ៉ាងណា ព្រំ សំណាង វាយចូលចំគោលដៅពេញៗល្អជាង ជាពិសេសការទាត់ចូលធ្ងន់ៗរបស់គេ ដែលសមតែធ្វើឱ្យ Keivan Soleimani មានបញ្ហានៅលើឆ្អឹងជំនីរខាងឆ្វេង។
ប៉ុន្តែកីឡាករអ៊ីរ៉ង់ Keivan Soleimani ពិតជាមានភាពរឹងមាំ និងស៊ូខ្លាំង ដោយរូបគេមិនបានបង្ហាញការឈឺចាប់អ្វីទេ។ ផ្ទុយទៅវិញគេបានវាយប្តូរជាមួយ សំណាង ជាមួយការប្រើកណ្តាប់ដៃ ទាត់ និងបុកជង្គង់ ដែលបង្ខំឱ្យ ព្រំ សំណាង ព្យាយាមវាយកែង និងម៉ាត់ ឡើងចង់ខ្សោះខ្លួនផងដែរ ទម្រាំអាចយកឈ្នះ Keivan Soleimani ដោយពិន្ទុ សម្រាប់ការប្រកួតត្រឹម៣ទឹកនេះ។
សម្រាប់ការទទួលបានជ័យជម្នះនេះ ព្រំ សំណាង បាននិយាយក្រោយការប្រកួតថា៖ «តាមការប្រកួទាំង ៣ ទឹកនេះ វាដូចជាមិនការលំបាកអ្វីពេកនោះទេសម្រាប់ខ្ញុំ ព្រោះខ្ញុំបានទាត់ចូលគាត់ពេញៗ ប៉ុន្តែគាត់ពិតជារឹងខ្លាំង ពិសេសឆ្អឹងជំនីររបស់គាត់ ពិតជារឹងណាស់»។
ជាមួយគ្នានេះ កីឡាករមានរហស្សនាម «ជាងកាត់សក់ដៃឯក» ព្រំ សំណាង បានបញ្ជាក់ថា ខ្លួនពិតជាចង់ផ្តួល Keivan Soleimani ឱ្យសន្លប់ តែមិនអាចធ្វើទៅបាន។ «ខ្ញុំចង់ផ្តាច់គាត់ឱ្យសន្លប់ នៅក្នុងទឹកទី២ ប៉ុន្តែគាត់ស៊ូណាស់ គឺបានវាយបកសងឡងទៅឡងមក។ តែទោះយ៉ាងណា គាត់មិនមានចំណុចណាប្រដំប្រសងជាមួយខ្ញុំដែរ ដោយគាត់បានត្រឹមចាប់ជើងរបស់ខ្ញុំ ដែលទាត់ចូលពេញៗ»។
យ៉ាងណាមិញ កីឡាករ គង់ ហូវ ដែលទើបបានចាញ់ពិន្ទុកីឡាករអ៊ីរ៉ង់ Mehrddad Khanzadeh កាលពីថ្ងៃទី ១៧ ខែមីនានោះ បានបង្ហាញសមត្ថភាពប្រកួតបានយ៉ាងល្អ ក្នុងការប្រឈមជាមួយអ្នកប្រយុទ្ធរបស់ថៃ ភេត ណាមខាំ សម្រាប់ការប្រកួត នៅលើសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍នោះដែរ។
អ្នកទាំង ២ នេះ មានសមត្ថភាពល្អ និងមានក្បាច់វាយចេញបានលឿនដូចគ្នា ប៉ុន្តែការវាយកែងស្តាំរបស់ គង់ ហូវ បានធ្វើឱ្យ ភេត ណាមខាំ បែកនៅលើចុងចិញ្ចើមស្តាំតាំងពីទឹកទី១ ហើយការវាយប្តូរគ្នាយ៉ាងខ្លាំងស្ទើរ ៥ ទឹកពេញនេះ បានបន្សល់ស្នាមបែកនៅលើសៀតផ្កាខាងឆ្វេងរបស់ ភេត ណាមខាំ មួយកន្លែងទៀត នៅទឹកទី៥ គឺមុនពេលគណៈកម្មការប្រកាសឱ្យ គង់ ហូវ ឈ្នះពិន្ទុ។ ចំណែកកីឡាករ រិន សារ័ត្ន ដែលប្រឹងប្រែងវាយអស់ពីលទ្ធភាពនោះ បានត្រឹមស្មើពិន្ទុជាមួយកីឡាករថៃ Pich Bopha នៅសង្វៀនប៉ុស្តិ៍លេខ៥នោះដែរ៕